Thread by @anbezhil12

#மணிமூர்த்தீஸ்வரம்
#உச்சிஷ்டகணபதி #பிள்ளையார்சதுர்த்தி_ஸ்பெஷல்
தாமிரபரணி ஆற்றங்கரையில் எழுந்தருளியுள்ளது மணிமூர்த்தீஸ்வரம் உச்சிஷ்ட கணபதி ஆலயம். இக்கோயில், சுமார் 800 ஆண்டுகள் பழமை வாய்ந்தது. இங்கு விநாயகர் தன்னுடைய 32 திருத்தோற்றங்களில் 8வது வடிவமாக போற்றப் படுகின்ற உச்சிஷ்ட

கணபதியாக அவதரித்து அருள் பாலித்து வருகிறார். ஜீவநதியான தாமிரபரணி கரையில் 5 நிலை ராஜகோபுரத்துடன் எட்டு மண்டபங்கள், 3 பிராகாரங்கள், கொடிமரத்துடன் கூடிய சுமார் ஒரு ஏக்கர் பரப்பளவில் ஆசியாவிலேயே மிகப் பெரிய மூலவராக விநாயகர் எழுந்தருளியுள்ள தனித்திருக்கோயில் இது. இக் கோவிலுக்குள்

நுழைந்தால் பலி பீடம், கொடி மரம் தாண்டி விநாயகரின் மூஷிக வாகனம் இருக்கிறது. அதனை தாண்டி உள்ளே நுழைந்தால் நேராக கருவறை. கருவறையில் உச்சிஷ்ட கணபதியும் அவருக்கு அடுத்த தனி சன்னதியில் நெல்லையப்பரும் காட்சித் தருகிறார்கள். திருக்கோவில் உள் சுற்று பிரகாரத்தில் 32 விநாயகரின் சன்னதிகள்,

தட்சிணாமூர்த்தி, சண்டிகேசுவரர், காந்திமதி அம்மை சன்னதி மற்றும் சித்தர்களின் ஜீவ சமாதியும் இருக்கின்றன.
#ஹேரண்ட_மகரிஷி கலியுகத்தில் விநாயகரைப் பற்றிப் போதிக்க முதல் மகரிஷியைத் தென்நாட்டுக்கு அனுப்பிய சீடர்களில் ஒருவராகிய ஹேரண்ட மகரிஷியால் பிரதிஷ்டை செய்யப்பட்ட பெருமையும் இத்தல

மூலவர் உச்சிஷ்ட கணபதிக்கு உண்டு. இங்கு அவர், கருவறையில் அம்பாளை மடியில் தாங்கிக் காட்சி தருகிறார். அவரது மடியில் வீற்றிருக்கும் ‘நீலவாணி' அம்பாளும் முப்பெரும் தேவியரின் அம்சமாகக் கருதப்படுகிறார். முற்காலத்தில் வித்யாகரன் என்னும் அசுரன் நான்முகனை வேண்டி கடுமையான தவம் புரிந்தான்.

அவனுடைய தவத்திற்கு இறங்கிய பிரம்ம தேவரிடம் தனக்கு அழிவே இல்லாதபடி 'தனக்கு மனிதனாலோ, மிருகங்களாலோ, அகோரமானவர்களாலோ அழிவு இருக்கக் கூடாது. தன்னை அழிப்பவன் தேவ அசுர சபைகளின் முன்பு யாருடைய உதவியும் இல்லாமல் தன்னுடன் போர் புரிய வேண்டும் என்றும், அதே நேரம் அவன், ஒரு பெண்ணோடு இணைந்த

கோலத்தில் இருக்க வேண்டும்’ என கேட்கிறான். பிரம்ம தேவரும் அவ்வாறே ஆகட்டும் என வரமளித்து விடுகிறார். அவனுடைய எண்ணமானது அப்படி ஒரு நிலையில் தன்னை யாரும் எதிர்க்க வர மாட்டார்கள் என்பதே ஆகும். அடுத்து வரத்தை பெற்ற வித்யாகரன் சும்மா இருப்பானா?, தன்னை வெல்ல யாரும் இல்லை, தனக்கு அழிவே

இல்லை என்ற தலைக் கனத்துடன் வானுலகத்து தேவர்கள், முனிவர்கள் எல்லோரையும் அடிமைப்படுத்தி சித்ரவதை செய்து வந்தான். இதனை பொறுத்துக் கொள்ள முடியாத அனைவரும் ஒன்று கூடி மும்மூர்த்திகளிடம் முறையிட்டனர். பின்னர் அவர்களின் ஆலோசனைப்படி தேவர்கள் அசுரர்களை அழிக்க விநாயகப் பெருமானை வேண்டி மிகப்

