Thread by @ThanjaiMadhavan

யானைகள் கட்டிய இடம் #யானைச்சாலை எனப்பெற்றது. அவை படையின் பொருட்டு பாதுகாக்கப் பெற்றன.

அவற்றைப் பாதுகாத்தற் பொருட்டு மக்களிடமிருந்து அரசு பெற்ற வரி #ஆணைச்சாலைதேவை எனப் பெற்றது.

ஓராண்டுவரை கார்காலப் பயிர் செய்த உரிமையையோ, மீண்டும் நிலத்தைக் கைக்கொண்டு உழும் உரிமையையோ பெற்றவர்கள் அவ்வுரிமையைத் தொடர்ந்து ஆண்டுதோறும் புதுப்பித்துக் கொள்வதற்காகக் கிராம வரிப் புத்தகத்தாரின் ஒப்பம் பெற்றனர்.

அதற்காக அளிக்கப்பெற்ற வரி #ஆண்டெழுத்துத்தேவை எனப்பெற்றது.

பசுப்பண்ணை வைத்திருந்தோர் ஆண்டொன்றுக்குத் தவணை முறையில் செலுத்திய வரி #ஆத்திறைப்பாட்டம் எனப்பெற்றது.

ஊரின் எல்லைக்குள் வணிகத்தின் பொருட்டு வரவும் போகவும் விதித்தவரி #ஆயம் எனப்பெற்றது. ஆயம் பெறுமிடம் #சுங்கச்சாவடி எனப்பெறும்.

குறிப்பிட்ட நீர் நிலையைப் பாசனத்துக்காகப் பயன்படுத்தப் பெற்ற வரி #ஆயக்கடமை எனப்பெற்றது.

மிகுதியான அளவில் நிலங்களை உரியவராக இருந்தவர் அரசுக்கு தனித்துச் செலுத்திய வரி #ஆட்சிப்பாட்டம் எனப்பெற்றது.

அரசுக்கு மக்களால் ஆண்டுதோறும் செலுத்தப் பெற்ற காணிக்கை #ஆட்டைக்காணிக்கை எனப்பெற்றது. அவ்வரி நெல்லாகவோ, தானியமாகவோ இருந்தது.

நிலங்களுக்கு அமைந்த நீர்ப்பாசனத்தின் அடிப்படையில் பெற்ற வரி "ஒழுகு நீர்ப்பாட்டம்" எனப்பெற்றது.

வேளாண்மையின் பொருட்டு மதகுகளிலிருந்து முறையாக நீர்ப்பாய்த்துக் கொள்ளுவதற்கு அவ்வரியைச் செலுத்தினர்.

உப்பளங்களிலிருந்து உப்புப்பொதிகளை ஏற்றிவந்த மாடுகள், வண்டிகள் ஆகியவை செல்லும் பாதைகளுக்கு உரியதாக அரசு பெற்ற வரி #உப்புவழிச்சாரிகை எனப்பெற்றது.

இறையிலி நிலங்களுக்கு வரியிலாரும், வரிக்கூறு செய்வார்களும் கணக்கில் உட்படுத்தி எழுதியது #உள்வரி எனப்பெற்றது.

இது கணக்கில் எழுதியமைக்காக விதிக்கப்பெற்ற சிறு வரியாகும். தட்டாரின் பெயரால் அவர்களிடம் பெற்றவரி #ஊசிவாசி எனப்பெற்றது.

ஊர்ச்சபையார் விதித்த வரி முறைகள் பற்றிய வரையறை முறைகள் #ஊரிடுவரிபாடு எனப்பெற்றது.

தானியங்களின் தரம் காண்பாரும் தானியத் தரகரும் செலுத்திய வரி 'எடுத்துக்காட்டுப் பச்சை' எனப் பெற்றது.

புதுக்கோட்டை மாவட்டக் கல்வெட்டுக்களில் #எலவைவரி என்னும் சொல் இடம் பெற்றுள்ளது. அது ஓர் ஊரானது நாடென்னும் உயர்வைப் பெற்றமைக்கு இட்ட வரி என்பர்.

நகராட்சி, மாநகராட்சி ஆதலைப்போல உயர்வைக் குறிக்கும். ஏணியின் உதவியால் மரமேறிய ஈழவர்கள் செலுத்திய வரி #ஏணிக்காணம் எனப்பெற்றது.

ஏரிகளில் மீன்களை வளர்த்து பருவகால முறையில் அதற்கெனப் பெற்ற வரி #ஏரிமீன்பாட்டம் எனப் பெற்றது.

வழிச்சாரியாக வணிகர்கள் சுமந்து வந்து தெருக்களில் விற்பனை செய்த பொருள்கள் மீது விதிக்கப்பெற்ற வரி #சாரிகைவரி எனப்பெற்றது.

நூலுக்குச் சாயமிடும் சாலியக்குடியினர் அத்தொழில் செய்வற்குரிய காசாகச் செலுத்தும்வரி #சாலியக்காணம்' அல்லது #சாலியத்தறி எனப்பெறும்.

