Thread by @sejoalzir

HULA

Mother, apat na queen 'to. Humulbot ka ng isa. Ilalagay ko sa gitna ang pinili mo. Itong tatlo ay ibabalik ko sa deck. Babalasahin ko. Tatlong beses din.

Cut, Mother. Tatlong hanay ha. Ilalatag ko ang mga baraha nang pahaba. Kumuha ka ng pito. Take your time. Damhin mo.

Bubuksan ko na ang mga baraha. Uunahin ko ang una sa gitna. Naku, queen of spades. Nagluluksa ka. Itim kasi. Nasa taas ang tulis. Papunta sa leeg. Sa lalamunan na lagusan ng hininga. Kung tatagpasin o sasaksakin, may malalagutan ng hininga. Kamatayan agad ang ipinapakita sa akin.

Queen na heart ang dalangin ko para rebirth. Nasa baba kasi ang pantusok. Salungat siya sa baraha mo. Papunta sa puson. Sa sinapupunan kaya buhay ang kahulugan.

Magandang kulay din sana ang pulang nagbabadya ng paglaban. Bangis ng galit. Lakas ng sigaw. Pag-aalsa. Kabayanihan.

Bago tayo nagsimula, sinabi ko sa 'yo ang mga kahulugan ng apat na alas. Relasyon ang heart. Yaman ang diamond. Paglalakbay ang clover. Pagluluksa o kamatayan ang spade.

Dityo sa pitong barahang pinili mo, nasa gitna ang alas na spade. Kamatayan talaga ang 'yong ipinagluluksa.

Mga anak mo ba ang namatay? Mother, naririto lahat ang mga itim na jack. Mga anak ang sinisimbolo. Mga lalake man o babae. Namatay sila. Naglakbay. May otsong spade pa. Walang hanggan ang kahulugan niyan. Infinity kasi ang hugis ng eight. Hindi na po sila babalik magpakailanman.

May king na spade din. Hari ng kamatayan, ang tagapaslang. Siya ang dahilan kung bakit ka nagluluksa.

Mahirap basahin ang ten na heart na kadikit ng king. Puwedeng mga loyal na tauhan sila. Hindi laging romance ang heart. May relasyon din sa pagitan ng hari at mga nagpapaalipin.

Di ba sinabi ko kanina na yaman ang diamond? Heto ang pang-anim na baraha sa hanay, two na diamond. Dos ang pinakamababa sa lahat ng mga baraha. Mga mahihirap lang ang pinaslang ng hari, Mother. Patawad po kong deretsahan ang pagkasabi ko. Basta paghihikahos ang kahulugan niyan.

Seven na spade ang panghuli. Karit ang sinisimbolo niyan. Matalim. Madugo. Nananabas. Namumugot. Tungkod man ni kamatayan, ang aninong nakatalukbong, o tagdang panlipol ng pastol, ang hari ng lagim, sa mga tupang nakahanay papunta sa katayan. Ang saklap pala ng 'yong karanasan.

Paghahalu-haluin ko na ang lahat ng mga baraha. Babalasahin ko. Tatlong beses pa rin. Cut, Mother. Isang hanay pa para tatlo gaya ng dati. Kung lilitaw ang kahit anong queen, ikaw 'yan. Sana lang hindi na spade. Para may katapusan naman ang pagluluksa mo. Kailangan mo nang umasa.

Pumili ka ng siyam na barahang bubuksan ko. Sundin mo ang mga hatak nila. Kung nararamdaman mong tinatawag ka, 'yon ang piliin mo. Kung magaan sa loob mo, sunggaban mo. Kung maganda sa 'yong mga mata, hawakan mo sila. Puwede kang huminto para huminga o titigan mo ang mga baraha.

* Paglalakbay ang club.

Queen of spades agad, Mother. Ikaw 'yan. Hindi ko pa pala nasabi na bawat bulaklak sa mga baraha ay may mga magkakasalungat na kahulugan. Hindi lang yaman ang diamond. Inggit din ito. Ang heart ay sakit sa puso o kaba ng dibdib din. Ang club ay pagdudusa maliban sa paglalakbay.

Spade ka. Hindi lang 'yan kamatayan at pagluluksa. Puwede ring naghahanap ng pag-asa o naghahalungkat ng katotohanan. Pala kasi ang hitsura. Naghuhukay ng lalim. Nagpupunyagi para matagpuan ang nakabaon. Umaasa pa habang buhay. Hindi sumusuko hanggang wala nang hininga. 'Yan ka.