பெரிய யாகம் ஒன்றை நடத்தினார்கள். அவர்களின் யாகத்தை ஏற்ற விநாயகப் பெருமான் அந்த யாக குண்ட அக்னியிலிருந்து கோடி சூர்ய பிரகாசம் கொண்டவராய் தோன்றினார். அது போல பூவுலகத்தில் பிரம்மாவின் ஆலோசனைப்படி பதங்க முனிவர் தலைமையில் அனைத்து முனிவர்களும் ஒரு யாகத்தை நடத்திட அந்த யாக குண்டத்தில்

இருந்து நீலவேணி என்னும் சக்தி வெளிப்பட்டாள். பின்னர் அக்னியில் தோன்றிய விநாயகருக்கு, நீலவேணி தேவியை திருமணம் செய்து வைத்தனர். இதன் பிறகு தேவர்களின் தலைவனான இந்திரனை வித்யாகரனை போருக்கு அழைத்திடும்படி கூறினர் மும்மூர்த்திகள். அவ்வாறே இந்திரனும் வித்யாதரனை போருக்கு அழைத்தான்.

வித்யாகரன் கடுங் கோபத்தோடு போர்க் களத்திற்கு வந்தான். போருக்கு வந்த போது விநாயகர், தனது மனைவியான நீலவேணியை தன் மடி மீது அமர்த்திய நிலையில், தன் இரு கைகளால் அணைத்து, துதிக்கையை தேவியின் மடியில் வைத்தபடி இருக்க, அந்த நேரத்தில் வித்யாதரன் அங்கு வந்து தொந்தரவு செய்திட வெகுண்டெழுந்த

விநாயகப் பெருமான், தன் தேவியோடு மகிழ்ந்திருந்த நிலையிலேயே கோடி சூர்ய பிரகாசத்தோடு அவனை உற்று நோக்க, அந்த ஒளிக் கதிரின் வீச்சு தாங்காமல் வித்யாகரன் பொசுங்கி விடுகிறான். விதுயாகரனின் அழிவை கண்ட தேவர்கள் வானிலிருந்து பூ மழை பொழிந்து, விநாயகப் பெருமானை துதித்தார்கள். இங்கு மூன்று

சித்தர்கள் ஜீவ சமாதி அடைந்துள்ளனர். சண்டிகேசுவரர் சன்னதியிலும் விநாயகரே சண்டிகேசுவரராக காட்சியளிக்கிறார். சித்திரை மாதம் முதல் நாள் அதிகாலை சூரியனின் ஒளிக் கதிர்கள் மூலவர் உச்சிஷ்ட கணபதி மீது விழுகிறது. திருமணத் தடை நீங்குவதற்கும், தம்பதியினர் இடையே ஒற்றுமை ஏற்படவும் பக்தர்கள்

இவரை நம்பிக்கையுடன் வழிபடுகின்றனர். செல்வம் பெருகுவதற்குக் கொழுக்கட்டையையும், குழந்தை வரத்திற்குச் சர்க்கரைப் பொங்கலையும், அவருக்குப் படைக்கின்றனர். நோய்கள் தீர்வதற்குக் கரும்புச் சாற்றையும் இங்கு நைவேத்தியம் செய்கிறார்கள். முற்காலத்தில் பாண்டிய மன்னர்கள் முதல் நாயக்க மன்னர்கள்

வரை, அதன் பின்பு நகரத்தார்களும் வணங்கி அருள் பெற்ற இத்திருத்தலத்திற்கு அருகில் பைரவ தீர்த்தக் குளம் உள்ளது. இதில் புனித நீராடி உச்சிஷ்ட கணபதியை வழிபட்டால் சகல தோஷங்களும் நிவர்த்தியாகும். இங்கு ஆவணி மாத விநாயகர் சதுர்த்தியை ஒட்டி கொடியேற்றமாகி 10 நாட்கள் திருவிழா நடைபெறும். தவிர

மாதாந்திர தமிழ் மாத பிறப்பு, சங்கடஹர சதுர்த்தி ஆகிய நாட்களில் சிறப்பு வழிபாடுகள் நடைபெற்று வருகிறது. மூர்த்தி, தலம், தீர்த்தம், வரலாறு ஆகியவற்றால் சிறந்து விளங்கும் மணிமூர்த்தீஸ்வரம் உச்சிஷ்ட கண்பதி திருத்தலம் வாழ்வில் ஒரு முறை கண்டிப்பாக தரிசிக்க வேண்டிய தலம். விநாயகர் சதுர்த்தி

அன்று உச்சிஷ்ட கணபதிக்கு விசேஷ அபிஷேகங்களும், சிறப்பு ஆராதனைகளும் நடைபெறும். காலை 4 மணி - இரவு 10 மணி வரை நடை திறந்திருக்கும். திருநெல்வேலி சந்திப்பு பேருந்து நிலையத்தில் இருந்து வடக்கே 3.5 கி. மீ தொலைவில் உள்ளது மணிமூர்த்தீஸ்வரம் விநாயகர் கோவில்.
சர்வம் ஸ்ரீ கிருஷ்ணார்ப்பணம்🙏🏾