Thread by @emadmustapha

حد فكر في الموضوع دا قبل..عايز تعرف ايه الموضوع
خليك معايا يمكن يفرق معاك لما تعرف..
هل الدعاء بيغيّر القدر !!
اه بيغيره ومش بس الدعاء ده حاجات تانية ممكن تغيّر قدرك.. ايه دا معقول..هفهمك..
القدر نوعين : أقدار معلقه و أقدار مبرمه !!
يعني ايه..يعنى إن في نسختين من القدر ..

-قدر أزلي عند ربنا..ده اسمه "مُبرم"مفيش أي حاجة ينفع تغيّره..وهو ده الي ربنا قال فيه
(مَا يُبَدَّلُ الْقَوْلُ لَدَيَّ)
-وقدر في الصُحف الي ماسكاها الملائكة..ده اسمه "مُعلّق" وإحنا بإيدينا نغيرة بحاجات موصوفة لينا اصلا في الكتاب والسنة..ومنها مثلا إن"العُمر"ممكن يزيد بـ صلة الرحم

فـ "القدر المُعلّق" بيتغير حسب تصرفاتك..و ده اللي ربنا قال عليه( لِكُلِّ أَجَلٍ كِتَابٌ يَمْحُو اللّهُ مَا يَشَاء وَيُثْبِتُ وَعِندَهُ أُمُّ الْكِتَابِ)
واصل الموضوع كان إن ربنا لما أوحي و خلّى الملائكة تكتب أقدارنا المُعلقة خلاهم يكتبوا كذا طريق لكل شخص..

فبيقولهم "مثلا" اكتبوا عُمر فلان كذا لو ما تصدقش.. ولو تصدّق يبقى عُمره كذا..هنا القدر بيبقى "مُعلق" بتصَّرف فلان دا وإختياره..لو إختار إنه يتصدّق هيطول عمره..
ومن هنا هنعرف إن إحنا مُخيرين..لان ربنا عمل نسخة كاملة من القدر وسمّاه القدر "المُعلّق"عشان إنت تختار طريقك بنفسك..

ومايجبركش على حاجة !!
الملائكة اللي ماسكة الصٌحف ماتعرفش فلان هيختار إيه ؟!!
بينما ربنا وحده بيكون عالم اللي هيحصل وعالم اختيار فلان ده هيكون ايه وقدره هيتغير ولا لاء..
فنتيجة الإختيار هي اللي بتكون قدر "مُبرم" بالنسبة لله عز وجل..وبمعنى تانى..

إن القدر"المُبرم" هو "كافة النتائج النهائية" للقدر المعلق اللى انت بتغيره بنفسك..
والقدر "المعلق" بيتغير باعمال صالحه زي بر الوالدين وصلة الرحم..والدعاء من أكتر الحاجات اللي ممكن تغيّر الأقدار..وأكتر حاجة بيعملها الدعاء هي رد البلاء..

زي ما قال رسولنا الكريم "لا يزيد في العمر إلا البر، ولا يرد القدر إلا الدعاء، وإن الرجل ليحرم الرزق بخطيئة يعملها."
ها.. إيه رأيك في المعلومة دي..عشان كدا نصيحة
سدد سهام الدعاء فإن الدعوات توشك أن تُصيب..
المصادر
#الشعراوى
#طارق_سويدان
#احمد_ديدات
#cpd
-عبد الرحمن سعيد