Ano 'tong tres na heart na nakasunod? Love triangle ang basa ko. Nahahati ang puso mo. May nauna pero may nagkagustong iba. Magaan ang loob mo sa dati. Nagdududa ka sa ngayon.

Mahilig sa pula ang third party, ang karelasyon mo ngayon. Mapanlinlang siya. Puro pangako. May balak.

'Yong una mong karelasyon ay may tatlong letra ang pangalan. Nawawalan na ng gana sa 'yo. Madali ka kasing linlangin. Binibigay niya ang hinihingi mo dahil naaawa pero sa pangalawa ka kumakapit kahit pulubing nililimusan ang tingin sa 'yo at ginagawa ka pang bulag para paglaruan.

Ay naku, naririyan na naman ang hari ng kamatayan, king na spade. Siya ba ang nagtatago ng mga katotohanang hinahanap mo? Siya rin ang tagalinlang. Naniniwala ka ngunit pinaaasa ka lang. Bugaw mo ba siya, Mother? Patay na nga ang mga hikahos na anak mo, pinagagahasa ka pa niya.

Alas na club. Hugis-malunggay. Paglalakbay. Pagdudusa. Banyagang nagdudulot ng mga pasakit. Sino siya? Alas na diamond pa ang sunod. Mayaman at may ninanasa ang mga mata. Dayuhan ba ang mahilig sa pula na naglalayag sa karagatan? Siya ba ang nirereto sa 'yo ng haring mamatay-tao?

Nagpaparamdam na naman ang ace of spades. Kamatayan, paghahanap ng katotohanan, at pag-asa. May ugnayan ang karelasyon mo ngayon sa paghahari ng berdugong bugaw. Pinapakita ng mga baraha ang pang-uuto at pagsisinungaling nila sa 'yo. May mga perlas ba sa pusod mo? Baka nakawin.

Hindi ba binalasa ko nang maigi? Bakit ganito ang mga baraha? Magkakasunod ang tatlong sais, ang marka ng demonyo. Hindi magsisinungaling ang mga numero. Ang santo ay santo. Ang anghel ay anghel. Mga demonyo sila. May mga sungay ang kayakap mo. Bakit hindi ka takot? Nagayuma ka?

Sais na spade, sais na club at sais na diamond. Ang sisiba nila. Ang gaganid. Tingnan mo ang mga tiyan. Mga lobo. Lamon nang lamon. Walang mga puwet para sa dumi. Pati ebak, nasasayangan silang iire. Hindi nabubusog ang mga demonyo. Pati ikaw ay kakainin nila. Magduda ka, Mother.

Ano ba ang meron ka? Bakit gusto kang pagkaitan kahit gutom ka? May agimat ka ba sa sinapupunan mo? Bakit gusto nilang kalkalin? Ano ang anting-anting mo sa 'yong tumbong? Bakit parang gusto ka nilang hubaran? Ginto ba ang saplot mo? Paano ka nila pinagkakaperahan? Puta ka ba?

Last reading na 'to ha? Mag-focus ulit. Sabayan mo ang lukso ng 'yong dibdib. Pumili ka ng labing-dalawang baraha. Kung may mararamdaman kang mga maiinit, sila ang hulbutin mo sa mga nakahanay. Kung gusto mo, isara mo ang mga talukap ng 'yong mga mata para. Hayaan mo ang tadhana.

Isa, dalawa, tatlo, apat, lima, anim, pito, walo, siyam, sampu, labing-isa, labing-dalawa. Sakto. Twelve cards. Huminga ka nang malalim. Hinga ka pa. 'Yong parang sisisirin mo ang lalim ng dagat. Huwag matakot. Buhay mo ang binabasa ko. Mga karanasang malalagpasan mo. Buhay ka.

Teka, sasagutin ko muna ang tanong mo. Bakit parehong lalake at babae and jack kung lalake naman ang hitsura nito. 'Yan ang sinabi mo kanina, di ba?

Sa baraha ko, walang bigote ang mga jack kaya puwedeng Jack o Jill ang mga barahang 'yan. Isa pa, ama ang king at ina ang queen.

Lumalabas ang apat na Jack, Mother. Isa-isahin natin. Jack na club. May mga anak ka ba sa labas ng bansa na naghihirap? Sa Middle East ba? Apektado ba sila ng pandemya? Binubugbog ng mga amo? Ginagahasa? Binabarat? Namumulot ng basura? Ang club kasi ay paglalakbay at pagdudusa.

