Thread by @kashifch

سارنگی

میرے اندر ایک کھلبلی سی مچ گئی۔
میں عمر کے اس حصے میں ہوں جہاں لطیف جذبات سرد پڑ جاتے ہیں ۔ آدمی کے اندر کا بیل تھک کر تھان پر بیٹھا جگالی کر رہا ہوتا ہے۔ اسے صرف ٹھوکروں سے نہیں اٹھا یا جا سکتا ، تابڑ توڑ ڈنڈے برسانے پڑتے ہیں۔

یہی کچھ میرا حال ہے۔

1

اس کی موت کی خبر مجھ پر تابڑ توڑ ڈنڈوں کی طرح برس رہی تھی

سر پر رکھا دھرتی بوجھ اتار کر پیچھے دیکھو تو سوائے تیز مٹی کے جھکڑوں کے اور کچھ دکھائی نہیں دیتا مگر اس میں بھی کچھ چہرے ایسے ہیں جو ابھی دھندلائے نہیں۔کچھ کانوں میں رس گھولتی آوازیں ہیں انہیں میں ایک آواز اسکی ہے۔

2

میں شہر میں رہتا تھا زیادہ عرصہ وہیں پلا پڑھا۔ ہاں گرمیوں کی چھٹیوں میں گاوں دو تین مہینے ماں کے پاس گزار آتا۔ایسی ہی گرمیاں تھیں جب گاوں میں ہمسائیوں میں شادی تھی۔ ساری رات گیت گائے جاتے۔ خوشی کے گیت ۔ گانے والی تھک جاتیں تو سب بے سرا ہو جاتا۔
3

پھر دو تین روز بعد آوازیں تازہ دم اور سُر میں ہو جاتیں ۔ انہیں آوازوں کے ہجوم میں ایک آواز لمحہ بھر کو ابھرتی اور پھر کھو جاتی

ایسی کومل آواز جیسی ساون اور ساڑھ کے مہنوں میں آم کے پیڑوں سے سنائی دیتی ہے۔ اس خوشبو آواز کو بھانت بھانت کی آوازوں سے الگ کرنا آسان کام نہیں تھا
4

میں سماعت کی چھاننی سے ریت کے انبار چھان چھان کر ہلکان ہوجاتا تب کہیں جا کر درمیان یا آخر میں اس آواز کا ہلکا سا جھونکا مجھے کپکپا دیتا۔

وہ سارے گیت خوشی کے ہوتے مگر اسکی آواز میں ایک عجیب طرح کا حزن اور سوز تھا ۔ جیسے کوئی کوک پکار رہا ہو جیسے کہیں ہوک اٹھ رہی ہو۔
5

آواز کا کوئی نام نہیں ہوتا۔ کسی سے پوچھتا بھی تو کیا۔میں گاوں میں ایک طرح سے اجنبی ہی تھا۔

ایک روزشادی والے گھر سے ایک لڑکی آئی اور ایک کوئل آواز میں گنگناتے ماں کو آواز دی۔ میرے پیرو ں تلے سے زمین کھسک گئی جیسے ایک توپ میرے اندر داغی گئی ہو۔
6

وہ آواز میرے سامنے پورا وجود لئے کھڑی تھی جس کی تلاش میں آوازوں کے جنگل میں آوارہ پھرتا رہتا تھا۔ لگتا تھا وہ بات کرنا چاہ رہی ہے مگر مجھے لگتا تھا بولا تو الفاظ کی بجائے کلیجہ باہر نکل آئے گا

ماں سے پوچھا تو پتا چلا اس لڑکی اور اس کے بھائی دونوں کی شادی ایک ساتھ ہو رہی ہے

7

مجھے وائلن بہت پسند ہے۔ لگتا تھا جیسے وائلن صرف وائلن سننے کے لئے مجھے سماعت عطا ہوئی تھی۔ میرا دکھ آواز کا ہی دکھ تھا اس لئے لگتا تھا صرف وائلن ہی سمجھ سکتا تھا سو دن رات وہی سنتا رہتا ۔

ایک روز گلی میں ایک فقیر دولو جو سارنگی بجا کر مانگا کرتا تھا گزرا۔

8

دولو نوجوان تھا مگر سارنگی جیسے مشکل ساز پر کمال مہارت رکھتا تھا۔

سارنگی کی آواز نے ایک عجیب سا مرہم میرے گھاو پر رکھا اور میں نے دولو کو اندر بلا لیا۔ سارنگی پہلے بھی سنی تھی مگر اس روز لگا پہلی بار سن رہا ہوں سہہ رہا ہوں۔ وہ صحن میں بیٹھا سارنگی بجانے لگا
9

اور میں انکھیں بند کئے یوں محسوس کر رہا تھا جیسے سارنگی کی آواز میرے آر پار گزر رہی ہے۔ اچانک وہ چادر اوڑھےصحن میں داخل ہوئی۔ یک نہ شد دو شد۔ میرا اندر باہر چھلنی ہوگیا

ماں پسار میں تھیں کچھ دیر وہ بھی پسار میں گم رہی پھر خلافِ توقع دالان کے کونے میں چادر میں اپنا آپ
10

گم کئے بیٹھ سارنگی سنتی رہی ۔

سارنگی سر گوشیاں کرتی، کبھی سسکتی اور کبھی رو کر پکارنے لگتی

میرے اندر کوئی فراقیہ چھٹیاں لکھنے لگا۔ سارنگی وہ چھٹیاں مکتوب الیہ تک پہنچاتی رہی۔

دریا کا دریا چڑھتا گیا اور ہر طرف جل تھل ہوگیا۔ آہستہ آہستہ روحوں پر چڑھے غلاف اترنے لگے

