Thread by @anbezhil12

#வடுவூர்_கோதண்டராமர்_கோவில் இந்தக் கோவில் உத்சவர் விக்கிரகம், ஸ்ரீராமரே உருவாக்கித் தந்தருளிய விக்கிரகம் என்கிறது புராணம். இந்த ராமனைக் காணக் கண் கோடி வேண்டும். பேரழகு வாய்ந்த ராமர். அழகுக்கே அழகு சேர்க்கும் ராமர். சேவித்துக்கொண்டே இருக்கலாம். பார்த்தவர் மயங்கும் அழகு! மந்தகாசப்

புன்னகை! இது போன்ற தத்ரூபமான புன்னகையை வேறு எங்குமே காண முடியாது. வில்லினைப் பிடித்திருக்கும் அழகு அதி ஆச்சர்யம்!
“மையோ, மரகதமோ, மறிகடலோ, மழை முகிலோ,
ஐயோ, இவன் வடிவு! என்பது ஓர் அழியா அழகு உடையான்”
என்ற கம்பரின் வரிகள் நினைவுக்கு வருகிறது. ஸ்ரீராமனை முழுவதுமாக துதிக்கமுடியாமல்

தன்னுடைய இயலாமையை ‘ஐயோ’ என்ற பதத்தால் கம்பரே வெளிப்படுத்தி இருக்கும்போது நாம் எம்மாத்திரம்! கண்ணுக்கினியானை கண்டோம்! என்று மெய்சிலிர்க்க மட்டுமே முடியும். இராமரின் வனவாசம் முடிந்த பிறகு அவர் வாக்குக் கொடுத்தபடி பாரத்வாஜ முனிவர் ஆசிரமத்திற்கு வந்து அவரின் உபசரிப்பை ஏற்றுக்

கொண்டார். ராமரையும் அவரின் குண மாண்புகளையும் கண்டு சிலிர்த்த அங்கு கூடியிருந்த ரிஷிகள், முனிவர்கள் அவர்களுடேனேயே ஆஸ்ரமத்தில் தங்கி இருக்க வேண்டினர். உதாரண புருஷர் நீங்கள் என வணங்கிப் போற்றினர். ஆனால் வந்திருப்பது இறைவன், இவர் எடுத்திருப்பது அவதாரம் என்பதை அவர்கள் அறியவில்லை. அவர்

அயோத்தி திரும்ப வேண்டும் என்று சொல்லி கிளம்பும்போது அவர்களால் அவரை விட்டு பிரிய மனமில்லை. மிகவும் வருந்தினர். அவர் கிளம்பும் சமயம் அங்கே அழகும் கம்பீரமும் கொண்டு ராமரைப் போலவே நின்றது சிலை ஒன்று! அப்படியே தத்ரூபமாக இருந்தது சிலை. பிரமித்துப் போனார்கள் முனிவர்கள். தொட்டு, தடவி

மகிழ்ந்தனர். உங்களுக்காக என் உருவத்தை நானே சிலையாக உருவாக்கியுள்ளேன். பிரிவுத் துயர் இனி இல்லை. இந்தச் சிலையிலும் நான் வாசம் செய்கிறேன் என அவர்களுக்கு அருளினார். அனைவரும் விழுந்து நமஸ்கரித்து இராமபிரானின் ஆசி பெற்றனர். அந்த விக்ரகத்தை திருக்கண்ணப்புரத்தில் ராமர் சன்னிதியில்

பிரதிஷ்டை செய்து நீண்டகாலம் வழிபட்டு வந்திருக்கிறார்கள். அதனால்தான் திருக்கண்ணப்புரம் பெருமாளை பாடிய குலசேகர ஆழ்வார், இந்த ராமனை மனதில் கொண்டு, தனது பெருமாள் திருமொழியில் ‘மன்னுபுகழ் என்ற எட்டாம் திருமொழியில், சிலை வளைத்தாய், சிலைவலவர், ஏமருவுஞ்சிலை வலவா, வளையவொரு சிலை அதனால்,

'ஏவரி வெஞ்சலை வலவா’ என பாடியுள்ளார். ஸ்ரீ சவுரிராஜனாகிய கண்ணபிரான் எழுந்தருளியிருக்கும் திருக்கோவிலில் கிளைச்சன்னிதியில் ராமன் இருந்ததால் இப்பதிகத்தை அவர்பாடினார். இந்த ராமர் விக்ரகம் ஒரு காலத்தில் அங்கிருந்து அகற்றப்பட்டு திருவாரூர் மாவட்டம் திருத்துறைப் பூண்டிக்கு அருகிலுள்ள தல

ஞாயிறு என்ற ஊரில்மரத்தடியில், சீதை, லட்சுமணன், பரதன், அனுமன் விக்ரகங்கள் மண்ணுக்கடியில் மறைத்து வைக்கப்பட்டன. பல ஆண்டுகளுக்கு பிறகு தஞ்சையை ஆண்ட மராட்டிய மன்னரின் கனவில், பெருமாள் சென்று தான் தலைஞாயிறு அருகே மண்ணுக்கடியில் புதையுண்டு கிடப்பதாகவும், அதை வெளியில் எடுத்து கோவில்

