الحكومة دي سقطت ولا قعدت، حيكون قدام الحكومة البتسيّر الأمور حل وحيد هو تكلفة السلع والخدمات تكون بسعرها الحقيقي أو حتكون ما متوفرة ولنا في الكهرباء خير مثال.. لسبب واحد وبسيط ما عندو الموارد الكافية لتغطيتها وبنقوم بدا بالطباعة ودا السبب الخلى الدولار يمشي من 2 لطريق 500 جنيه.
+
+
أما حُجج ما بناخد مرتبات ناس بلاد بره عشان نتحاسب بسعرهم.. فما بتشتغل.. ناس بره ديل قلوبهم قاسية وببيعوا النفط بسعر عالمي واحد وما بتم النظر لمتوسط المرتبات عندنا للأسف-ولينا بتباع بسعر أعلى منو كمان عشان مشاكل الدفع عندنا والمتأخرات وكفاءة الميناء والمخاطرة الأعلى-
+
+
السؤال: هل الزيادة دي حتكون الأخيرة؟ لأ. لأنو الحكومة لسا بتموّل بالطباعة وبتحاول تلاحق الما بتلاحق. القصة مربوطة بانخفاض قيمة الجنيه السوداني أكتر من أي حاجة. وجزء من دا مرتبط بالطباعة لكن جزء منو بمضاربات تجار العملة والحكومة للآن ما اشتغلت شغل جدي لمحاصرتهم في الخارج.
+
+
المشكلة ما إنو الدولار بجنيه ولا مليون. المشكلة إنو ما ثابت حول رقم معين وبزيد بشكل كبير. قبل فترة خفة الشِدة البترولية، من نهاية التسعينات للانفصال، الدولار زاد في مبتداها من كم طاشر جنيه لقريب كم ألف جنيه. الحقق تخفيف الشدة على الناس هو ثباتو الفترة ديك.
+
+
فتثبيت العملة بقوم على ضرب المضاربات وتحجيمها وعلى ضبط السياسة المالية للدولة بشكل صارم. والإثنين ما حاصلين ولا واصل للناس إنو الحكومة كاربة قاشها معاهم. بالعكس بنعيش في حالة عدم محاسبة ما عادية وشايفين كل فترة فضيحة بتطلع من هنا ومن هناك وقروش بتتبعزق ونحنا أفلس من فار المسيد!
+
+
الجانب التاني المهم جداً: هو فتح الحكوم لدفاترها. بمعنى كل مالية الدولة على المستوى الإتحادي والولائي تكون مفتوحة ومبذولة للناس. يكون في تقارير شهرية لكل الإيرادات وأوجه الصرف الحقيقية وتقارير تقفيل سنوية مراجعة من المراجع القومي. كل الشركات من النفط للكهرباء لكل أجهزة الحكومة.
+
+
عدم الشفافية الغير مبرر وغير مفهوم دا ياهو المخلي النقاش اقتصادي من غير ارقام وأقرب لضرب الودع. كم بكلف كيلوواط الكهرباء/لتر البنزين محلي ومستورد/بنستورد كم وفرق الأسعار بين الشراء والبيع كم/متر مكعب المويه الواصل البيت/الخ. كل التكاليف بأسعار حقيقية يجب نشرها دورياً.
+
+
ومن نافلة القول الما قام بالساهل ما حيكون شغال في الصعب من إعادة تنظيم نموذج الضرائب كلو. والواضح فيهو السودانيين كلهم تقريباً ما دافعين نصيبهم العادل والأكثر فقراً دافعين أكتر من نصيبهم والفوق زايغين. الضرائب من الفوق يجب تتقلع قلعاً. ودا درب طويل وصعيب وحار لكن لازم نبدأ.
+
+
النقطة الأخيرة التمويل بالطباعة دا غِش لينا. عملياً كلنا دافعين تكلفة دا بانهيار الجنيه الما بغبى واحد. بغض النظر عن بيصلك كم من المكرمات الحكومية؛ حتدفع التكلفة في تضخم يصل أي حاجة. لو بتشتري منتج محلي مثلاً دقة قونقليز ولا دوم طالع من شجرة عمرها 100 سنة برضو سعرها حيزيد.
+
+
زيادتها بسبب زيادة تكلفة العمالة العايزة تواكب السوق.. ودا بتشوفو في أجر أي زول شغال أعمال حرة. السوق كلو بعمل إعادة تفاوض لحدي ما يحصل الإتزان. والإتزان ما بحصل والعملة بتقفز القفزات الهائلة دي. فأحسن نشوف الصورة زي ما هي في الواقع.
والكلام سمح من خشم كمبريسي!
https://twitter.com/kambareesi11/status/1402653481832493069?s=20
• • •
Missing some Tweet in this thread? You can try to
force a refresh
