Thread by @Raamraaj3

எண்ணித் துணிக கருமம், ஸ்டாலின் அவர்களே!

தமிழக முதல்வர் ஸ்டாலின், கடலோர மாநில முதல்வர்களுக்கு அனாவசியமான கடிதம் ஒன்றை எழுதி உள்ளார். அதில், 'புதிய இந்திய துறைமுக சட்டத்தால், மாநிலங்களின் அதிகாரம் பறிக்கப்படுகிறது' என்று புலம்பி உள்ளார்.

இதன் வாயிலாக, முதல்வருக்கு ஆலோசனை கூறியது யாரோ ஒருவர் கற்றுக்குட்டி என்பதும், தன் அறியாமையை வெளிச்சம் போட்டுக் காட்டியுள்ளார் என்பதும் தெரிய வருகிறது.

தனிச் சட்டம்

இந்தியாவில் கடல் வாணிபத்தையும், துறைமுகங்களையும் நிர்வாகம் செய்ய, கடல்சார் வாணிபச் சட்டம் 1058, இந்திய துறைமுகச் சட்டம் 1908, பெருந்துறைமுக அறக்கட்டளைச் சட்டம் 1963 ஆகிய சட்டங்கள் உள்ளன.

*கடல்சார் வாணிபச் சட்டம், கப்பல்களைப் பற்றியது. கப்பலை வாங்குவது, விற்பது, பதிவு செய்வது, அதில் பணிபுரியும் மாலுமிகளுக்குத் தரப்பட வேண்டிய ஊதியம், உணவு, ஓய்வு மற்றும் விடுப்பு பற்றியது.

* பெருந்துறைமுக அறக்கட்டளைச் சட்டம் என்பது, குறிப்பிட்ட சில துறைமுகங்களுக்கான சட்டம். நாடு விடுதலை பெற்ற பின், கோல்கட்டா, மும்பை, சென்னை போன்ற துறைமுகங்களை மத்திய அரசு ஆழப்படுத்தி நவீனப்படுத்தியதால், அவற்றுக்கென தனிச் சட்டம் வகுக்கப்பட்டது.

இதில் நாளடைவில் 11 துறைமுகங்கள் சேர்க்கப்பட்டன. இந்தச் சட்டம், மேலே குறிப்பிட்ட இரண்டு சட்டங்களுக்கும் உட்பட்டது.

இதன் முக்கியமான அம்சங்கள், நிர்வாக அமைப்பு பற்றிய பிரிவுகள் தான்.

இவை மத்திய அரசின் கட்டுப்பாட்டில் இருந்தாலும், நிர்வாக வசதிக்காக இத்துறைமுகங்கள், இந்திய அறக்கட்டளைச் சட்டத்தின்படி உருவாக்கப்பட்டவை. இதற்கு, அன்றைக்கு சொல்லப்பட்ட காரணம், துறைமுகங்கள் லாப நஷ்ட நோக்கம் இல்லாமல், செலவை மட்டும் வசூலித்தால் போதும் என்பது தான்.

இதனால், துறைமுகங்கள் லாப நோக்கை மறந்தன; பெரும்பாலும் நஷ்ட நோக்கை நாடின.

வளர்ச்சித் திட்டங்கள் வகுக்க வேண்டும் என்றால், துறைமுக அறங்காவலர் குழுவுக்கோ, அதன் தலைவருக்கோ போதிய அதிகாரங்கள் கிடையாது.எண்ணெய் நிறுவனங்களை போல சுதந்திரமாக செயல்பட முடியாது.

இதில் கவனிக்க வேண்டிய முக்கியமான விஷயம் என்னவென்றால், மாநில அரசிற்கும், இந்தச் சட்டத்திற்கும், இந்தத் துறைமுகங்களுக்கும் எப்போதும், எவ்விதத்திலும், எந்நிலையிலும் சம்பந்தமில்லை.

இப்போது இயற்றப்பட்டுள்ள இந்திய துறைமுகச் சட்டம் 2021, மேற்கண்ட சட்டத்தில் உள்ள குறைபாடுகளை நீக்கி, துறைமுக நிர்வாகத்திற்கு உரிய அதிகாரத்தை வழங்கி இருக்கிறது. 1963ம் ஆண்டு சட்டத்தின் திருத்திய வடிவம் தான் இது. உதவாத சட்டங்கள் இதில் நீக்கப்பட்டுள்ளன.

அவசியம்

ஏன் புதிய சட்டமாக உள்ளது என்றால், அறக்கட்டளையாக செயல்பட்ட துறைமுக நிர்வாகத்தை ஒரு வாரியமாக மாற்றியதால், அடிப்படையே மாறி விட்டது. இந்திய துறைமுகச் சட்டம், அனைத்து துறைமுகங்களுக்குமான சட்டம். இதன் பின்னணியில், ஒரு சுவாரசியமான செய்தி உள்ளது.

கடந்த 1908ல், வ.உ.சி., சுதேசி கப்பல் கம்பெனி துவங்கிய போது, அவரை வீழ்த்த வேண்டும் என்பதற்காகவே போடப்பட்ட சட்டம் இது. இன்றும், இந்திய கம்பெனிகள் வளர்ச்சி அடையாமல் இருப்பதற்கு, இந்தச் சட்டமும் ஒரு காரணம்.இந்தச் சட்டம் இயற்றப்பட்டபோது, இன்றைய மாநிலங்கள் இல்லை.

