Thread by @swathikasarah

தொடர்ந்து நண்பர்கள் பலருக்கும் ஆங்கில நூல்கள் வாசிக்க ஆசை. தொழில்முறையாக ஆங்கில மின்னஞ்சல் எழுதுபவர்களுக்குக் கூட ஒரு வகையான தயக்கம் இருப்பதால் ஆங்கில நூல்கள் படிக்காமல் இருக்கிறார்கள். அவர்களுக்கான எனது வழிகாட்டுதல் இது.

தொடக்கத்தில் எந்த ஆங்கில நூலை எடுத்தாலும் கடினமாகத் தான் இருக்கப் போகிறது. ஆனால் ஓராண்டில் படிக்கப்படிக்கப் பழகிவிடும். அதனால் எந்த நூலை எடுத்தாலும் சிரமமாக இருந்தாலும் எப்படியாவது படித்து முடித்துவிடப் பாருங்கள். இன்று தொடங்கினாலும் ஓராண்டு ஆகும்,

காத்திருந்து அடுத்த ஆண்டு தொடங்கினாலும் ஓராண்டு ஆகும். சிரமம் பார்க்காமல் இன்றே தொடங்குங்கள்.

எங்கே தொடங்கலாம்?
1. புதுமொழி என்பதால் வாசிக்கும் போது கடினமாகத் தான் இருக்கும். கூடவே வாசிக்கும் தலைப்பும் உங்களுக்குப் பிடிக்கவில்லை, புரியவில்லையென்றால் ஒரு வித வெறுப்பு வரும்.

அவ்வெறுப்பு ஆங்கில மொழி நூல்களின் மேலும் விழும்.

அதனால் உங்களுக்குப் பிடித்த தலைப்பில் தொடக்க நிலை வாசகருக்கான ஆங்கில நூலைப் படித்துப் பாருங்கள். தலைப்பு பிடிப்பதால் கொஞ்சம் தம் கட்டி வாசித்து விடலாம். மொழி பிடிபட்டதும் அனைத்தையும் படிக்கலாம்.

அதே போல கூடுமானவரையில் விறுவிறுப்பாக நகரும் நூல்களைப் படியுங்கள். அது எப்படியாவது படித்து முடிக்க வழி செய்யும்.

2. குழந்தைகள் நூலில் தொடங்குவது சாலச் சிறந்தது. என்னது குழந்தைங்க நூலா என்று கூச்சப்பட வேண்டாம். ஆங்கிலத்தில் நல்ல குழந்தைகள் நூல்கள் ஏராளம் இருக்கின்றன.

உங்களுக்குக் கதை பிடிக்குமென்றால் ஏகப்பட்ட நல்ல கதைகள் கொட்டிக் கிடக்கின்றன. அவற்றின் சிறப்பு என்னவென்றால் குழந்தைகளுக்குப் புரியும் வகையில் கடினமான கருத்தைக் கூட எளிய மொழியில் சொல்லியிருப்பார்கள். சொற்களும் வாக்கிய அமைப்பும் எளிதாக இருக்கும், மொழி பிடிபடும்.

3. மொழிபெயர்ப்பு நூலையும் அதன் மூலத்தையும் சேர்த்துப் படிக்கலாம். தமிழில் மொழிபெயர்த்து நீங்கள் படித்த உங்களுக்குப் பிடித்தமான நூலொன்றை நேரடியாக ஆங்கிலத்தில் வாங்கிப் படித்துப் பாருங்கள். ஏற்கனவே உங்களுக்குப் பழகிய கதைக்களம், தெரிந்த கருத்து என்பதால், என்ன சொல்ல வருகிறார்கள்

என்பதில் கவனம் செல்லாமல் எப்படி சொல்லியிருக்கிறார்கள் என்பதில் கவனம் செல்லும். அப்போது மொழியறிவு சட்டென வளரும், மற்ற நூல்கள் படிக்கும் போது கைகொடுக்கும்.

4. ஒரே நூலை மீண்டும் மீண்டும் படியுங்கள். உங்களுக்குப் பிடித்த ஒற்றை ஆங்கில நூலை அடிக்கடி எடுத்துப் படித்தால் ஆங்கில

மொழியறிவு நன்கு வளரும். மற்ற நூல்கள் படிக்கும் போது கைகொடுக்கும்.

5. இந்திய ஆங்கில எழுத்தாளர்கள் (சேத்தன் பகத்) போன்றோர் எழுதியதில் கூடத் தொடங்கலாம். எந்தப் பெரிய மொழிப்புலமையும் இல்லாமல் சராசரி முக நூல் ஆங்கிலப் பதிவுகள் போல இருப்பதால், நம்மை மிரட்சியடையாமல் வைத்திருக்கும்.

ஆனால் அங்கேயே தேங்கி விடாதீர்கள். இரண்டொரு நூல் படித்ததும் நல்ல ஆங்கில எழுத்தாளரின் நூலுக்கு நகர்ந்துவிடுங்கள்.

6. தொடர் நூல்களைப் படிக்கலாம். கதாபாத்திரங்கள் கதைக்களம் எல்லாம் நமக்குப் பழகிவிடும். அதனால் தொடரின் அடுத்தடுத்த நூலுக்குப் போகும் போது மொழியில் கவனம் செலுத்தலாம்.

தொடர் என்பதால் அதன் மேல் நமக்குப் பிடிப்பும் இருக்கும். விடாமல் படித்து முடிப்போம்.

பள்ளி முடித்த காலத்தில் நானும் தொடங்கிய இடம் இது தான். ஆனால் பத்தாண்டாகள் கழித்து இன்று எவ்வளவு கடினமான ஆங்கில நூலாக இருந்தாலும் எளிதில் படிக்கும் அளவிற்கு வந்திருப்பதற்கு

ஒரே காரணம் தொடர்ந்து படிப்பது தான். அதனால் மனம் தளராமல் தொடர்ந்து படியுங்கள்.

உண்மையில் ஆங்கில நூல்களை நேரடியாகப் படிப்பது என்பது ஒரு அருமையான விசயம். எல்லா மொழி நூல்களும் ஆங்கிலத்திற்கு மொழிபெயர்த்து வருவதாலும் நிறைய நூல்கள் நேரடியாகப் பதிப்பிக்கப்படுவதாலும்,

ஆங்கிலத்தில் நமக்குப் பிடித்த நூல்கள் ஏராளம் இருக்கும். ஒரு புதையலைக் கண்டடைந்ததைப் போல உணர்வீர்கள். அதற்காகவேனும் மனம் தளராமல் தொடர்ந்து படித்துப் பாருங்கள்.

நான் பரிந்துரைக்கும் நூல்கள் சில:
குழந்தைகள்/ பதின்ம வயதினருக்கான நூல்கள்:
1. Harry Potter series
2. Hunger Games series
3. Masterminds series
4. Castle Glower series
5. Ice Dragon.

புனைவிலி நூல்கள்:
1. Sapiens.
2. Born a crime (Autobiography)
3. Educated (autobiography)
4. When breath becomes air (autobiography)

நாவல்கள்:
1. Sidney Sheldon
2. Khaled Hosseini
3. Nicholas Spark

எல்லாருக்கும் பொதுவான தொடக்க நூல் என்று எதுவுமில்லை. உங்களுக்கு ஏற்ற நூல் எதவென்று கண்டுபிடித்துத் தொடங்குங்கள். வாழ்த்துகள்!

Subhasini siva