Thread by @Lavvelenata

Ve conto na storia.
Ovviamente na storia bruta.
Asso a quei bravi contar e storie bee de successo.
Mi ve conto e storie quee brute. Perché xe dai sbagli che se impara no da quei che gà successo.

Anca perché i errori se pol replicare, el successo spesso no perché legà a tutta na serie de fattori irripetibii e congiunture astrali speciai.
E po ad aver successo ghe vol testa e skei.
A far bagoi basta essar mona.

Anca sto giro ghemo un fiume che scorre sotto sta storia. In sto caso el Brenta.
Ghe xe un toco de Veneto che va da Padova a Venessia che ai tempi dea me Serenissima iera percorso sol dal Burchiello che portava a spasso i signorotti de l’epoca.

Nel 1345 el Maggior Consiglio abrogava a legge che proibiva ai cittadini dea Serenissima de comprar tere in terraferma (quee abitae dai campagnoi pa capirse) e allora i signoroti taca spostar commerci nell’entroterra e lungo el Brenta.

Compra tera e sposta produsion. Ma xa all’epoca el problema iera quel de controllar a produsion e allora i taca costruir e famose residense de campagna. Mia casette … ville proprie.
Quasi uffici de rapresentansa co sale grandissime pa feste e banchetti.
FESTE & LUSSO.

I migliori architetti dell’epoca a progettarle, suntuose dimore decorae da pittori eccelsi a testimoniare a splendida stagione dea Serenissima.
Sio mai stai in Riviera del Brenta ? Visitae e ville ? Bee vero ?

Da anni el splendore de sto toco de Veneto xe rappresentà daea produsion de scarpe.
Scarpe splendide.
Ai pie dee donne pi bee de sto mondo e dei omani pi importanti.
Scarpe de lusso.
Beissime.
Alcune un sogno. Un toco de arte.

Scarpe de lusso.
Anca contraffatte.
Tutto apparentemente de lusso ma in realtà contraffatto.
EL LUSSO FALSO.

Falsi come i dipendenti de alcuni tomaifici che de regoeare no gavea praticamente gnente e falsi i marchi de note griffe messe soe scarpe.

Falsa tutta a filiera. No solo che i tomaifici. Falsi quei che forniva a pee lavorata, i stampi, e fustee, i accessori. Falsi anca i laboratori de produsion che in realtà iera i scantinati dee case.
El mondo del falso.
Ma de lusso.

Tutti falsi che produceva scarpe contraffatte pai venditori abusivi.
E de laboratori de sto tipo in Riviera ghe ne iera e ghe ne xe stati tanti.

Tutti savea.
Ma a Riviera se sa. Pa chi conosse un fià de storia veneta xe tera de omertà.
Xe tera dove tutti sa e nissun parla.
Anca qua tuti impirai pal spago. Tuti che sa, che se ciava tra de iero in nome del DESSO e SUITO.

Perché va ben cusir e scarpe ma fin a prova contraria botoni, fibie e tochi vari da qualcuno i rivava .. e i rivava ovviamente in nero …
Pian coi giudissi. No sol i cinesi.
Sgombremo suito el campo.

Dadrio che iera anca i local.
Par quanto i cinesi fassa presto imparar come se fa, na tradision soprattutto de far scarpe no tea passi daea matina aea sera.

No te deventi fiubero o caleghero daea matina aea sera. Dadrio ghe iera i nostri.
Organisai par ben.
I nostri che se pensa furbi e sicuri che no i me ciaparà mai.

Veneti che odia i veneti.
Che fa del mal ai so stessi coregionai.
Che ghe taja e gambe ae aziende oneste e che sassina el commercio.
No ghe credì?

Bhè nea storia dea Riviera ghe xe stà na gran operasione dea GDF che gà portà a arresti e sequestri de do tomaifici completamente irregoeari gestii da veneti.
Gnente norme de sicuressa, dipendenti in nero.
Laboratori fantasma.

Veneti concorrenti sleali dei veneti stessi.
Che però lavora pai grandi marchi dell’alta moda.
Granda moda che va dove costa manco.
No dove che a roba xe fatta ben nel rispetto dee regoe.
Grande moda che xe drio sasinar el distretto.

Che desso convoca i produttori de scarpe.
5 aea volta de quei che xe restai…
Ghe mostra un sandaeo e ghe domanda chi lo vol produrre a 10 euro.
10 euro ? Ma sio mati ? Ma no ghe sto dentro ...
No importa. TACA ASTA A CHI RIESSE FARLO A 10 EURO.

E allora tra dei fiori i taca farse e scarpe uno co chealtro perchè i xe tutti dipendenti dea grande moda …
Sparii tutti quei col so marchietto de scarpe fatte veramente in Riviera.

Ti che te tacchi i tacchi … xei dea Riviera i tacchi che te tacchi?

Perché in riviera dal 2000 se parla pi francese che veneto. All’inissio i francesi gà comprà i produttori dopo i se gà verto e so produsion e gà costruio e so fabbriche.
E co questo decimà i picoi produttori che xe deventà so fornitori ae so condision.

Xe che Calegheri te nassi.
E Calegheri xe veneti.
No francesi.
E coi francesi ghemo ancor conti sospesi. Almanco quei che conosse a storia dea Serenissima Repubblica de Venessia

I francesi gà industriaizà na roba artigianae.
E no te pol industriaisare na roba che nasse artigianae. Gnanca i machinari migliori pol competere coe 180-200 volte che un artigian ciapa in man na scarpa pa produrla.

Xe che in tempo de Covid e grandi industrie pol permetterse el lusso de far magasin e tegnerse scarpe invendue no i picoi … ma basta no pagarli i picoi e se risolve el problema ;)
Xe che i picoi uno drio chealtro xe drio sarar a domino dio caro.

No stemo dirghe – come sentio oggi motivo per cui me gà fatto scrivar sta storia – chei picoi gà da butarse su l’i-commers.
STE ZITI DIO CARO.

Si, vero che sull’internet se vende tutto ma na scarpa te gà da provarla, da sentirtea dosso, da far qualche passo. Toccarla. Anusar a pee.
Roba che el miglior i-commers no riesse gnancor far.

Ma anca a Riviera xe un toco de Veneto de cui no se ne ciava nissun, o pochi. Conta altro.

Dove che in tanti gà fato i furbi, gà sbajà, ghe n'ha fatto peso de bertoldo ma che gà nel ben e nel mal contribuio al ben del teritorio, a dar lavoro a fameje, a dar lustro al saver far.

Ma in sto paese maedeto conta pi Alitalia che i picchi artigiani.
End.