Thread by @Aabi_Kausar

ایک بچہ جو من کا راجہ تھا دلوں کا راجہ بنتا ہے

ایک بچہ پرائمری سکول لائف میں پڑھائ سے جی چرا چرا کر والدین کو پریشان کرتا رہتا ہے۔ پھر ایلیمنٹری اور سیکنڈری سکول لائف میں تھوڑا سنبھل کر پڑھتا ہے تو کاروباری باپ اس کو مستقبل میں اپنے بزنس ایمپائر کا شہنشاہ بنانے کے لیے

کاروباری تعلیم دلوانے انگلستان بھیجتا ہے مگر انگلستان پہنچ کر اس من موجی لڑکے کو جو حقیقی معنوں میں من کا راجہ تھا اور جسے مستقبل میں کروڑوں دلوں پر راج کرنا تھا کو خوبئ قسمت سے ایسے دوست مل جاتے ہیں جو اسے بار بار برطانوی پارلیمنٹ کی سیر کرانے لے جاتے ہیں ۔

پھر برطانوی پارلیمنٹ میں قانون ساز پارلیمینٹیرینز کے باوقار انداز نشست و گفتار کو دیکھ کر ایسا متاثر ہو جاتا ہے کہ کاروباری تعلیم کو خیر باد کہ کر قانونی تعلیم کے حصول کی راہ پر نکل جاتا ہے پھر وہ لڑکا انگلستان سے ساہوکار محمد علی کی بجائے بیریسٹر محمد علی جناح بن کر واپس آتا ہے۔

پھر وہی من کا راجہ محمد علی جناح برصغیر کے لاکھوں مسلمانوں کے دلوں پر راج کرتا کرتا قائد اعظم محمد علی جناح بن جاتا ہے۔
ملت کا پاسباں ہے محمد علی جناح
ملت کا جسم و جاں ہے محمد علی جناح
یہ ہوتا ہے ماحول کا اثر ۔ آج ہمارے بچے بھی پڑھائی سے جی چراتے ہیں تو اس میں بچوں سے زیادہ

والدین کی غلط ترجیحات ،اساتذہ کے ناقص انداز تدریس اور صحتمند ماحول کے فقدان کو زیادہ دخل ہوتا ہے۔ جناب قائد اعظم محمد علی جناح کی زندگی سے والدین اور اساتذہ کو خصوصی طور پر سبق لینے کی ضرورت ہے۔ میں بحیثیت معلم تاریخ ساز شخصیات کی زندگیوں کے اسی پہلو کو زیادہ دیکھتا ہوں۔

آج ہمارے معاشرے میں بھی سینکڑوں ذھین و فطین محمد علی والدین کی غلط ترجیحات ، سکولوں میں اساتذہ کے ناقص انداز تدریس اور مؤثر تربیتی ماحول نہ ملنے کے سبب جناح بننے سے قاصر ہیں۔ ہمارے آج کل کے تعلیمی اداروں اور اساتذہ پر شاعر کا یہ شعر صادق آتا ہے:
میراث میں ملی ہے ان کو مسند ارشاد

زاغوں کے تصرف میں عقابوں کا نشیمن
قائداعظم محمدعلی جناح خالصتا جمہوری اور سیکولر سوچ کے حامل ایک لبرل سیاسی رہنما تھے۔ جناب محمد علی جناح کے نزدیک پاکستان کے حصول کا مقصد مسلمانان برصغیر کو مساوات پر مبنی معاشی نظام سے مستفید کرانا تھا۔ انکا مطمع نظر سٹیریو ٹائپ(stereotype) کا

کوئی مسلمان معاشرہ بنانا نہیں تھا۔ انہوں نے ایک بڑے جلسہ عام میں نواب حبیب الرحمٰن خان شیروانی بمعروف نواب صدریار بہادر یار جنگ سے جلسے کے تمام حاضرین کے سامنے وعدہ کیا تھا کہ پاکستان کا معاشی نظام سوشلزم ہو گا۔ واضح رہے کہ یہ وہی صدر یار بہادر یار جنگ تھے جنہوں نے اللہ سے اپنی

بقایا عمر قائد اعظم محمد علی جناح کو بخشنے کی دعا کی تھی۔ بابائے قوم محمد علی جناح کے ساتھ سب سے بڑا ظلم یہ ہوا ہے کہ آپ جیسی ایک لبرل اور سیکولر شخصیت کو ایک روحانی و خوابی شخصیت بنا دیا گیا ہے۔ جو شخصیت خود کسی تقدس کی قائل نہیں تھی اسے تقدس کا ایک ایسا لباس پہنا دیا گیا ہے کہ

اس لباس میں ہمیں لبرل ،سیکولر اور روشن خیال مسٹر محمد علی جناح کی جگہ غوث زمان،قطب عالم ،حضرت مخدوم محمد علی جناح نظر آتا ہے۔
پھر محمد علی جناح کی بنائی ہوئی مملکت کا جو حشر ہماری قوم نے کیا ہے وہ ایک الگ ہوش ربا داستان ہے۔دساتیر سے پالیسیوں تک میں ہم نے جو ڈنڈیاں ماری ہیں وہ

محمدعلی جناح کی روح کو اذیت رسانی کی ایک طویل داستان ہے۔ قائد کے فرمان "اتحاد ،ایمان اور تنظیم" کو ہم نے فرقہ واریت، کرپشن اور انتشار میں بدل کر رکھ دیا جبکہ انکی نصیحت "کام،کام اور صرف کام"کو ہماری چھٹیوں کی دلدادہ کام چور قوم نے چھٹی،چھٹی اور صرف چھٹی" میں بدل کے رکھ دیا ہے۔

آخر میں میں بابائے قوم کی ولادت باسعادت کے اس پر مسرت موقع پر پوری قوم کو ہدیہ تبریک پیش کرتا ہوں اور دعا کرتا ہوں کہ اللہ ہمیں پاکستان کو قائد اعظم کی امنگوں کا پاکستان بنانے کی ہمت اور توفیق دے۔ آمین۔

#قلمکار