Thread by @anbezhil12

#ஸ்ரீமன்நாராயணீயம் நூறு தசகங்களை கொண்டது. ஒவ்வொரு தசகத்திலும் தோராயமாக பத்துப் பாடல்கள் இருக்கும். இதை இயற்றியவர் #நாராயண_பட்டத்திரி அவர் தன் குருவின் வியாதியை தான் வாங்கிக் கொண்டு தன்ஆச்சாரயனுக்கு அந்நோயிலிருந்து விடுதலை கொடுத்து, மற்ற மாணாக்கர்களுக்கு அவர் தொடர்ந்து பாடம்

எடுக்கும்படி உதவினார். ஆனால் அவர் ஏற்றுக் கொண்ட வாத நோய் அவரை மிகவும் வருத்தியது. அவர் பணக்கார வீட்டுப் பிள்ளை. அவர் வீட்டு வேலையாள் அவரின் துன்பத்தைக் காண பொறுக்காமல் ஒரு ஜோசியரிடம் சென்று பரிகாரம் வேண்டினார். அவர், நாக்கில் மீனை வைத்துக் கொண்டு குருவாயூரப்பன் கோவிலில் அவரை பாட

சொல்லு என்றார். இதை வந்து பட்டத்திரியிடம் வேலையாள் சொன்னார். முதலில் அதிர்ச்சி அடைந்தார், பின் புரிந்து கொண்டார். மகா விஷ்ணுவும் மச்சாவதாரத்தில் இருந்து பாட ஆரம்பித்தார். தினம் அவரை தூக்கிக் கொண்டு கோவிலில் ஓரிடத்தில் உட்கார வைத்துவிட்டுப் போய் விடுவார்கள். மாலை வந்து திரும்பவும்

தூக்கிக் கொண்டு போவார்கள். பக்கவாட்டில் திண்ணையில் உட்கார்ந்திருந்த அவரால் அவரால் சன்னதியில் இருக்கும் கிருஷ்ணனை கழுத்தைத் திரும்பிக் கூட பார்க்க இயலாது. நூறு தசகம் வரை அவர் நோயை கண்ணன் குணப்படுத்தவில்லை. நூறாவது தசகத்தில் பாதாதிகேசமாக அவர் கண்ணனை வர்ணிக்க ஆரம்பித்தவுடன் அவருக்கு

காட்சி தந்து அவரை நோயின் கோரப் பிடியில் இருந்தும் விடுவித்தார். இந்த நாராயானத்தை சித்த சுத்தியுடன் பாராயணம் செய்பவர்களுக்கு தீராத நோயும் தீரும் என்பது உறுதி. இது கண்ணனின் அருட் கடாக்ஷம். இந்த நூறு தசகத்தையும் நாம் யுடியுபில் போட்டும் அல்லது ஒரு குரு முகமாகவும் (அது தான் சிறந்தது)

கற்றுக் கொள்ள முடியும். பொருள் தெரிந்து படித்தால் தான் நமக்கு என்ன பாராயணம் செய்கிறோம் என்பதுடன் பட்டத்திரி எவ்வளவு அழகாக எழுதியுள்ளார் என்பதை உணர்ந்து கொள்ள முடியும். ஸ்ரீமத் நாராயணீயம் ஸ்ரீமத் பாகவத சாரம் (ஸ்ரீமத் பாகவத புராணத்தின் சாரம்) . சமஸ்கிருத இலக்கியத்தில் ஒரு

கவிதையாகவும், பக்திப் பாடல்களாகவும் நாராயணீயம் மிக உயர்ந்த இடத்தைப் பிடித்துள்ளது. பட்டத்திரி குருவாயூரப்பனின் திருவுருவத்தை உன்னதமாகச் சித்தரிக்கிறார்.
“சம்மோஹனம் மோகனாத், காந்தம் காந்திநிதானதோபி, மதுரம் மாதுர்ய துர்யதாபி, சௌந்தர்யோதரதோபி சுந்தரதரம்”
நாராயண பாராயணம் பக்தர்களின்

மனம் மற்றும் உடல் ரீதியான துன்பங்களைக் குணப்படுத்தும் சக்தியைக் கொண்டுள்ளது. நாராயண #நித்யபாராயணம் பக்தர்கள் #ஆயுராரோக்யசௌக்யம் அடைய உதவும். ஒவ்வொரு தசகத்தின் பொருளையும் இங்கே அடியேன், ஆச்சார்யன் திருவருளாலும், ஸ்ரீ @Raamadaasan1 அவர்களின் உந்துதலினாலும் பிதிவிட உள்ளேன்.

