دنیا میں ایسے علاقے میں بھی لوگ آباد ہیں، جہاں درجہ حرارت منفی 67 ڈگری سینٹی گریڈ تک گر جاتا ہے۔ یہ علاقے روس کے سرد ترین خطے سائبیریا میں واقع ہیں۔معروف عربی جریدے الشرق الاوسط نے دنیا کے اس سرد ترین علاقے میں رہنے والے لوگوں کی زندگیوں پر روشنی ڈالی ہے۔ 
روسی دارالحکومت ماسکو سے 18 سو کلومیٹر شمال میں دنیا کا سب سے سرد ترین شہر ”نورلسک“ (Norilsk) واقع ہے۔ اس شہر کی آبادی ایک لاکھ 75 ہزار نفوس پر مشتمل ہے۔ نورلسک میں سال کے 365 ایام میں سے 270 روز برفباری ہوتی ہے۔ دریائے لینا کے ساتھ آباد نورلسک
قطب منجمد شمالی کا سب سے بڑا شہر ہے، جو اس خطے کا صنعتی مرکز بھی کہلاتا ہے۔یہاں نیکل (Nickel) اور پلاڈیم (Palladium) کی دنیا کی سب سے بڑی کانیں ہیں۔ اس لئے سخت ترین سردی کے باوجود لوگ سال بھر یہاں قیام پذیر رہتے ہیں۔دلچسپ بات یہ ہے کہ پہاڑوں میں
گھرے اس صنعتی شہر تک پہنچنے کے لئے کوئی زمینی راستہ بھی نہیں ہے۔ یہاں رسائی کاواحد ذریعہ ہوائی جہاز ہے۔ نورلسک شہر چونکہ قطب شمالی کے قریب واقع ہے، اس لئے دسمبر اور جنوری کے مہینے میں یہاں سورج بھی طلوع نہیں ہوتا۔ یہاں موسم سرما میں درجہ حرارت
عموماً 64 ڈگری سینٹی گریڈ رہتا ہے۔ جبکہ گرمیوں میں بھی نقطہ انجماد سے نیچے ہی رہتا ہے۔ نورلسک شہر میں منفی 14 ڈگری سینٹی گریڈ کے درجہ حرارت کو نارمل موسم قرار دیا جاتا ہے۔ نورلسک سے مزید شمال کی طرف جائیں تو دنیا کے 2 سرد گاؤں آتے ہیں۔ گینز بک آف ورلڈ کے
مطابق ”ویرخویانسک“ نامی گاؤں میں ایک مرتبہ موسم سرما میں ماٸنس 67.8 سینٹی گریڈ اور گرمیوں میں 37.8 سینٹی گریڈ درجہ حرارت کا ریکارڈ بنا۔جبکہ ”اومیاکین“ نامی گاؤں میں 1924ء میں تاریخ کا کم ترین درجہ حرارت منفی 71 تک ریکارڈ کیا گیا تھا، جو کرئہ
ارض کے انسانی آبادی والے کسی بھی علاقے کا کم ترین درجہ حرارت تھا۔ واضح رہے کہ کرئہ ارض کا سرد ترین علاقہ قطب شمالی اور قطب جنوبی ہیں، جہاں درجہ حرارت منفی 92 ڈگری سینٹی گریڈ تک گرجاتا ہے، تاہم وہاں کوئی انسان آباد نہیں ہے۔ ویرخویسانک گاوٴں کی آبادی 1131 نفوس پر مشتمل ہے۔
• • •
Missing some Tweet in this thread? You can try to
force a refresh
