Thread by @kunalanilpatil

'सिंहस्थ': कुसुमाग्रज

व्यर्थ गेला तुका | व्यर्थ ज्ञानेश्वर
संताचे पुकार | वांझ झाले ||

रस्तोरस्ती साठे | बैराग्यांचा ढीग
दंभ शिगोशीग | तुडुंबला ||

बँड वाजविती | सैंयापिया धून
गजाचे आसन | महंतासी ||

भाले खड्ग हाती | नाचती गोसावी
म्हणे वाट यांस पुसावी | अध्यात्माची ||

1/n

कोणी एक उभा | एका पायावरी
कोणास पथारी | कंटकांची ||

असे जपीतपी | प्रेक्षकांची आस
रूपयांची रास | पडे पुढे ||

जटा कौपिनांची | क्रीडा आहे जळ
त्यात हो तुंबळ | भाविकांची ||

क्रमांकात होता | गफलत काही ||
जुंपते लढाई | गोसाव्यांची ||

2/n

हे साधू नाहतात | साधू जेवतात
साधू विष्ठतात | रस्त्यावरी ||

येथे येती ट्रक | तुपासाखरेचे
टँकर दुधाचे | रिक्त तेथे ||

यांच्या लंगोटीला | झालर मोत्याची
चिलीम सोन्याची | त्यांच्यापाशी ||

येथे शंभराला | लाभतो प्रवेश ||
तेथे लक्षाधीश | फक्त जातो ||

3/n

अशी झाली सारी | कौतुकाची मात
गांजाची आयात | टनावारी ||

तुका म्हणे ऐसे | मावेचे मइंद
त्यापाशी गोविंद | नाही नाही ||