Thread by @LtColShahid

#History
تاریخ کے اوراق سے
دُکھی ٹرین کی کہانی
زیرِ نظر تصویر میں نظر آنے والا دُخانی ریلوے انجن جو دیکھنے میں عام انجن کا بچہ لگتا ہے اپنے اندر ایک تاریخ سمیٹے ہوئے ہے
⏬

ابتداء ہوتی ہے انگریز راج سے جب 1882 میں حیدرآباد (سندھ) اور جودھپور (انڈیا) کو ملانے کے لئے صحرائے تھر میں ایک چھوٹے گیج کی ریلوے لائن بچھانے کا فیصلہ کیا۔ اس منصوبے کے لئے مہاراجہ جودھپور اور مہاراجہ بیکانیر نے سرمایہ فراہم کیا اور اس کی تکمیل 1911 میں ہوئی۔
⏬

چھوٹا گیج ہونے کے ناطے مقامی لوگ اسے تین فُٹی ریل گاڑی بھی بولتے تھے۔ 476 کلومیٹر طویل اس پٹڑی کا تقریباً 210 کلومیٹر حصہ پاکستان میں سرحدی گاؤں کھوکھراپار تک ہے۔
ٹرین سروس کے اجراء نے صحرا میں ایک نئی جہت کو متعارف کرایا۔ جب کوئل کی طرح کُوکتے بھاپ کے انجن میں کوئلہ جلتا
⏬

اور نیلگوں آسمان میں بل کھاتا سیاہ دھواں اوپر اٹھتا تو کسی شاعر کی محبوبہ کی گھنی زلفوں کی تشبیہ دکھائی دیتا تھا۔ صحرائے تھر کے باسیوں کے لئے جہاں یہ ایک اچھوتا عجوبہ تھا وہیں ان کے لئے نقل و حمل میں بے بہا آسانیاں بھی پیدا ہو گئیں وہ لوگ صحرا سے نکلے، شہروں کی طرف آئے
⏬

تو روزگار کے مواقع بھی میسر ہوئے اور ان کے طرزِ زندگی میں کچھ مثبت تبدیلیاں آئیں
تقسیم ہند تک یہ ٹرین جاری رہی اور پھر بوجوہ بند کر کے کوٹری (حیدرآباد) سے براستہ میرپور خاص کھوکھراپار تک محدود کر دی گئی۔
⏬

تھر کے باسی اس ٹرین کو "دُکھی" کے نام سے پکارتے تھے کیونکہ بھاپ کی طاقت سے بجنے والی ریل کی کُوک کسی دُکھی کی فریاد لگتی تھی اور یہ نام ایسا زبان زدِ عام ہوا کہ ریلوے ملازمین بھی یہی نام استعمال کرتے نظر آتے تھے
دُکھی ٹرین صحرائے تھر کے مکینوں کے لئے صرف آمد و رفت
⏬

کا ذریعہ ہی نہیں تھی بلکہ ایک عرصہ تک پینے کا پانی کی رسائی کا موجب بھی تھی ٹرین کے ساتھ تین یا چار پانی والی بوگیاں لگائی جاتی تھیں جن کو میرپور خاص میں بھرا جاتا تھا۔ کھوکھراپار کی جانب ٹرین کے سفر کے دوران ہر سٹیشن پر دور دراز سے آئے لوگوں کا ہجوم ہوتا تھا
⏬

جو پانی کے حصول کی خاطر میلوں پیدل چل کر آتے تھے۔ نوے کی دہائی میں چھور چھاؤنی بننے کے بعد پاک فوج نے پورے علاقے میں پانی کی ترسیل کے لئے پائپ لائنوں کا جال بچھا دیا اور دُکھی ٹرین کو اس ڈیوٹی سے استثنیٰ مل گیا
جب محمد خان جونیجو وزیراعظم بنے
⏬

تو انہوں حیدرآباد تا میرپور خاص بڑے گیج کی پٹڑی ڈلوا دی اور اس طرح دُکھی میرپور خاص سے کھوکھراپار تک محدود ہو گئی
سال 2005 میں انڈیا اور پاکستان کے درمیان ٹرین چلانے کا سمجھوتا ہوا تو تھر ایکسپریس کے نام سے کراچی تا جودھپور ٹرین چلانے کا منصوبہ بنایا گیا
⏬

لہذا میرپور خاص سے بارڈر تک بھی چھوٹی گیج کو بڑی گیج میں تبدیل کر دیا گیا اور چھوٹی گیج پر چلنے والے بھاپ کے انجن اور چھوٹی چھوٹی بوگیاں طاقِ نسیاں ہو کر قصۂ پارینہ بن گئیں