அரசு பெறும் இறைக்குட்பட்ட மிகச்சிறிய வரிகள் #சில்லிறை எனப் பெற்றன.

சிற்றூர்களில் அமைந்த விளைநிலங்களைப் பாதுகாத்தலின் பொருட்டு கிராமச்சபையார் நெல்லாகப்பெறும் வரி #சிறுபாடிக்காவல் எனப்பெறும்.

எண்ணெய் எடுக்கும் செக்குக்குரிய வரி #செக்காயம், #செக்குக்கடமை, #செக்கிறை' எனப்பெறும்.

நிலங்களைச் சீர்திருத்தி வேளாண்மை செய்யப் பெறுவதற்காகப் பெற்றவரி #செய்கடமை எனப் பெற்றது.

பண்டைக்காலத்தில் அரபுநாடுகளினின்றும் தமிழகத்திற்குக் கடல் வழியாக வந்து வாணிகம் நிகழ்த்திய சோனகரிடம் (யவனர்) பெற்றவரி #சோனகவரி எனப் பெற்றது.

அரசு வெளியிட்ட பொன், வெள்ளி, செம்பு ஆகிய உலோகங்களாலான நாணயங்களை அச்சிட்டமைக்காக அமைக்கப்பெற்ற தொழிற்சாலைகளுக்குரிய வகையில் அரசு மக்களிடம் பெற்ற வரி #அக்கசாலை எனப்பெற்றது.

அக்காசின் மதிப்பு அரசர்களின் ஆட்சிக்காலப் பொருளியல் நிலைக்கேற்ப பன்னிரண்டு அக்கம் ஒரு காசு ஒன்றும், எட்டு அக்கம் ஒரு காசு என்றும், ஆறு அக்கம் ஒரு காசு என்றும் கல்வெட்டுக்களில் மதிப்பிடப் பெற்றுள்ளன.

தெருக்களில் பகல் இரவு நேரங்களில் பண்டங்களை விற்பனை செய்தோர் #அங்காடிகள் எனப் பெற்றனர்.

அவர்கள் நாள்தோறும் பண்டங்களையும், பொருள்களையும் விற்பனை செய்தனர். அவர்கள் விற்பனை செய்த பொருள் மதிப்பீட்டுக்கேற்ப அரசு பொதுவாக #அங்காடிப்பாட்டம், #அங்காடிக்கூலி போன்வற்றை வரியாகப் பெற்றது.

வாரச்சந்தையில் கூடிய வணிகர்களிடமிருந்து வசூலிக்கப் பெற்ற (இடத்தின் அளவுக்கு ஏற்ப) வரிக்காக #அடிக்காசு எனப்பெற்றது.

பணியாளர்களிடமிருந்து பெற்ற வரிக்காக #அடிமைக்காசு எனப்பெற்றது.

அரசுக்குத் தனிப்பட்ட வகையில் வந்த வரி #அந்தராயம் எனப்பெற்றது.

தற்காலிகமாக இடம்பெற்ற சிறு வரி #அந்தராயக்காசு எனப்பெற்றது.

அரசுக்காணிக்யைாக ஆட்சிக்குட்பட்ட மக்கள் ஆண்டுதோறும் செலுத்திய சிறு வரி #அரசப்பேறு எனப்பெற்றது.

அரிசிகுற்றுவதற்காகவும், எடுத்து அளத்தற்குரிய அரிசி போன்ற தானியங்களுக்கு அரசு காசாகப் பெற்ற வரி #அரிசிக்காணம் எனப்பெற்றது.

அரசு ஊர்நிலங்களை அளந்து அதன் விளையுளுக்கு ஏற்ப நில உரிமையாளரிடமிருந்து பெறும் வரி #கடமை எனவும், அவ்வரிகளை முறையாக பெற்ற குழு #கடமைவாரியம் எனப்பெறும்.

ஆர் ஆண்டின் பருவகாலங்களுக்கு ஏற்ப பயிரிடப் பெற்ற வகைகளில் இறுதிப்பருவத்தில் விளைந்த விளையுளுக்குச் செலுத்தி வரி #கடைப்பாட்டம்.

திருமணத்தின் போது கொண்டவரும் கொடுத்தவரும் அரசுக்குச் செலுத்தியவரி #கண்ணாலக்காணம் எனப்பெற்றது.

கார் காலங்களில் விளைந்த நெல்லுக்குப் பெறப் பெற்றவரி #கார்க்கடமை.

கார்த்திகைப் பருவத்தில் விளைந்த நெல்லக்குப் பெற்றவரி #கார்த்திகைபச்சை' அல்லது #கார்த்திகைக்காசு' எனப்பெற்றது.

குடிமக்களால் அரசுக்குச் செலுத்தப் பெற்றவரி #குடிமை எனப்பெற்றது.

ஏரி, குளம் ஆகியவற்றைப் பாசனத்துக்கும்குடிநீருக்காகவும் பயன்படுத்திக் கொள்வதற்குச் செலுத்திய பொதுவரி #குளவடை எனப்பெற்றது.

