Thread by @Avvaitweets

ஒரு ஏழைச்சிறுவன் வீடுவீடாகச் சென்று,தேவைப்பட்ட பொருள்களை, பலருக்கும் விற்று சிறிது காசு சம்பாதித்தான்.கிடைக்கும் காசை வைத்து தன் பள்ளிக்கூட கட்டணத்தைக் கட்டினான். புத்தகங்களையும் தானே வாங்கினான்.ஒருநாள் விற்றுக்கொண்டிருக்கும்போது, சிறுவனுக்கு அதீத பசி எடுத்தது.ஆனால் அவன் கையிலோ

சிறிது காசே இருந்தது. தான் செல்லவிருக்கும் அடுத்த வீட்டில் அந்த காசைக்கொடுத்து ஏதேனும் வாங்கி உண்ணலாம் என்று முடிவு செய்தான்.ஆனால் அடுத்த வீட்டின் கதவைத் தட்டியபோது வெளியே வந்த அழகிய இளம் பெண்ணைப் பார்த்து அவன் தயங்கினான். தான் கேட்க நினைத்ததைக் கேட்க அவனால் முடியவில்லை.

ஆனால் பசியோ பசி.ஒரு டம்ளர் தண்ணீர் தருமாறு கேட்டான் அவன்.
அந்த இளம்பெண் அவன் முகம் வாடியிருப்பதைப் பார்த்து அவன் அளவற்ற பசியால் துடிக்கிறான் என்பதை உணர்ந்தாள்.ஆகவே தண்ணீருக்கு பதிலாக ஒரு பெரிய டம்ளரில் பாலைக் கொண்டுவந்து கொடுத்தாள்.மெதுவாக அதைக் குடித்த அந்தச் சிறுவன்,

“நான் இந்த பாலுக்காக எவ்வளவு கொடுக்க வேண்டும்?” என்று அந்தப் பெண்ணிடம் கேட்டான்.“எனக்கு ஒன்றும் தர வேண்டாம். அன்பினால் செய்யும் காரியத்திற்கு விலை பேசக்கூடாது என்று என் அம்மா எனக்குக் கற்றுக் கொடுத்திருக்கிறாள்” என்றாள் அவள்.
“அப்படியானால் என் இதயத்தின் ஆழத்திலிருந்து உங்களுக்கு

என் நன்றியைத் தெரிவித்துக் கொள்கிறேன்” என்றான் அந்தச் சிறுவன்.அந்தச் சிறுவனின் பெயர் ஹோவர்ட் கெல்லி. அந்த வீட்டைவிட்டு வெளியேறும் போது ஒரு புத்துணர்ச்சியைப் பெற்றான் அவன்.கடவுள் மேலும்,மனிதாபிமானம் மேலும் அவனுக்கு இருந்த நம்பிக்கைக் கூடியது.ஒரு தக்க தருணத்தில் இப்படி ஒரு அன்பை

காட்டிய பெண்மணி அவனுக்கு வாழ்க்கையில் ஒரு புதிய பாடத்தைக் கற்றுக் கொடுத்தாள்.வருடங்கள் ஓடின.அவன் ஒரு பெரிய டாக்டராக ஆனான்.பெயரும் புகழும் பெற்றான்.ஒருநாள் எந்த இளம் பெண் அவனுக்குப் பாலை வழங்கினாளோ,அவளுக்கு கடுமையான நோய் ஒன்று வந்தது.அவள் வசித்து வந்த ஊரில் உள்ள டாக்டர்கள்

திகைத்தனர்.அதை குணப்படுத்த அவர்களால் முடியவில்லை.
அவர்கள் நகருக்குச் சென்று டாக்டர் ஹோவர்ட் கெல்லியை பார்க்குமாறு ஆலோசனைக் கூறினர்.அந்தப் பெண்ணும் ஸ்பெஷலிஸ்டான ஹோவர்ட் கெல்லியை பார்க்கச் சென்றாள்.அந்தப் பெண் எந்த ஊரிலிருந்து வந்திருக்கிறாள் என்பதைக் கேட்டவுடன் கெல்லியின் கண்கள்

பளபளத்தன. நேராக நோயாளி இருந்த இடத்திற்கு விரைந்து சென்றார். ஆம்,அதே பெண்தான்! அவர் நன்றாக அடையாளம் கண்டுக்கொண்டார்.உடனடியாக சிகிச்சையைத் தொடங்கினார். எப்பாடு பட்டேனும் அவளைக் காப்பாற்றுவது என்று உறுதி பூண்டார்.
பெரும்பாடுபட்டு கடைசியாக அவர் வென்றார்.அந்தப்பெண் பூரண குணமடைந்தாள்.

கெல்லி அவர்கள்,அக்கவுண்ட்ஸ் பிரிவின் அதிகாரிக்கு,அந்த பெண்மணிக்கு ஆன செலவுக்கான பில்லை, தனக்கு அனுப்பச் சொன்னார்.அக்கவுண்ட்ஸ் பிரிவும் அவரது அங்கீகாரத்திற்காக அந்த பில்லை அவரிடம் அனுப்பியது.அந்தப் பில்லைப் பார்த்தார் அவர்.பெருந்தொகை தான்.அந்த பில்லின் கீழே கோடியில் சில

வார்த்தைகளை அவர் எழுதி, பில்லை அந்த பெண்ணிடம் அனுப்பச்சொன்னார். அந்தப் பெண்மணி நடுநடுங்கிக் கொண்டிருந்தாள் பில்லை நினைத்து. இந்த ஜென்மத்தில் அந்த பில் தொகையை தன்னால் கட்ட முடியுமா என்பதே அவள் பயம்.
அந்த பில்லை வாங்கிப் பார்த்தாள்.அடேயப்பா எவ்வளவு ரூபாய்,வாயடைந்துப்போனாள்.

ஆனால் பில்லின் அடியில் ஓரத்தில் எழுதப்பட்ட வார்த்தைகள் அவள் கவனத்தை ஈர்க்கவே அவள் அதைப் படித்தாள்...

"ஒரு டம்ளர் பாலால், பில் முழுவதும் கட்டப்பட்டது."
கையொப்பம்: ஹோவர்ட் கெல்லி.

அந்த பெண்மணியின் கண்களில் நீர் வந்தது.அவள் ஹோவர்ட் கெல்லி யார் என்பதை இப்போது தெரிந்துக்கொண்டாள்.

(இந்தக்கதை உண்மையில் நடந்தது என்று கூறப்படுகிறது).