Ngayong hinaharap natin itong krisis ng COVID-19, importanteng malinaw ang guidelines ng gobyerno, para naman hindi na dumagdag pa sa takot at kaguluhan ngayon. Kaya kailangan kong linawin ito—hindi pwedeng basta mang-aresto ang PNP dahil sa paglabag sa health emergency measures.
Sabi kasi ni NCRPO Regional Director Sinas, aarestuhin ng kapulisan yung mga lalabag sa ipapatupad na “community quarantine” sa Metro Manila. Hindi pupwede yan.
The PNP cannot arrest and detain you for violating public health emergency measures. Pwede ka nilang harangin at wag papasukin, na tama lang naman kung kailangan, pero hindi ka nila pwedeng arestuhin at ikulong dahil hindi naman krimen ang subukang pumasok sa Metro Manila.
Ganoon din sa mga ayaw magpa-quarantine. Pwede silang piliting manatili sa quarantine area, na tama lang naman kung sila ay covered under the rules of quarantine, pero hindi sila pwedeng arestuhin at ikulong.
Isa pang importanteng punto: the PNP cannot act on its own. Section 3 of the President’s Proclamation No. 922 says that “[t]he Secretary of Health may call upon the Philippine National Police and other law enforcement agencies to provide assistance in addressing Covid-19 threat.”
Ibig sabihin, DOH Secretary at hindi PNP ang masusunod. DOH Secretary at hindi PNP ang mangunguna. Presidente na mismo ang nagsabi nyan. The PNP can only assist the DOH.
