Thread by @swathikasarah

அகக்கண்ணாடி
ஒரு மனநல மருத்துவரின் டைரிக்குறிப்புகள்

டாக்டர் ரைஸ் இஸ்மாயில்

2021 முடியும் போது ஒரு நல்ல புத்தகத்துடன் முடித்து இருக்கிறேன் என்கிற நிறைவு இந்த புத்தகத்தை முடித்ததும் வந்தது.

நடைமுறை வாழ்வியல் சார்ந்த அறிவியல் மனப்பான்மையை மக்களிடம் வளர்க்க வேண்டும் என்ற நோக்கில் “வாழ்க்கைக்கான அறிவியல்" (Science of Living) எனும் தலைப்பில், இந்நூலை நிகர்மொழி பதிப்பகம் வெளியிட்டு இருக்கிறது. மனநலத்திற்கு நமது சமூகம் இன்றளவும் முக்கியத்துவம் கொடுப்பது இல்லை.

எல்லாம் போகப் போக சரியாப் போயிடும், பூஜை போட்டா சரியா போயிடும், கல்யாணம் செய்தால் சரியா போயிடும், tour போனால் சரியா போயிடும் என்று அலட்சியமாக தான் கையாளப்படுகிறது. மருத்துவ ஆலோசனை பெறுவதை அவமானமாகவும் கருதுகிறது.

இவை எல்லாம் எத்தனை தவறு என்பதை டாக்டர் ரைஸ் இஸ்மாயில் இந்த புத்தகத்தில் அழகாக விளக்குகிறார்.
கடந்த லாக்டவுன் காலத்தில் அவரது முகநூல் பக்கத்தில் கடந்த 19 வருடங்களில் அவர் சந்தித்த பல நோயாளிகளின் சுவாரஸ்யமான கதைகள் அடங்கிய தகவல்களையும்,

மனநலம் பற்றிய விழிப்புணர்வு கட்டுரைகளையும் பகிர்ந்து இருக்கிறார். அவை வாசகர்கள் மத்தியில் நல்ல வரவேற்பை பெற்று இப்போது புத்தகமாக வெளி வந்திருக்கிறது.
பொதுவாக மனநலம் சார்ந்த புத்தகங்கள் எடுத்த 5 நிமிடத்தில் நமக்கு தூக்கத்தை வரவழைக்கும் வல்லமையை பெற்று இருக்கும்.

ஆனால் இந்த புத்தகம் எளிய நடையில் நகைச்சுவை கலந்து படிக்கச் சுவாரஸ்யமாக இருக்கிறது. 189 பக்கங்கள் கொண்ட இந்த புத்தகத்தை ஒரே நாளில் படித்து விடலாம். பொதுவாக எளிய நடையில் அறிவியல் கருத்துக்களை விளக்க நினைக்கையில் அதை தவறாக மக்கள் புரிந்து கொள்ள கூடிய சாத்தியக்கூறுகள் அதிகம் உண்டு.

இந்த பிரச்சனையை இஸ்மாயில் மிக நேர்த்தியாக கையாண்டு இருக்கிறார்.
மனநலம் மட்டுமன்றி குழந்தை வளர்ப்பு, child abuse, சாமியார்கள், அவர்களது மன ஓட்டங்கள், மிக முக்கியமாக மாற்று மருத்துவ முறைகளை பற்றியும் சொல்லி இருக்கிறார்.

மதங்களை பற்றி விளக்கும் போதெல்லாம் (சுற்றி சுற்றி இங்கேயே வருகிறாள் என்று நினைக்க வேண்டாம்) உளவியல் பற்றி அதிகம் விளக்க வேண்டிய தேவை வருவதுண்டு.

மனித மனமும், மூளையும் இருக்கிறதே அது செய்யும் மாயாஜாலங்கள் ஒரு கடல் போல என வைத்து கொண்டால் அதில் இறங்க இந்த புத்தகம் ஒரு படகு போல நமக்கு உதவி செய்கிறது. கட்டாயம் படிக்க வேண்டிய புத்தகம்.

இந்த புத்தகத்திலிருந்து 👇

POCSO (Protection of Children from Sexual Offences) எனும் சட்டம் பற்றி உங்களுக்குத் தெரிந்திருக்கலாம். அதற்கும் ஏற்கெனவே இருக்கும் IPC-Indian Penal Code சட்டத்திற்கும் என்ன வித்தியாசம்?