கண்ணன் தான் நடத்தி வைக்க வேண்டும். சர்வம் ஸ்ரீ கிருஷ்ணார்ப்பணம்🙏🏾
#தசகம்_1
பகவானின் பெருமை
1. பகவானாகிய அந்த பரப்ரம்மம் ஆனந்தமாகவும், அறிவாகவும் மோக்ஷத்தை அளிக்கவல்லதாகவும் உள்ளது. ஒப்புயர்வற்றது. கால தேசத்திற்கு அப்பாற்பட்டது. உலக மாயைகளில் சம்பந்தமற்றது. அந்த மெய்ப்போருளே

குருவாயூரில் குருவாயூரப்பானாக, ஜனங்களின் பாக்யமாக விளங்குகிறது.
2. இவ்வாறு, கிடைப்பதற்கு அரிதான பொருள் எளிதில் கிடைத்திருந்தும் மக்கள் அறியாமையால் உடலாலும், மனத்தாலும், வாக்காலும் வேறொன்றை வழி படுகிறார்கள். அனைத்து உயிர்களிடத்தும் வியாபித்திருப்பவரான குருவாயூரப்பனையே உலகோரின்

கஷ்டம் நீங்க, உறுதி பூண்ட உள்ளத்தோடு நம்பியிருக்கிறோம்.
3. ஓ குருவாயூரப்பா! தங்கள் திருவுருவம் ரஜோ, தமோ ஆகிய குணங்களின் சம்பந்தமற்று, ஸத்வ குணம் நிரம்பியதாகவும், பஞ்ச பூதங்களாலும் பதினொரு இந்த்ரியங்களாலும் ஸ்ருஷ்டிக்கப் பட்டது என்று வியாசர் கூறுகிறார். பரமானந்தா ஸ்வரூபமான உன்

அழகுருவம் பிரகாசிப்பதாய், எளிதில் அடையக் கூடியதாய், காதிற்கும், மனத்திற்கும் இனியதாய் இருக்கிறது. புண்யசாலிகள் அந்த ரூபத்தைக் கண்டு களிக்கிறார்கள்.
4. தாங்கள் என்றும் நிறைந்து இருப்பவர். பேரின்பமாகிய அம்ருதஸ்வரூபி. முக்தர்கள் கூட்டத்தால் அழகு நிரம்பியவர். அப்படிப் பட்ட ஸத்வ

ரூபியான தாங்களே முழுமுதற்கடவுள். பரிபூரணர்
5. ஓ குருவாயூரப்பா! பிறப்பற்றவரே! நீங்கள் எவ்விதச் செயலுமற்றவர். ஆயினும், கடைக்கண் பார்வையால் மாயையை ஏவும் செயலைச் செய்து வருகிறீர்கள். அந்த மாயையும் தங்களிடம் அடங்காதது போல் தோற்றம் அளிக்கிறது. விவரிக்க முடியாத அந்த தூய்மையான மாயையின்

ஓர் அம்சமே உம்முடைய திருவுருவம்.
6. தங்கள் சரீரமானது, கார்மேகம் போலும், காயாம்பூங்கொத்தைப் போல் அழகாக உள்ளது. புண்ணியசாலிகளின் கண்களுக்கு முன்ஜன்ம புண்ணியத்தின் பயனாக விளங்குகிறது. ஸ்ரீ மகாலக்ஷ்மி விளையாடுவதற்கு ஏற்ற இருப்பிடமாக இருக்கிறது. பக்தர்கள் மனத்தைப் பேரானந்த வெள்ளத்தில்