கட்டி, ஆராதனை செய்யும்படி உத்தரவிட்டார். அதன்படியே மன்னரும் குறிப்பிட்ட இடத்திற்குச் சென்று விக்ரகங்களை மண்ணில் இருந்து வெளியே எடுத்தார். அப்போது அந்த ஊர் மக்கள் திரண்டு வந்து, சிலைகளை அங்கிருந்து எடுத்துச்செல்ல கடும் எதிர்ப்பு தெரிவித்தனர். உடனே லட்சுமணன், பரதன், சிலைகளை மன்னர்

அவர்களிடம் கொடுத்து அவர்களை சமாதானப்படுத்தி, ஸ்ரீ கோதண்டராமர், சீதை, அனுமன் சிலைகளை பல்லக்கில் எடுத்துக்கொண்டு வந்தார். அந்த சிலைகளை தஞ்சையில் பிரதிஷ்டை செய்ய எண்ணி கொண்டு வரும் வழியில் வடுவூர் வந்தபோது நள்ளிரவு ஆகிவிட்டது. அங்கு தங்கி இளைப்பாறி, விக்ரகங்களை வடுவூர் கோவிலில்

வைத்து இருந்தார். இந்த எழிலார்ந்த விக்ரகங்களை கண்ட அவ்வூர் மக்கள் அவற்றை வடுவூரிலேயே பிரதிஷ்டை செய்யவேண்டும் என்று மன்னரிடம் கேட்டுக்கொண்டனர். விக்ரகங்களை மன்னர் மீறி எடுத்து சென்றால், தாங்கள் அனைவரும் உயிரை மாய்த்து கொள்வதாக கூறினர். உடனே மன்னனும் மனமுவந்து அந்த விக்ரகங்களை

அங்கேயே பிரதிஷ்டை செய்தார். பின்னர் லட்சுமணன் விக்ரகத்தையும் புதிதாக செய்தனர். வடுவூர் ஸ்ரீ கோதண்டராம சுவாமி கோவில் திருவாரூர் மாவட்டம் மன்னார்குடியில் இருந்து 13 கிலோ மீட்டர் தூரத்திலும், தஞ்சையில் இருந்து 20 கிலோ மீட்டர் தூரத்திலும் உள்ளது. தஞ்சாவூரில் இருந்து மன்னார்குடி

செல்லும் பஸ்சில் சென்றால் 40 நிமிட பயண தூரத்தில் வடுவூரை அடையலாம். ஶ்ரீ கோதண்டராமர் கோவில், #பஞ்ச_ராம_க்ஷேத்திரங்களில் ஒன்று. அபிமான ஸ்தலம். தக்ஷிண அயோத்தி. ஒரு காலத்தில் மகிழ மரங்கள் நிறைந்து காணப்பட்டதால் வடுவூர் வகுளாரண்ய க்ஷேத்ரம் என்றும் பாஸ்கர ஷேத்திரம் என்றும் பெயர்.

ஐந்து நிலை ராஜ கோபுரம். மூலவராக கோதண்டராமர், சீதாதேவியுடன் திருக்கல்யாண கோலத்தில் லக்ஷ்மணர், அனுமாருடன் எழுந்தருளி உள்ளார். கோவிலுக்கு அருகே சரயுபுஷ்கரணி உள்ளது. ஸ்ரீ ராமநவமி விழா 10 நாட்கள் பிரமோற்சவத்துடன் விமரிசையாக கொண்டாடப்படும். அப்போது நடைபெறும் திருக்கல்யாண உற்சவத்தை

பார்ப்பவர்களுக்கு திருமணம் விரைவில் நடைபெறும் என்பது நம்பிக்கை. கோவிலில் உள்ள ஊஞ்சல் மண்டபத்தில் தை மாதம் வெள்ளிக்கிழமைகளில் தாயார் எழுந்தருளி சேவை தருவது வழக்கம். ஆடிப்பூரம், கனுப்பண்டிகை நாட்களில் தாயார் ஊஞ்சல் உற்சவம் இங்கு நடக்கும். சித்திரை மாதம் அட்சயதிரிதியை, ஆடிமாதம்

ஆற்றங்கரையில் தீர்த்தவாரி, புரட்டாசியில் தேசிகன் உற்சவம், நவராத்திரி, வைகுண்ட ஏகாதசி, தை அமாவாசை தீர்த்தவாரி, மாசிமகம், ஆகியவை முக்கிய உத்சவங்கள்.
வடுவூர் சிலையழகு,மன்னார்குடி மதிலழகு, திருவாரூர் தேரழகு என்பர்.
சென்று சேவித்து வருவோம்.

ஸ்ரீராம ராம ராமேதி ரமே ராமே மனோரமே!
சஹஸ்ரநாம தத்துல்யம் ராம நாம வராநனே!
ஜய ஸ்ரீராம்

சர்வம் ஸ்ரீ கிருஷ்ணார்ப்பணம்🙏🏾