Thread by @Raamraaj3

கூட்டுறவு நகை கடன் தள்ளுபடி: வாடிக்கையாளர்கள் ஏமாற்றம்

சென்னை : கூட்டுறவு வங்கிகளில், 5 சவரன் வரை நகை கடன் தள்ளுபடி பெற்ற பயனாளிகளுக்கு, நகைகளை திரும்ப வழங்காததுடன், அதிகாரிகள் உரிய பதில் அளிக்காமல் அலட்சியம் செய்வதால், வாடிக்கையாளர்கள் ஏமாற்றம் அடைந்துள்ளனர்.

https://twitter.com/dinamalarweb/status/1498545107817140224

கூட்டுறவு வங்கிகள் மற்றும் தொடக்க வேளாண் கூட்டுறவு கடன் சங்கங்களில், 5 சவரன் வரையிலான நகைகளை அடமானம் வைத்து பெற்ற கடன்களை, தமிழக அரசு தள்ளுபடி செய்துள்ளது.இதற்கு, பல்வேறு நிபந்தனைகளின் கீழ் பயனாளிகள் தேர்வு செய்யப்பட்டு உள்ளனர்.

அவர்களின் பட்டியல், அனைத்து கூட்டுறவு வங்கிகள் மற்றும் கடன் சங்கங்களுக்கு அனுப்பப்பட்டு உள்ளன.

நகர்ப்புற உள்ளாட்சி தேர்தல் நடக்காத ஊரக பகுதிகளில், பயனாளிகளிடம் நகைகளையும், தள்ளுபடி சான்றும் வழங்கும் பணி, பிப்., 10ம் தேதி துவங்கியது.

நகர்ப்புற உள்ளாட்சி தேர்தல் முடிந்ததால், அந்த இடங்களில் உள்ள வங்கிகளும் நகைகள் வழங்கும் பணியை துவங்கியுள்ளன.ஆனால், வங்கிகள் மற்றும் சங்கங்களில் பயனாளிகள் பட்டியல் ஒட்டப்படாமல் இருப்பதுடன், நகைகளை தராமல் அலட்சியம் செய்வதால், வாடிக்கையாளர்கள் ஏமாற்றம் அடைந்துள்ளனர்.

இதுகுறித்து, வாடிக்கையாளர்கள் கூறுகையில், 'நகை அடகு வைத்ததற்கான ஆவணங்களை காட்டி நகைகளை திரும்ப கேட்டால், உங்கள் பெயர் பட்டியலில் இல்லை என்கின்றனர் அதிகாரிகள். பட்டியலை காட்டுமாறு கேட்டால் மறுக்கின்றனர்' என்றனர்.

தொலைபேசி எண் வெளியிடப்படுமா?
கூட்டுறவு துறை சார்பில், நகைக்கடன் தள்ளுபடி பயனாளிகளின் விபரம், நகைகளை பெறும் வழிமுறைகள் உள்ளிட்டவை தொடர்பான எந்த விபரமும், அதிகாரப்பூர்வமாக தெரிவிக்கப்படவில்லை.அந்த விபரங்களை அதிகாரிகளும் தெரிவிக்காமல் இருப்பதால், வாடிக்கையாளர்கள் அவதிப்படுகின்றனர்.

எனவே, நகை கடன் தள்ளுபடி குறித்த சந்தேகங்களை விளக்க, தனி தொலைபேசி எண் வெளியிட வேண்டிய அவசியம் ஏற்பட்டுள்ளது.