11

وہ کچھ دیر سنتی رہی پھر اسی کی آنکھوں سے آنسو ٹپکنے لگے۔ سارنگی روتی جاتی تھی۔اس سے پہلے کے ضبط کا دامن چھوٹ جاتا وہ بچے کچے آنسو سمٹیتی گھر سے چلی گئی۔ یہ میری اسکی پہلی اور آخر ی ملاقات تھی۔ اگلے روز وہ مایوں بیٹھ گئی۔ شادی کب شروع ہوئی اور کب ختم مجھے علم نہیں۔
12

جس روز شادی تھی میں گھر اکیلا تھا سارا دن ریکارڈ پلیئر پر سارنگی سنتا رہا۔

شہر واپس آیا تو پھر زندگی کے کچھ سال سارنگی نے ہر آواز پر قبضہ کر لیا۔ سارنگی اور میرا دکھ سانجھا تھا۔ زندگی بدلی اور پھر آوازوں کے جنگل میں سارنگی بھی کھو گئی۔

13

اور آج برسوں بعد خبر ملی کہ وہ مر گئی۔ یوں لگا جیسے سارنگی بجتے بجتے اس کے سارے تار ٹوٹ گئے ہوں۔

جو اسے رخصت کرنے گئی تھی وہ بھی رخصت ہو چکی۔ اس گھر اب کوئی اور رہتا تھا۔ بہت سے لوگ بچھڑ گئے۔ بہت کچھ اتھل پتھل ہو چکا تھا۔

14

دل کیا کسی سے پوچھوں اس نے زندگی کیسے گزاری۔ سارنگی سن کر وہ کیوں روتی تھی۔ سارے جہاں کو معلوم ہو جائے اسے سارنگی کیوں پسند تھی۔ گھر گھر اس بات کے تذکرے ہوں ۔ میری خاطر وہ اندر اندر کیسے کھل کر دنیا سے چلی گئی یہ خبر اخباروں میں چھپے۔
15

یہی سوچ مجھے گاوں لے گئ۔سوچا کسی کو تو معلوم ہوگا۔ کوئی تو خبر دے گا اسکی مجھے۔ مجھے پہلا خیال دولو کا آیا۔ اگلے روز اسے بلا بھیجا۔ سر کے بال کیا بھنوئیں بھی سفید ہو چکیں تھیں۔ اس کو دیکھ اپنے بڑھاپے کا شدید احساس ہوا۔

اب اسکے ہاتھ کانپتے تھے آواز بھی ساتھ نہ دیتی تھی۔
16

پھر وہ بولا:

"ہر دوسرے تیسرے مہینے میں اس طرف آتا تھا۔ جب بھی آتا سیدھا ان کے دروازے پر ضرور جاتا۔ قدموں کی آہٹ سے پتا چل جاتا دروازے کی دوسری طرف وہ بیٹھی ہے۔ آخری روز بھی اس نے سارنگی سننے کی فرمائش کی تھی۔ چوہدری نے بندہ بھی دوڑایا مگر میں کہیں اور نکلا ہوا تھا۔
17

دوسرے تیسرے روز واپس آیا تو سیدھا ان کے دروازے پر سارنگی بجانے لگا اندر سے آواز آئی " کہیں اور جا کے بجاو ۔۔۔ یہ مرگ والا گھر ہے"۔۔۔ میرے تو ہوش اڑ گئے۔ "

دولو کی تمھیں پتا ہے اس کو سارنگی کیوں پسند تھی۔۔۔۔

دولو نے کہا ہاں ۔۔۔ مگر جانے دیں اب ان باتوں کا کیا فائدہ۔

18

نفع نقصان چھوڑو یہ بتاو اسے سارنگی کیوں پسند تھی۔

میں نے اصرار کیا تو کہنے لگا نہ جی بہشتن نے منع کیا تھا۔

سارنگی ہر دکھی انسان کو پسند ہوتی ہے وہ بھی ایک دکھی روح تھی۔ اور سارنگی میری زبان تھی۔

تمھاری زبان؟ کیا کہہ رہے ہو۔

19

ٓپ کو یاد ہے جب انکی شادی تھی ۔ میں اتفاق سے نہیں آیا تھا۔ جانتا تھا آج آخری دن ہے اس کا۔

ہاں یاد ہے۔ پھر؟

بس جی اب کیا فائدہ۔ بچپن سے وہ سارنگی سنتی رہی میں سناتا رہا۔ اس کے دکھ سے میری سارنگی میں اور زیادہ اثر آ جاتا۔ نہ کبھی اس نے کچھ کہا نہ میں نے۔
20

بس یو نہی عمر گزار دی ہم دونوں نے ۔۔۔ اس نے سارنگی سنتے میں نے سارنگی سناتے۔

بس ایک بار اس نے کہا تھا:

"دولو! تم خوش قسمت ہو تمارے حصے کا رونا سارنگی رو دیتی ہے اور یہ سانگی مجھ سے بہتر ہے کہ اپنا احوال تو کہہ سکتی ہے"۔

دولو نے اور بھی بہت کچھ کہا۔
21

شاید اسے زندگی میں پہلی بار بولنے کا موقع ملا تھا۔ میں سنتا رہا مگر آوازوں کے جنگل میں دولو کی آواز گم ہوتی چلی گئی۔
اس دن کے بعد بس یہ ہوا جب بھی کوئی فقیر سارنگی بجاتا سنائی دیتا میں دروازے کی اوٹ میں کھڑا دیر تک سنتا رہتا ہوں۔

ماخوذ۔ منشایاد

@threadreaderapp

please compile.