Thread by @meemainseen

لاہورکی جوبن پرآئی شام آسمان ابھی شفق رنگ تھاجب اس حویلی کی چھت پرجہاں کوُکوُز ڈین اپنےمہمانوں کاسواگت کرتاہےسانس متوازن کرنےاورتواچکن آرڈرکرنےہردوکےبیچ ہم نے اردگردنظردوڑائی
ـــ
کوئی کیوں کسی کالبھائےدل کوئی کیاکسی سےلگائےدل
وہ جو بیچتے تھے دوائے دل وہ دکان اپنی بڑھا گئے

ہمارے پیروں سے ابھی تک ان روشوں جھروکوں اورچوباروں کی رنگین دھول اڑتی تھی جنہیں دنیا ٹکسالی کے نام سے جانتی ہے
تب یادداشت کے پردے پر چناب کے اس پارسے ایک بھولی بسری داستان طلوع ہوئی
توصاحبو! بہت دن نہیں بیِتے کہ کاتب کے لکھے حروف کی سیاہی ابھی تازہ ہے

کانوانوالی سرکارکی نگری سے کچھ کچھ شما ل کی سمت جچ دوآب کے زرخیزمیدانوں میں اس راستے کی قربت میں جو بل کھاتالڑھکتا کوٹلہ چلتا چلا جاتاہے ہم ذرا دم لینے کو ٹھہرے تھے ۔ آنجہانی اٹل بہاری واجپائی سے پرویزمشرف کے زبردستی کے مصافحے نے رزم گاہی ماحول کو کچھ نرم کردیا تھا

مگر صاحب رزم ہو یا بزم فوج سکیم کے پیسے پورے کرواتی ہے
جنگ تو نہ ہوئی مگرعمرعزیزکے دو روشن سال چھاؤنی کےپکے مکانوں سے دور بہت دورایک تمبو قناتی رہائش اور ان گنت ٹریننگ سائیکل کی نظرہو گئے۔ پہلے سال تو لگ بھگ نوماہ تک کیاافسرکیا جوان کسی کے لیے چھٹی بھی نہیں کھلی

جیٹھ ہاڑ کی گرمیاں تو اسی بھمبھل بھوسے یعنی عسکری کارروائی کی گرما گرمی میں گزر گئیں

دس ہاڑ دا دوپہرہ کتھے کٹیئے
بابے بُلّھے دے پنجا ب دیئے جٹیئے

مگر جب سردیاں سرپہ آگئیں تو گنے کے کاشتکارپریشان ہوگئے

ان دنوں پی ٹی وی پرخبرنامے کےدوران اکثرمحکمہ زراعت کا اشتہارچلاکرتاتھاجس کی اوپننگ لائن تھی گنے کےکاشتکار متوجہ ہوں
وقت گزرجانےکےسبب اب ہمیں اس مشہوری کامتن تویادنہیں رہامگر یہ اوپننگ لائن اس لیےبھی یادہےکہ یہ سنتےہی متاثرہ افسرکچھ کھنگورا سامارکےبے چارگی شکل پہ سجائے

کنکھیوں سے کبھی ایک دوسرے کو اور کبھی کمانڈنگ افسرکودیکھتے تھے اور ہم جیسے جونیئرافسرجو ابھی گنے کے کاشتکار نہیں ہوئے تھے زیرلب مسکرادیتے
دیکھیے آپ کو کہا تھا کہ بات کھلے گی تو بہت دور جائے گی، سو چلی گئی
تو صاحب ایک ایسی ہی شام اس معنی خیزاشتہارکے کھنگوروں اور کنکھیوں کے بعد

اووراے کپ آف ٹی ہمارے کمانڈنگ آفیسرلیفٹیننٹ کرنل ارشد بھٹی نے وہ داستان سنائی جس کا ذکر شروع میں ہوا تھااور جو ٹکسالی کی یاتراکے بعد ہماری یادداشت پر اتری تھی
یہ ان دنوں کا ذکر ہےکہ جن دنوں ہمارے کرنل صاحب کے ابھی لفٹینی دور کے کھانے پینے اور کھل کھیلنے کے دن تھے

نوجوان کرنل صاحب اوران کےایک لفٹین دوست نےپروگرام بنایا کہ وہ منڈی دیکھ کرآتےہیں جس کےنام کوکچھ ہیروں سے نسبت ہے
دونوں افسرسیالکوٹ سےبذریعہ بس لاہور واردہوئےاورجب شاہی مسجد کےپچھواڑےاسی کےہم نام محلےمیں شرم وشرمی اترےتو سِکھردوپہرے ان گلیوں اور چوباروں میں الّو بول رہا تھا

کرنل صاحب سےمروی ہےکہ ہم منہ پھاڑکےکسی سےپوچھتے بھی توپتےکی بابت کیاپوچھتے
اورتواورنوواردان محلہ کی سہولت کےلیےکوئی سائن بورڈتک نہیں تھاجس پہ جلی نہ سہی خفی حروف میں لکھاملتا ہیرامنڈی میں خوش آمدیدیاپھرجی آیاں نوں وغیرہ
محلےکی دکانیں اورپان کےکھوکھےتک اس مدمیں مشکوک حدتک خفیہ تھے

دونوں حضرات گنرہونے کی رعایت سے میپ ریڈنگ کے فن سے کامل واقف تھے اور کمال مہارت سے سکس فگرگرڈ ریفرینس نکال کر اتنا تو مطمئن ہوگئے کہ وہ مطلوبہ جگہ پہنچ گئے ہیں مگر وہاں نہ موتیے کے ہار، نہ کجلے کی دھار، نہ سولہ سنگھار کیے ایک دلنواز انداز سے لبھاتی اور بلاتی حسینائیں

اور نہ ہی ڈبی پرنٹ مفلرپہنے بند مٹھی کیے چھنگلیا میں سگریٹ کا گل دبائے ایک آنکھ میچ کے کش لگاتے دنیاکی سب سے قدیم جنس کا بھاؤ تاؤ کرتے آڑھتی
کمانڈ پوسٹ میں کھڑے ہوکر میٹ میسج حل کرنے اور سکس راؤنڈ گن فائر فارایفیکٹ آرڈرکرنے والوں کوکون سمجھائے کہ

بقول مرزاعبدالودودبیگ جس بازارمیں کوئلوں کی دلالی سے منہ کالاکرتےہیں اس ’ہیرامنڈی‘ میں توچہل پہل ہی سورج ڈھلےشروع ہوتی ہے
رونق تب لگتی ہےجب رات کچھ کچھ بھیگ چلی ہو
توصاحب ہماری لفٹینی جوڑی باہمی اتفاق سےیہ رائےقائم کرکےپلٹی
ہیرامنڈی وچ کوئی بازارحسن نئیں۔ ایویں گلاّں بنٹریاں نیں

تو صاحب آج کی ٹکسالی میں ایک ڈھلتی شام اورایک جوبن پر آتی رات کی چہل قدمی کے بعد اگر آپ کوُکوُز ڈین میں توا چکن تناول کرتے ہوئے سوچیں جیسا میں اس شام تھا تو آپ کی بھی رائے یہی ہوگی
ایویں گلاّں بنٹریاں نیں

(جاری ہے)
Part 1 of 2

@threadreaderapp unroll please