பகைமுற்றிய போது குற்றமுடையாரைத் தண்டித்து அடக்கியமைக்கும் அவ்விருவருக்குமிடையே பகையின்றி உடன்பாட்டை உருவாக்கியதற்கும் அரசு ஆணையின் பொருட்டு வரிபெறப்பட்டது. அவ்வரி #சந்துவிக்கிரகபேறு எனப்பெற்றது.

#இடையர்கள் மந்தையாக ஆடு மற்றும் பசுக்களை வைத்திருந்தனர்.

அவர்கள் ஆண்டொன்றுக்குச் செலுத்த வேண்டிய முழு வரியை இன்னின்ன காலத்தில் பிரித்துச் செலுத்த வேண்டுமெனப் பிரித்து பெற்றவரி #இடைப்பாட்டம் எனப்பெற்றது.

பாகுபடுத்திப் பெறும் வரி #பாட்டம் எனப்பெறும்.

ஓரிடத்தில் கால்நடைகளைத் தங்கச்செய்தோர் தங்கள் பெயரால் செலுத்திய வரி #இலக்கைவிடப்பேறு எனப்பெற்றது.

சிறந்த காளைகளை வைத்திருப்போர் செலுத்தும் வரியாகவும் கொள்ளலாம் வெற்றிலை வாணிகம் செய்தாரிடம் பெற்றவரி #இலைவாணியபாட்டம் எனப்பெற்றது.

நீர் நிலைகளில் #வண்ணார் துணிகளைத் துவைத்தெடுத்தமைக்கும், அவற்றை உலர்த்தியமைக்கும் பயன்படுத்தியதற்காக அமைந்த பாறைப் பொதுவிடத்திற்காகப் பெற்றவரி #வண்ணார்கற்காசு' எனவும் #வண்ணார்ப்பாட்டம் எனவும் வழங்கப்பெற்றது.

விளையுளுக்குத் தகுதியற்ற தரிசாகக் கிடந்த நிலத்தை ‘வரிச்சிறையாய் கிடந்த பூமி' என்றும்,

அரசுக்குரிய இறைவரி ஆகியவற்றைக் குறித்துவைக்கும் ஏடு #வரிப்புத்தகம் என்றும்,

அப்பணியைச் செய்யும் அலுவலரை 'வரிப்புத்தகக் கணக்கு' என்றும்...

கிராமங்களில் உள்ள நிலங்களுக்குப் புதிய நிலவரிகளைப் பதிவு செய்தலை #வரியிலிடல்,

ஊரிற்கமைந்த இறைவரி, கடமை, ஆயம் உள்ளிட்ட வரிகளை நேரில் கண்டு கணக்கிட்டு விதிக்கும் அலுவலரை #வரியிலார்,

புதிய வரிகளை நில வரிக்கணக்குடன் சேர்க்கும் அலுவலரை #வரியிலீடு' என கல்வெட்டுக் குறிப்பிடுகின்றது.

#பொற்கொல்லர் பற்றடை (#பட்டறை) அமைத்து #கம்மத்தொழில் செய்வதற்கு ஆண்டொன்றுக்கு அமைந்த வரித்தொகையைப் பங்கிட்டுச் செலுத்தியதைத் #தட்டார்ப்பாட்டம் என்பர்.

அவர்கள் #பற்றடை அமைத்துத் தொழில் செய்யின் அதற்காகச் செலுத்தும் வரி #தட்டொலி எனப்பெறும்.

அரசு ஆடைகளை நெய்தவரிடம் தறிக்கு இவ்வளவு காசு என விதித்துப்பெறும் வரி #தறிக்கடமை எனப்பெறும்.

அத்தறி #அச்சுத்தறி, #பறைத்தறி, #சாலியத்தறி என மூன்று வகைப்படும். #தறியிறை என்பதும் அதுவே ஆகும்.

அரசன் தன்னாட்சிக்குட்பட்ட நாட்டைச் சுற்றிப்பார்க்குங்கால் ஒவ்வொரு ஊருக்கும் வருகை தந்தமைக்கான செலவினை ஈடு செய்ய ஊரார் செலுத்திய வரி #திருவெழுச்சிகுடிமை எனப் பெற்றது.

ஆண்டொன்றில் அமைந்த வரியைப் பருவகாலங்களில் பொருள்களாகவோ தொகையாகவோ செலுத்தியது #பச்சைப்பாட்டம் எனப்பெற்றது.

பருத்திச்செடிகளை வளர்த்துப் பஞ்செடுத்துப் பிரித்தமைக்காக செலுத்திய வரி #பஞ்சுபீலி எனப்பெற்றது. பஞ்சுப்பொதியின் மீது விதிக்கப்பெற்ற வரி என்றும் கூறுவர்.

பலவகையான சிறு வணிகரிடம் பெற்றவரி #பட்டடை எனப்பெற்றது.

#படுகை, #களத்துமேடு ஆகிய புன்செய் நிலப்பகுதிகளில் பயிர்களை விளைவித்த குடிமக்களிடத்துப் பெற்றவரி என்றும் கூறுவர்.

கல்வெட்டுக்களில் இச்சொல் #பலபட்டடை' எனக் கூறப்பெற்றுள்ளது.