Thread by @swathikasarah

இன்றைய digital உலகில் நூலகம் அவசியமா?
மின் புத்தகங்கள் அல்லது ஆடியோ புத்தகங்கள் எனப்படும் புத்தகங்களின் ஆன்லைன் பதிப்புகள் அதிகரித்து வருவதால், இந்த டிஜிட்டல் யுகத்தில் இன்னும் நூலகங்கள் தேவையா என்ற கேள்வியை எதிர்கொள்கிறோம். அதற்கான பதில் ஆமாம்!!

உலகத்தில் உள்ள எல்லா புத்தகங்களும் digital ஆக்கப்பட்டுவிட்டதா? இலவசமாக எல்லா புத்தகத்தையும் டிஜிட்டலில் பார்க்க எல்லாரிடமும் வசதி இருக்கிறதா? அதற்கு net, data எல்லாம் எல்லோருக்கும் இருக்கிறதா? எல்லா ஊரிலும் இணைய சேவை இருக்கிறதா? கணினி அல்லது கைபேசி எல்லாரிடமும் இருக்கிறதா?

அதை எப்படி உபயோகிக்க வேண்டும் என்று எல்லோரும் அறிந்து இருக்கிறார்களா? இப்படி பல கேள்விகளுக்கு பதில் இல்லாத சூழலில் நூலகம் அவசியம்தான்.
நூலகம் இன்றைய காலத்திற்கேற்ப மாறிக்கொண்டு வருகிறது digital புத்தகங்களும் இலவச இணையசேவையுடன் (free wifi) நூலகங்களில் வழங்கப்படுகிறது.

பல மாணவர்கள் நூலகங்களுக்கு சென்று தான் இலவச கணிணி இணைய சேவையை உபயோகிக்கிறார்கள். உலகில் 230,000 பொது நூலகங்கள் இருக்கின்றன. முன்னேறிய நாடுகளான அமெரிக்கா சீனா போன்றவை கூட இன்னும் புதிய நூலகங்களை திறக்கின்றன.

இணையசேவை ஒன்றும் மலிவானது அல்ல. கிராமங்களுக்கு கேபிள் மூலம் இணைய சேவை கொண்டு வருவதோ அல்லது கைபேசியில் இணையத்தை பார்ப்பதோ மலிவு அல்ல அதுவும் ஏர்டெல் போன்றவை தற்போது விலையை ஏற்றி கொண்டு இருக்கும் காலத்தில் bsnl கொஞ்சம் கொஞ்சமாக சேவையை குறைத்து கொண்டு வரும் நேரத்தில்

எப்போது வேண்டுமானாலும் ஜியோ சேவை கட்டணத்தை ஏற்ற கூடும் என்கிற பீதியில் இருக்கும்போது அனைவருக்கும் இணைய சேவை தடையின்றி கிடைக்கும் என்பது என்ன நிச்சயம்?
இன்று, தகவல்களை ஆன்லைனில் எளிதாக அறிய முடியலாம். ஆனால், பிராட்பேண்ட் அல்லது இணைய சேவையை உபயோகிக்க தெரியாதவர்களை என்ன செய்வது?

அவர்களுக்குத் தேவையான தகவல்களை அவர்கள் எவ்வாறு தெரிந்து கொள்ள முடியும்? அதனால்தான் நூலகங்களின் இருப்பை அழிக்க முடியாது. நூலகங்கள் மூலம், அனைவரும் தகவல்களைப் பெற முடியும்.

உலகளாவிய ஆன்லைன் ஊடுருவல் பரவலாக இருந்தாலும், அனைவருக்கும் பிராட்பேண்ட் சேவை கிடைப்பது இல்லை.

கிடைத்த எல்லோருக்கும் அதை உபயோகப்படுத்த தெரிவதில்லை. நூலகம் என்பது மாணவர்களுக்கும் சிறுவர்களுக்கும் மட்டுமே ஆனது அல்ல. அது எல்லா தரப்பு வயதினர்களுக்கும் உரித்தானது. வயதானவர்களும் நூலகத்தை பயன்படுத்துகின்றனர்.

எல்லா மக்களுக்கும் இணையத்தையும் இணையத்தில் புத்தகங்களையும் இலவசமாக வழங்க முடியுமா? இவர்களில் பெரும்பாலானவர்களுக்கு இணையத்தை உபயோகப்படுத்த தெரிந்து இருப்பதில்லை. பெரும்பான்மையான மக்கள் இணைய சேவையை பெற்று இருந்தாலும், IT (information technology) literacy குறைவாக தான் இருக்கிறது.

பல மாணவர்களால் இன்னும் தேடுபொறி தளங்களில் ஒரு எளிய விஷயத்தை தேடி கண்டெடுக்க முடியவில்லை. கூகுள் தேடலில் தோன்றும் முதல் கட்டுரையையோ கிளிக் செய்வதே பயனர்களின் பொதுவான நடத்தை. அது எந்த அளவிற்கு அவர்களுக்கு உபயோகமாக அல்லது உண்மையாக இருக்கும் என்பது நிச்சயமில்லை.

எனவே, நமது சமூகத்தில் தொழில்நுட்பம் முக்கியப் பங்காற்றினாலும், நூலகங்கள் பொது மக்களுக்கு வழங்கக்கூடிய தகவல்களால் முக்கியமானவை. தொழில்நுட்பக் கருவிகளைப் பயன்படுத்துவதில் திறமை இல்லாதவர்களும் கூட பொது நூலகத்திற்கு சென்று நூலகர் மூலமாக தேவைப்படும் புத்தகங்களை எடுப்பதோ

அல்லது அவரின் துணை கொண்டு online job அல்லது தேர்வுக்கு விண்ணப்பிக்க முடியும். வீட்டில் இணைய சேவை வைத்து கொண்டு அதை எப்படி பயன்படுத்துவது என்று அறியாதவர்கள் என்ன செய்ய முடியும். எந்த புத்தகம் எங்கு இருக்கிறது.

எந்த போட்டி தேர்வுக்கு எந்த புத்தகத்தை படிக்க வேண்டும்? என்று எல்லாம் சொல்ல நூலகத்தில் நூலகர் உண்டு.
குழந்தைகளுக்கு வாசிப்பு பழக்கத்தை ஏற்படுத்த நூலகங்கள் காலத்தின் தேவை.

நமது சமூகம் வாசிப்பில் இருந்து வெறுமனே திரையைப் பார்ப்பதற்கு நகர்கிறது, இதன் காரணமாக மாணவர்கள் படைப்பு மற்றும் பகுப்பாய்வு திறன்களை இழக்கின்றனர். உலகமே டிஜிட்டல் மையமாக ஆனாலும் printed books வழக்கொழிந்து போனாலும் டிஜிட்டல் நூலகங்கள் இருக்கும்.