Thread by @ShanmuSundarS

🙏 திருச்சிற்றம்பலம் 🙏

தேவாரப்பாடல் பெற்ற சிவாலயங்கள்:
(30)
வீரட்டேஸ்வரர் கோயில்:

மூலவர்: வீரட்டேஸ்வரர்
அம்மன்: ஞானம்பிகை
தல விருட்சம்: கடுக்காய் மரம், அரிதகிவனம்
தீர்த்தம்: திரிசூல் கங்கை, பசுபதி தீர்த்தம்
புராண பெயர்: திருக்குறுக்கை
ஊர்: கொருக்கை, நாகப்பட்டினம்

தேவாரம் பாடியவர்கள்: திருநாவுக்கரசர்

சிவபெருமான் வீரச்செயல்கள் புரிந்த அட்ட வீரட்டத்தலங்களில் இது காமனை எரித்த தலம். எனவே இறைவன் காமதகன மூர்த்தி என்று அழைக்கப்படுகிறார். காமதகன மூர்த்தி இடக்காலை மடித்து வலக்காலைத் தொங்கவிட்டு வலக்கை அபய முத்திரையுடன் இடக்கையை மடக்கிய கால்

மீது வைத்து அமர்ந்த நிலையில் யோகமூர்த்தியாக வீற்றிருக்கிறார்.

இங்கு சிவன் யோக மூர்த்தியாக இருப்பதால் நினைத்தவுடன் சென்று எளிதாக பார்க்க இயலாது. எப்படியாவது தடங்கல் வந்து விடும் . அதையும் மீறி சுவாமியை தரிசிப்பவர்களுக்கு யோக நிலை கைகூடும்.

இங்குள்ள குறுங்கை கணபதிக்கு மட்டும் கஜபுஷ்ட விமானம் இருக்கும். சதுர ஆவுடையாரில் அமர்ந்த கோலத்தில் உள்ளார். முருகப்பெருமான் ஒரு திருமுகமும் நான்கு திருக்கரங்களும் கொண்டு இருதேவியருடன் நின்ற திருக்கோலத்தில் காட்சி தருகின்றார். உற்சவர் வில்லேந்திய கோலத்தில் காட்சி தருகிறார்.

தேவாரப் பாடல்:

அணங்கு உமை பாகம் ஆக அடக்கிய ஆதிமூர்த்தி
வணங்குவார் இடர்கள் தீர்க்கும் மருந்து நல் அருந்தவத்த
கணம் புல்லர்க்கு அருள்கள் செய்து, காதல் ஆம் அடியார்க்கு என்றும்
குணங்களைக் கொடுப்பர் போலும் குறுக்கை வீரட்டனாரே.

🙏 திருச்சிற்றம்பலம் 🙏
🙏 நற்றுணையாவது நமச்சிவாயவே 🙏