Jack na spade. Alam mo na ang kuwentong 'yan. Mga anak mong pinaslang. Hindi mo pa alam ang mga dahilan. Hanggang ngayon ay naghahanap ka ng katarungan. Nakamaskara ba ang mga salarin? Nakapeluka? Nakamotor o naka-van? Gabi ba ang pagbitag sa kanila? Ah, wala kang alam. Sorry po.

Diyos ko, may jack na diamond. May mga anak kang yumayaman sa pagluluksa mo. Sawa na sila sa kahirapan. Dahil sa inggit nila sa mga mayayaman, nangangarap at kumakapit sa patalim. Nagpapaalipin sa haring berdugo. Tagapalakpak. Tagapaslang din. Taganakaw. Tagasalo pa ng kasalanan.

Thank you, Lord. May mga anak kang hindi salbahe. Malinis ang kalooban. Wagas ang pagmamahal sa 'yo. Kahit ang hirap mong mahalin at masakit ka sa dibdib, tapat pa rin sila sa 'yo. Jack na heart kasi. Mga tagadepensa mo sila. Hindi po mga bayaran. Sumisigaw. Nag-aalsa. Lumalaban.

Ayaw talaga paawat. Magkasama pa. King at alas. Puro spade. Pinaliwanag ko na 'yan sa 'yo. Parang nagbibigay ng diin ang mga baraha. Animo'y sumisigaw na mamatay-tao ang hari. Tila ipinamumukha sa 'yo na gumising ka na. Palayain ang utak mo. Magtanong. Magduda. Umayaw. Humindi.

Medyo malalalim itong singko, nuwebe, at siete na puro club. Tungkol pa rin sa mga OFW na anak mo. May butas ang tiyan ng singko. Walang laman. Nagugutom sila. Nakikita ng third eye ko ang mga latang prutas, mga butu-butong may dumi, at mga pagkaing panis na. Nasa basurahan sila.

Malaking bukol ang ulo ng nuwebe. May pigsa sa utak. Paputok na ang isipan. Puno ng ligalig. Binabagabag. Hirap na hirap. Binabalisa. Nababaliw.

May siete pang nakakarimarim ang kahulugan. Pagbibigti. Pagpapatiwakal. Pagkitil ng sariling buhay. Naglakbay pala para lang magdusa.

May kuwatro pa. Malunggay rin, ang libreng pagkain ng mga naghihirap. Hindi lang pala mga OFW. Pati sa bansa ay may mga nagugutom, nababaliw, at nagpapakamatay. Laganap ang mga pangyayaring 'yan. Kahit saan sa apat na direksiyon. Mother, hindi mo ba nakikita ang mga nakikita ko?

Last two cards na po. Ang ganda. Nagpapaluwag ng damdamin. Huminga ka. Hindi pala habambuhay ang pagluluksa mo. May katapusan din ang kahirapan. Papalitan ang kabaliwan ng tunay na ligaya, ngiti at tawa. Mapapawi ang uhaw at gutom. Wala nang magpapakamatay dahil pagod na sa dusa.

Alas na diamond. Yaman. Kaginhawaan. Queen na heart. Ang bagong reyna. Ang tagapagligtas. Iaahon ka niya mula sa putikan at bugawan. Hindi ka na magpapalimos. Wala nang gagahasa sa 'yo. Hindi ka na iiyak nang tuyo ang mga mata. Wala nang palahaw na pipigilan ng tikom mong bibig.

Siya ang tutulong sa 'yo para mahanap ang hindi mo pa natatagpuan. May matres siya. Alam niya ang hapdi ng 'yong sinapupunan. Siya ang pipigil sa daloy ng dugo sa lansangan. Gagawin niyang purol ang patalim. Liliko na ang bala. Wala nang lulunurin ang bato. Luluwang na ang lubid.

Wait lang, Mother. Hindi pa po ako tapos. Nakikita mo ba 'yong kahon ng mga baraha? May dalawang joker sa loob. Sila ang pipigil sa 'yong kaligtasan. Sila ang balakid ng 'yong ikagiginhawa. Sila ang nagpapatakbo ng sirko at nagpapaikot ng mga tao. Mga payaso ng lagim at ligalig.

Ito lang ang mga maipapayo ko sa 'yo. Huwag ka nang magmumog ng gasolina at bumuga ng apoy. Tigilan na ang pagsasayaw sa alambre. Huwag ka nang tumambling sa mga sipol nila. Ihinto na ang paglunok ng espada. Mother, magising ka na. Mapagod na. Mamulat ka. Palayain na ang sarili.

Tapos.