Thread by @anbezhil12

#சரபேஸ்வரர் உலகை காக்க சிவபெருமான் எடுத்த உருவம் தான் “சரபேஸ்வரர்” அவதாரம். தமிழ்நாட்டில் தஞ்சாவூர் மாவட்டம் கும்பகோணத்தில் இருந்து மயிலாடுதுறை செல்லும் வழியில் சுமார் 8 கி.மீ. தொலைவில் உள்ள திருபுவனம் என்னும் ஊரில் காவிரி தென்கரையில் அழகிய ஸ்ரீ கம்பகரேசுவரர் ஆலயம் அமைந்துள்ளது

வாழ்வில் நடுக்கத்தை சந்தித்த அனைவரின் கம்பத்தினை (நடுக்கத்தை) நீக்கிய இறைவனாக இவர் விளங்கியதால், ‘கம்பகரேஸ்வரர்’ என்றும், ‘நடுக்கம் தவிர்த்த பெருமான்’ என்றும் அழைக்கப்படுகின்றார்.
திரிபுவனச் சக்கரவர்த்தி எனச் சிறப்புப் பெற்றிருந்த மூன்றாம் குலோத்துங்கச் சோழன் கட்டிய சிறப்பு மிக்க

கோயில் திரிபுவனம் கம்பேசுவரர் கோயில். இங்கு சரபேஸ்வரக்கென என தனி சன்னதி உள்ளது. சரபேஸ்வரர் என்பவர் மிகுந்த சக்தி வாய்ந்த உருவம் கொண்டவர். சரபேஸ்வரின் தோற்றம் மிகவும் விசித்திரமானது. மனிதன், பறவை, மிருகம் மூன்றும் சேர்ந்த கலவை தான் சரபேஸ்வரர். சரபேஸ்வரர் எட்டு கால்களும், இரண்டு

முகங்களும், நான்கு கைகளும், மிகக்கூரிய நகங்களும், உடலின் இருபுறங்களில் இறக்கைகளும், சிங்கத்தினைப் போல் நீண்ட வாலும், கருடனைப் போன்ற மூக்கும், யானையைப் போன்ற கண்களும், கோரப் பற்களும், தெய்வீகத் தன்மை கொண்ட மனிதத் தலையும், அதில் சிங்க முகமும் கொண்டு ஒரு விசித்திரமான தோற்றத்தோடு

கழுத்து முதல் இடுப்பு வரை மனித உடலோடும் மற்றும் சிம்மம் போன்ற கால்களும் வாலும் கொண்டு கடும் உஷ்ணத்துடன் காட்சி அளிக்கிறார். எனவே இவர் சரபேஸ்வரர் என்றும் கலியுக வரதன் என்றும் என அழைக்கப் படுறார்.
இவர் அவதார காரணம்: #இரணியகசிபு என்ற அசுரர் குல தலைவன் சிவனை நோக்கி சாகா வரம் வேண்டி

கடும் தவம் செய்தான். அதன் பயனாக சிவனிடமிருந்து தனக்கு தேவர்களாலும், மனிதர்களாலும் , விலங்குகளாலும் முதலிய யாவராலும் மற்றும் பகலிலோ அல்லது இரவிலோ வீட்டின் வெளிப்புறத்திலோ அல்லது உட்புறத்திலோ மேலும் எந்த ஒரு ஆயுதங்களாலோ தனக்கு மரணம் ஏற்படக்கூடாது என்ற அறிய வரத்தை பெற்றான். தன்னைத்

தானே கடவுள் என்று கூறிக்கொண்டு, எதிர்ப்பவர் யாருமின்றி தன்னையே கடவுளாக வணங்க வேண்டும் என்றும் மற்ற தெய்வங்களை வணங்க கூடாது என்று கூறி கொடுமையான ஆட்சி செய்து வந்தான். ஆனால் அவனுக்கு பிறந்த மகன் #பிரகலாதன் தன் தாயின் வயிற்றில் கருவுற்று இருக்கும் பொழுதே நாரத முனிவர் மூலம்

திருமாலின் பெருமைகளை கேட்டு சிறந்த ஒரு பரந்தாமனின் பக்தனாய் பிறந்தான். சதாசர்வகாலமும் நாராயணன் நாமம் சொல்லி வளர்ந்தான். இதைக் கண்டு கடும் கோபம் கொண்டான் இரணியன் எவ்வளவு சொல்லியும் தன் நாமம் சொல்லாத தன் மகன் பிரகலாதனை பல வழிகளில் அழித்திட முயன்றான். திருமாலின் அருள் பெற்று இருந்த

பிரகலாதன் அனைத்திலிருந்தும் தப்பினான். அப்பொழுது இரணியன் பிரகலாதனை நோக்கி எங்கே உன் நாராயணன் எனக் கேட்க பிரகலாதனோ என் நாராயணன் தூணிலும் இருப்பார், துரும்பிலும் இருப்பார் என கூறினான். அதைக் கேட்டு இரணியன் கடும் கோபம் கொண்டு அருகிலிருந்த தூணை தன் காதையல் தாக்க அதிலிருந்து நரசிம்ம

உரு கொண்டு வெளிப்பட்டார் திருமால். இரணியனது வரத்தின் படியே மனிதனாகவோ, தேவராகவோ, விலங்காகவோ அல்லாது அனைத்தும் கலந்த ஒரு உருவமாக நரசிம்மமாய் வந்து இரவோ பகலோ அல்லாத அந்திப்பொழுது நேரத்தில் எந்தவித ஆயுதமும் இன்றி தன் நகத்தினை கொண்டு வீட்டின் உள்ளும் வெளியும் இல்லாது வாசற்படியில்