2012 ல் குழந்தைகள் தினத்தன்று இந்தச் சட்டம் பிரத்யேகமாக அறிமுகப்படுத்தப்பட்டது. ஏன்? IPC சட்டங்களின் படி, பாலியல் துன்புறுத்தல் என்பது ஆணின் பிறப்புறுப்பை பெண்ணின் பிறப்புறுப்பினுள் நுழைப்பது என்பது மட்டும் தான்.

அப்படி இருந்ததால் நிறைய காமுகர்கள் தண்டனைகளிலிருந்து சுலபமாகத் தப்பி விட்டிருந்தார்கள் ஆனால் POCSO சட்டப்படி தவறாக தொடுதல், நேரிலோ இனையத்தின் மூலமாகவோ தவறான விசயங்களைப் பேசி மதி மயக்குதல், stalking எனும் பின் தொடர்தல் போன்றவைகளும்

ஆண் குழந்தைகளுக்கு எதிரான துன்புறுத்தல்களும் (முதன்முதலாக) பாலியல் துன்புறுத்தல்களாக சேர்ந்துக் கொள்ளப்பட்டன.

இதில் இருக்கும் சில முக்கியமான விசயங்கள் :

1. இந்தச் சட்டப்படி, குற்றம் சாட்டப்பட்டவன் குற்றமற்றவன் என நிரூபிக்கும் வரை குற்றவாளி தான்.

குற்றமற்றவன் என திரூபிப்பது அவன் கையில் தான் இருக்கிறது. அவன் குற்றவாளி என நிரூபிக்கும் கடமை சம்பந்தப்பட்ட குழந்தைக்கு இல்லவே இல்லை.

2 கேள்விக் கணக்கு கேட்கும் சூழ்நிலை அந்தக் குழந்தைக்குப் பதட்டம் ஏற்படுத்தாத சூழ்நிலையாக இருக்க வேண்டும்.

வீட்டில் வைத்து, பெற்றோர் முன்னிலையில் தான் கேள்வி கேட்கப்பட வேண்டும். பெண் பிள்ளைகளை பெண் காவலர்கள்தான் கேள்விக் கேட்பார்கள். காவலர் சாதாரண உடையில்தான் இருக்க வேண்டும். அவர் சப்-இன்ஸ்பெக்டராகவோ அதற்குமேல் கேடராகவோ இருக்க வேண்டும்.

3. மருத்துவ பரிசோதனை, பெண் குழந்தைகளுக்கு பெண் மருத்துவர் தான் செய்ய வேண்டும். அதுவும் பெற்றோர் அல்லது கார்டியன் முன்னிலையில்.

4. வழக்கு நடக்கும் கோர்ட்டும் குழந்தைகளுக்கு ஏற்றாற்போல் இருக்க வேண்டும். அடிக்கடி 'ப்ரேக்' விடவேண்டும்.

குறுக்கு விசாரணை, காயத்தை ஞாபகப்படுத்தும் வகையிலோ அதிகப்படுத்தும் வகையிலோ (Re-traunatising) இருக்கக்கூடாது. மேலும் எக்காரணம் கொண்டும் குற்றவாளி குழந்தையின் கண்ணில் படாமல் பார்த்துக் கொள்ள வேண்டும்.

5. எக்காரணம் கொண்டும் குழந்தையின் அடையாளம் வெளியே தெரியாமல் பார்க்க வேண்டும்.

2019ல் இந்தச் சட்டம் திருத்தி அமைக்கப்பட்டதில், 16 வயதிற்கு கீழ்ப்பட்ட குழந்தைகளுக்கு எதிராக நடக்கும் வன்கொடுமைக்கு 10 வருட சிறைத் தண்டனை என்பது 20 வருடமாக நீட்டிக்கப்பட்டது.

7. இந்தச் சட்டப்படி, ஒரு குழந்தைக்கு எதிராக பாலியல் துன்புறுத்தல் நடக்குது எனத் தெரியவரும் பட்சத்தில், அதை காவல்துறைக்குத் தெரிவிப்பது ஒவ்வொருவருக்கும் mandatory obligation எனும் கட்டாயக் கடமையாகிறது.

இந்த புத்தகத்தை வாங்க :
periyarbooks.in/agakkannaadi.h…

@PeriyarBooks