மாநிலங்கள் பிரிக்கப்பட்ட பின், இச்சட்டம் ஏழு முறை திருத்தி அமைக்கப்பட்டு உள்ளது. இதில், சட்டப் பிரிவுகளை விட, திருத்தப் பிரிவுகள் அதிகம்.

சிக்கல் என்னவெனில், தற்போதைய தனியார் துறைமுகங்களை, யார் கண்காணிப்பது என்பதை பற்றி, இந்தச் சட்டம் தெளிவுபடுத்தவில்லை.

எனவே, இதை முற்றிலும் மாற்ற வேண்டிய அவசியம் ஏற்பட்டிருக்கிறது. அது தான் நடந்திருக்கிறது இப்போது!

தனியார் துறைமுக நிர்வாகத்தை சீராக்கவும், புதிய துறைமுகங்களை உருவாக்க நடைமுறைகளை எளிதாக்கவும், புதிய வகையிலான கடல் போக்குவரத்து சாதனங்களை ஒழுங்குபடுத்தவும், அமெரிக்காவோடு நாம் கையெழுத்திட்டுள்ள ஒப்பந்தங்களை நெறிமுறைப் படுத்தவும், இந்த புதிய சட்டத்தை வைத்து தான் செய்ய முடியும்.

உதாரணமாக, அமெரிக்காவின் 'மார்போல்' என்ற ஒப்பந்தத்தில், இந்தியா கையெழுத்திட்டு உள்ளது. இதன்படி, கப்பல்கள் தங்களது கழிவுநீரை வெளியேற்ற, பல நிபந்தனைகள் உள்ளன. ஆனால், இதுவரை மாநில அரசின் கட்டுப்பாட்டில் உள்ள துறைமுகத்தில், இதை ஆய்வு செய்ய வழி இல்லை.

இதுபோல கடந்த 100 ஆண்டுகளில் மாறி உள்ள உலக சூழ்நிலைகளுக்கு ஏற்ப, சட்டமும் மாற வேண்டும் அல்லவா!

அதற்காக, இந்தச் சட்டத்தால் மாநிலங்களின் உரிமைகள் பறிபோகிறது என்று சொன்னால், அதில் உண்மை இல்லவே இல்லை. மாறாக, அதிக அதிகாரம் வழங்கப்பட்டு உள்ளது.

இப்போது இருக்கும் சட்டத்தில், 69 பிரிவுகள் உள்ளன. அவை அப்படியே புதிய சட்டத்திலும் உள்ளன. கூடுதலாக, சில பிரிவுகள் சேர்க்கப்பட்டுள்ளன. குறிப்பாக, கடலோர மாநிலங்களின் வளர்ச்சிக் குழு என்று ஓர் அமைப்பு உருவாக்கப்பட்டுள்ளது. இதைத் தான் முதல்வர் கரித்துக் கொட்டுகிறார்.

இக்குழு, எந்த வகையிலும் மாநில துறைமுக நிர்வாகத்தில் தலையிட வழி இல்லை. இதன் முக்கிய பணி, இரண்டு துறைமுகங்களுக்கு இடையே பிரச்னை வந்தால், தீர்த்து வைப்பது மட்டுமே.

உலக அளவில் துறைமுகம் சம்பந்தமாக, இந்தியா கையெழுத்திட்டுள்ள ஒப்பந்தங்களின் படி, எல்லாத் துறைமுகங்களும் செயல்படுகின்றவா என்று கண்காணிப்பது; புள்ளி விபரங்களைத் திரட்டுவது; பகிர்ந்து கொள்வது; வளர்ச்சித் திட்டங்களை பரிந்துரை செய்வது;

ஆய்வுகள் மேற்கொள்வது போன்றவற்றை மட்டும் தான் இக்குழு செய்ய முடியும்.

துறைமுக நிர்வாகம் முழுக்க முழுக்க, மாநில அரசிடம் மட்டுமே இருக்கும். சுருக்கமாக சொல்வதானால், ஒட்டுப் போட்ட சால்வைக்குப் பதிலாக, காலத்திற்கேற்ற புதிய சால்வையை இச்சட்டம் தருகிறது.

அதுமட்டுமல்லாமல், தனியார் துறைமுகங்களை எல்லாம் மாநில அரசின் கட்டுப்பாட்டில் கொடுத்து, மாநிலங்களுக்கு கூடுதல் அதிகாரத்தையும் கொடுத்திருக்கிறது.

பட்டினமருதுார், எண்ணுார், காட்டுப்பள்ளி போன்ற துறைமுகங்களை கண்காணிக்கும் அதிகாரம், தமிழக அரசிற்கு வழங்கப் பட்டுள்ளது.

இதைப் புரிந்துகொள்ளாமல், மாநில அரசின் உரிமைகள் பறிபோய் விட்டன என்று, மற்ற முதல்வர்களுக்கு கடிதம் எழுதுவது, என்ன மடமை? இல்லாத அதிகாரத்தை இருப்பதாக நினைத்து, வராத துயரம் வந்ததாக காட்டும், உங்கள் கறுப்பு கண்ணாடியைக் கழற்றுங்கள் முதல்வரே!

பா.பிரபாகரன்

எழுத்தாளர்

தினமலர்