வைத்து இரணியனை வதம் செய்தார். அசுரனின் குருதி குடித்ததால் ஆக்ரோஷமானார். அவரை சாந்தப் படுத்த யாராலும் முடியவில்லை. அதைக் கண்டு நடுங்கிய தேவர்கள் அனைவரும் சிவனிடம் நரசிம்மரின் கோபம் தணிக்க வேண்டிக்கொண்டார்கள். அவர்களை காக்க சிவன் எடுத்த அவதாரமே சரேபேஸ்வர வடிவமாகும். காஞ்சி

புராணத்தில் நரசிம்மரின் உக்கிரத்தை அடக்கப் பரமசிவன் வீரபத்திரரை அனுப்பியதாகவும், நரசிம்மர் வீரபத்திரரைக் கட்டிப் போட்டுவிட்டதால் சிவன் ஒரு ஜோதி ரூபமாக வீரபத்திரர் உடலில் புகுந்ததாகவும், உடனே சரபேஸ்வரராக வீரபத்திரர் உருமாறி நரசிம்மரின் கோபத்தை அடக்கியதாகவும் கூறுகிறது.

#பிரத்தியங்கராதேவியும், சூலினி என்கிற தேவியும் சரபேஸ்வரரின் துணையாக இருப்பவர்கள். அதில் மூத்தவர் பிரத்யங்கரா தேவி, இளையவர் சூலினி. இருவரும் இரு இறக்கைகளாக சரபேஸ்வரருடன் சதா வாசம் செய்கிறார்கள். சரபேஸ்வரரின் நெற்றிக் கண்ணிலிருந்து வெளிவந்த அக்னியில் உதித்தவர் பிரத்யங்கரா தேவி

என்றும் சொல்வர். தேவியின் உதவியுடன் தான் சரபேஸ்வரர், நரசிம்மரின் உக்கிரம் தணித்து சாந்தியடைய வைத்தார் என்கிறது புராணம். இந்த சரபேஸ்வரரைப் ‘பட்சிகளின் அரசன்' ‘நரசிம்ம கர்வ பஞ்சக மூர்த்தி’ என்றும் ‘சாலுவேஸ்வரன்' என்ற திருநாமத்துடனும் குறிப்பிடுகின்றனர்.
எதிரி பயத்தை போக்கும்

சரபேஸ்வரரின் சக்தி அளவிட முடியாதது. எதிரிகளால் ஏற்படக்கூடிய பில்லி, சூனியம், ஏவல் மட்டுமல்லாமல் எல்லா விதமான நோய்களையும் தீர்த்து வைப்பார். மேலும் வீடு கட்டுவதில் ஏற்படும் பிரச்சனைகள், தாமதங்கள் நீங்கும், நினைத்த காரியங்கள் நடைபெறும். தீவிரமான நோய்ப்பிணி கொண்டவர்கள் அதிலிருந்து

சுகமடையவும், பயம், பீதி, இனம் காண முடியாத சஞ்சலத்தில் உள்ளவர்கள் அதிலிருந்து விடுபடவும், பகைவர்களை ஒழித்து ஜெயம் காணவும் சரபேஸ்வரர் வழிபாடு உதவும். சரபேஸ்வரர் கால பைரவர் அம்சமே. கால பைரவரையும் சேர்த்து வழிபட்டால் கூடுதல் பலன்கள் வந்து சேரும். ஸ்ரீ சரபேஸ்வரரின் மூலமந்திரத்தை

தினமும் பாராயணம் செய்தால் நல்ல பலன் கிடைக்கும் என்று நம்பிக்கை உண்டு. இவரை வணங்க ஞாயிற்றுக்கிழமை உகந்த நாளாகும் மேலும் ராகு கால நேரத்தில் வணங்குவது சிறப்பாகும். செவ்வாய், சனி கிரக சேர்க்கையால் நீங்கள் படும் துன்பங்கள் தீரும். அத்துடன் கர்ம வினை பாவங்களும் நீங்கும்.
9 அகல்

விளக்குகளில் தேங்காய் எண்ணெய் விட்டு அதில் வாழை தண்டு நார் மூலம் உருவாக்கப்பட்ட திரிகளை போட்டு ஏழு ஏலக்காய்களை நுணுக்கி விளக்குகளில் சிறிது சிறிதாக போட்டுக் கொள்ளுங்கள். இந்த தீபத்தை சரபேஸ்வரர் சன்னிதியில் ஏற்றி வைக்க வேண்டும். இவ்வாறு தொடர்ந்து ஒன்பது வாரங்கள் செய்து வாருங்கள்.

சென்னை கோயம்பேடு குறுங்காலீஸ்வரர் கோயிலில் சரபேஸ்வரருக்கு சன்னதி உள்ளது. மற்றும் சென்னை தாம்பரத்தை அடுத்த சேலையூரில் அமைந்துள்ள மாடம்பாக்கம் தேனுபுரீஸ்வரர் கோயிலில் ஸ்ரீசரபேஸ்வர மூர்த்தி சன்னதி உள்ளது. காஞ்சிபுரம் அருகிலுள்ள தாமல் நகரில் லிங்க உருவத்தில் சரபேஸ்வரர் உள்ளார். வேறு

எங்கும் இவ்வாறு லிங்க சரபேஸ்வர் இல்லை. ஸ்ரீ சரபேஸ்வரர் வழிபாடு துன்பங்களையும் தீர்க்கும்.

சரபேஸ்வரர் காயத்ரி மந்திரம்:

ஓம் ஸாலுவேசாய வித்மஹே
பஷீ ராஜாய தீமஹீ
தந்நோ சரப ப்ரசோதயாத்.

உங்களின் சங்கடங்கள் நீங்க வாழ்வில் மகிழ்ச்சி பெருக ஶ்ரீசரபேஸ்வரர் அருள் புரியட்டும்🙏🏻