#குசேலோபாக்கியானம் மார்கழி மாத முதல் புதன்கிழமை குசேலர் தினமாக குருவாயூரில் கொண்டாடப்படுகிறது. இன்று தான் குசேலர் கிருஷ்ணனை துவாரகையில் சந்தித்த நாள். கிருஷ்ணன் குசேலருக்கு அனுக்கிரகம் செய்த நாள். பக்தர்கள் இலையில் அவல், அச்சு வெல்லக்கட்டி ஆகியவற்றை வைத்து வணங்குவது வழக்கம். 
குசேலரும் கிருஷ்ணனும் சாந்தீபனி என்ற முனிவரிடம் ஒரே குருகுலத்தில் 64 நாட்கள் ஒன்றாகப் பயின்றனர். பின் வரும் நாட்களில் கிருஷ்ணன் மதுராவின் அரசரானார். குசேலனோ 27 குழந்தைகளோடு வறுமையில் வாடினார். தங்கள் குடும்பத்தின் வறுமை நீங்க என்ன வழி என்று யோசித்த குசேலரின் மனைவிக்கு தன் கணவரின்
பால்ய நண்பரும் துவாரகை மன்னருமான பகவான் கிருஷ்ணரின் நினைவு வந்தது. பகவானை நோக்கி நம்மை வழிப்படுத்துவது குருநாதராக இருப்பார். இங்கே குசேலரின் மனைவி அவரை துவாரகை கண்ணனிடம் அவர் கடவுள் என்று அறியாமலே ஆற்றுப்படுத்தினார். மேலும் கண்ணனுக்குக் கொடுக்க அக்கம்பக்கத்தில் யாசித்துப் பெற்ற
சிறிது அவலை ஒரு கிழிந்த துணியில் முடிந்து கொடுத்தார். குசேலர் துவாரகை நகருக்கு நடைபயணமாக சென்றார். அங்கு கிருஷ்ணரின் மாளிகையின் வாசலில் வந்து சேர்ந்தார். அரண்மனை வாயிற்காப்பாளர்கள் குசேலர் அரண்மனை வாயிலில் காத்திருக்கும் செய்தியை கிருஷ்ணரிடம் கூறினார்கள். ’குசேலர்’ என்ற பெயரைக்
கேட்டவுடன் தம்மை மறந்த நிலையில் கிரிடம், பட்டுப்பீதாம்பரம், காலணிகள் கூட அணிய மறந்து, ஓடோடிச் சென்று குசேலரைக் காண அரண்மனை வாசலுக்கே வந்து குசேலரை வரவேற்று அரண்மனைக்கு உள்ளே அழைத்து சென்றார். ஸ்ரீகிருஷ்ணர் தனது நண்பர் குசேலரை உயர்ந்த ஆசனத்தில் அமர வைத்து, அவரது உடலில் நறும் மணம்
கமழம் சந்தனம் பூசி, நெற்றியில் கஸ்தூரி குங்குமம் இட்டார். அகர்மணம் நிறைந்த தூபம் மற்றும் நெய் தீபம் காட்டிப் பூசை செய்தார். சிறப்பான விருந்து அளித்து, தாம்பூலம் வழங்கினார். கிருஷ்ணரின் மனைவி ருக்மணிதேவி தனது பணிப்பெண்களுடன் வந்து, இரத்தினம் பதித்த பிடி உடைய விசிறியை கையில் ஏந்தி
குசேலருக்கு வீசி குளிர்ச்சி அடையச் செய்தாள். உலகுக்கெல்லாம் படியளக்கும் இறைவன் தன் நண்பனிடம், 'எனக்கு என்ன கொண்டு வந்தாய்?' என்று கேட்டார். நாணத்தோடு கொண்டு வந்த அவலைக் குசேலர் மறைக்க அதைப் பிடுங்கி உண்டான் அந்த மாயவன். அந்தக் கணத்தில் குசேலரின் வறுமை நீங்கி எல்லாச் செல்வங்களும்
சென்று சேர்ந்தது. குசேலர் தன்னுடைய நிஷ்காம்ய பக்தர். அன்புள்ள நண்பர். செல்வம் வேண்டி ஒரு நாளும் என்னை வழிபட்டவர் அல்ல. குழந்தைகள் வறுமையில் வாடுவதால் மனைவியின் அறிவுரைப்படி என்னிடம் வந்திருக்கிறார். ஆகவே இவருக்கு அனைத்து செல்வங்களையும் தருவேன். முக்தியும் அளிப்பேன்.தேவர்களுக்கும்
கிட்டாத அருள்புரிவேன் என்று எண்ணினார் கிருஷ்ணர். ஸ்ரீகிருஷ்ணரிடம் பிரியா விடைப் பெற்றுக் கொண்டு வெறுங்கையுடன் தன் ஊரை நோக்கிப் புறப்பட்டார். கிருஷ்ணரின் லீலையால் தனது குடிசை வீடு தங்க மாளிகையாக காட்சி அளித்தது. மனைவி மக்கள் நல்லாடைகளுடன், உயர்ந்த நகைகளுடன் காட்சி அளித்தனர். தம்
மனைவி மக்கள் உயர்ந்த உணவுகளை உண்டு வாழ்ந்த காட்சியைக் கண்ட சுதாமன் என்ற குசேலர் எல்லாம் கிருஷ்ணரின் செயல் என்று உணர்ந்தார். தனக்கு கிருஷ்ணர் இந்த செல்வங்கள் தராமல் இருந்திருந்தால் நன்மையாக இருந்திருக்கும். செல்வம் ஒரு மனிதனுக்கு கர்வத்தை கொடுத்து வீழ்ச்சி அடையச் செய்யும் என்று
உணர்ந்த குசேலர் பற்று அற்ற மனப்பாங்குடன் கிருஷ்ணரை வழிபடுவதிலே தம் காலம் முழுவதும் கழித்தார். நட்புக்குப் பகவானே முக்கியத்துவம் தந்து சிறப்பித்த இந்த நிகழ்வைக் கொண்டாடும் விதமாக குருவாயூர் ஆலயத்தில் 'குசேலர் தினம்' கொண்டாடப்படுகிறது. நாராயணீயத்தின் 87வது தசகமும் ஸ்ரீமத் பாகவதமும்
விசேஷமாக இந்த சந்திப்பை விவரிக்கிறது. இன்று குருவாயூரப்பனுக்கு அவல் பாயசம் நைவேத்யம் செய்யப்படுகிறது. நாமும் வீட்டில் கிருஷ்ணனுக்கு அவலும் வெல்லமும் நிவேதனம் செய்து நம் இல்லமும் இலட்சுமி கடாக்ஷத்தால் பொலிவு பெற கிருஷ்ணனின் அருள் வேண்டுவோம்..
ஸ்ரீ க்ரிஷ்ணார்ப்பணமஸ்து🙏🏾
ஸ்ரீ க்ரிஷ்ணார்ப்பணமஸ்து🙏🏾
• • •
Missing some Tweet in this thread? You can try to
force a refresh