மூழ்கச் செய்கிறது. அப்படிப்பட்ட தங்களை நான் என்றும் ஸ்மரிக்கிறேன்.
7. மாயையால் ஜயிக்கப்படாத குருவாயூரப்பா! இதுவரை, தங்கள் ஸ்ருஷ்டி பிறவித் துன்பத்தை அளிக்கிறது என்று நினைத்தேன். இப்போது அந்த எண்ணம் எனக்கில்லை. ஏனென்றால், இவ்வாறு படைக்காதிருந்தால், மிகவும் ஆனந்தமான உன் திருமேனியைக

கண்களாலும், காதுகளாலும் அனுபவித்து பேரின்பக் கடலில் மகிழ்ச்சி அடைந்திருக்க முடியுமா?
8. குருவாயூரப்பனான பாரிஜாதம் அளவற்ற பயன்களை அளிக்கும். எளிதாக அடைய முடியும். மோக்ஷத்தையே கொடுக்கும். அப்படியிருக்க, அழியக்கூடிய இந்திரலோகத்து பாரிஜாத மரத்தை யாசகர்கள் விரும்புவது ஏன்?
9. உலகில்

மற்ற தெய்வங்கள் அபீஷ்டங்களைக் கொடுக்கின்றனர். நீயோ, உன்னையே, உன் ஸ்வரூபமான ஆத்மாவையே அளிக்கின்றாய். வாசுதேவா, உன்னைத் தொழுகின்றேன்
10. முரனைக் கொன்றவனே! எல்லா தெய்வங்களையும், அவரவர்கள் வேலையைச் செய்ய ஏவுகின்றீர்கள். முற்றும் துறந்தோர் உன்னைப் பாடும் புகழ் பெற்றிருக்கிறீர்கள்.

தாங்கள் பற்றற்று இருப்பதால், பகவான் என்ற சொல்லுக்குப் பொருளாக விளங்குகின்றீர்கள்.

#ஸ்ரீமன்நாராயணீயம் #தசகம்_2
பகவான் திருமேனி வர்ணனை:
1.சூர்யனை விட பிரகாசமானதாக உன் கிரீடம் ஒளிவிடுகிறது. மேல் நோக்கியுள்ள திலகத்தால் உனது நெற்றி மிக அழகாக உள்ளது. கருணை பொங்கும் கண்கள், புன்சிரிப்புடன் கூடிய செவ்வாய், எடுப்பான நாசி, கன்னங்களில் ஒளி வீசும் காதின் மகர குண்டலங்கள்,

மார்பை அலங்கரிக்கும் கௌஸ்துப மணி, வனமாலை, முத்துமாலை, ஸ்ரீவத்ஸம் இவற்றால் அழகாக விளங்கும் உன் திருமேனியைத் தினமும் தியானிக்கிறேன்.
2. தோள்வளைகள், கங்கணம், சிறந்த ரத்னங்களால் இழைத்த மோதிரம் முதலியவை அணிந்து பிரகாசிக்கின்ற உன் நான்கு கைகள், சங்கம், சக்ரம், கதை, தாமரை ஆகியவற்றையும்

ஏந்தி இருக்கின்றன. இடுப்பில் பொன் அரைஞாணும், பீதாம்பரமும் அலங்கரிக்கின்றன. திருவடிகள் தாமரை மலர்கள் போல விளங்குகின்றன. இப்படிப்பட்டது என்று வர்ணிக்க முடியாதபடி இருக்கின்ற உன் திருமேனி துன்பங்களை போக்குகின்றது. நான் அதையே பற்றுகிறேன்.
3. பிரபுவே! உன் திருமேனி மூவுலகிலும் போற்றப்

படுகின்ற பொருளை விட மேலாகப் போற்றப்படுகின்றது. மனங்கவர்ந்த பொருளை விட மனம் கவர்கிறது. இனியதாக இருக்கின்ற பொருளை விட பெரிதும் இனியதாக இருக்கிறது. அழகுமிக்க பொருளை விட அழகு வாய்ந்ததாக, ஆச்சர்யம் மிக்க பொருலை காட்டிலும் ஆச்சர்யம் மிகுந்தவையாக தோன்றுகிறது. இத்தகைய திவ்ய ஸ்வரூபம்

உலகில் யாருக்கு தான் மகிழ்ச்சியை உண்டு பண்ணாது?
4. ஓ குருவாயூரப்பா! சகல செல்வத்திற்கும் இருப்பிடமான மகாலக்ஷ்மி உன் திருமேனியில் பற்று கொண்டு உன்னிடத்திலேயே நிலைத்து விட்டாள். அதனால் அவள் தன் பக்தர்களிடம் கூட தங்குவதில்லை. இதனால் அவளுக்கு 'நிலையற்றவள்'என்ற அவப்பெயர் ஏற்பட்டது. அது

வருந்தத்தக்கதே ஆகும்.
5. உன் அழகினால் மகாலட்சுமி கவரப்பட்டு இருக்கிறாள். அதனால் பகவத் பக்தி இல்லாதவர்களிடம் நிலைத்து நிற்பதில்லை. உன்னைப் பற்றிய சிந்தையிலும், நாம சங்கீர்த்தனத்தால் உன் புகழ் பாடும் பக்தர்களிடத்தில் அன்பு கொண்டு நித்யவாஸம் செய்கிறாள். இது உறுதி.
6. உன் திருவுருவம்

ஸௌந்தர்யமான அமுதத்தைச் சொரிகிறது. ஆனந்தமாகவும், மனம் கவர்வதாகவும் உள்ளது. அது உன்னைப் பற்றி கேட்கின்றவரின் அறிவை மறுபடியும் கேட்கும்படி தூண்டுகிறது. ஆனந்தப் பரவசத்தில் உடல் புல்லரிக்கிறது. கண்களில் நீர் பெருகி உடலையே நனைத்து விடுகிறது.
7. யோகங்களில் சிறந்தது பக்தி யோகம். கர்ம-ஞான

யோகங்களை விட பக்தி யோகமே சிறந்தது என யோகிகள் கூறுகின்றனர். அத்தகைய பக்தி யோகம், அழகே உருவான உன்னிடத்தில் அன்பின் எழுச்சியான பக்தி, எல்லா மக்களாலும் எளிதில் அடையக் கூடியதாக உள்ளது.
8. செய்யவேண்டிய கர்மாகளை பற்றற்று செய்வதும், அதனால் உண்டாகும் ஞானமும் கர்ம-ஞான யோகமாகும். இது நீண்ட

காலத்துக்குப் பின்பே பலனளிக்கும். ஞானத்தால் உண்டாகும் பலனோ இந்திரியங்களுக்குப் புலப்படாதது. அதனால் அது மனதிற்கு எட்டாதது. உன்னிடத்தில் செலுத்தும் அன்பு வடிவான எப்பொழுதும் சுவையாகவும், பேரின்பத்தை அளிக்க வல்லதாகவும் இருக்கிறது.
9. மிகவும் சிரமப்பட்டு கர்மாக்களைச் செய்து அதனால்

வைராக்கியம் பெற்றால் ஞானயோகத்திலும், இல்லையேல் பக்தி யோகத்திலும் மக்கள் செல்கிறார்கள். அதனால் என்ன பயன்? மற்ற சிலரோ வேதாந்தமார்க்கத்தில் மிகவும் சிரமப்பட்டு, “பிரம்மம்” என்ற உன்னைத் தியானித்து, பல ஜன்மங்களுக்குப்பின் முக்தி அடைகிறார்கள்.
10. பிரபுவே! உன்னிடம் செலுத்தப் படுகின்ற

பக்தியானது உன் கதைகளில் பெருகும் அம்ருத வெள்ளத்தில் மூழ்குவதால் அதுவே மோக்ஷத்தை அளிக்கவல்லது. அதுவே தூய்மையான பிரம்ம ஞானத்தை எளிதிலே அடையச் செய்கிறது. உடனேயே பலனைத் தருகிறது. உன் திருப்பாதங்களில் ஏற்பட்ட அன்பினால் இடைவிடாமல் உன்னிடம் பக்தி செய்ய எனக்கு அருள வேண்டும்.