Thread by @DrNagajothi11

#திருக்குறள்

#காமத்துப்பால்

உலகப்பொதுமறை திருக்குறள் மனித வாழ்விற்கு தேவையான அத்தனை விஷயங்களையும் சொல்கிறது. மூன்று பால்கள் கொண்டு அமைந்த திருக்குறளில், அறத்துப்பால் பொருட்பால் என இவ்விரு பால்களிலும் உள்ள குறள்களை பள்ளியிலும் பல பொது இடங்களிலும் படித்திருப்போம்.

(1)

மனித வாழ்வில் இன்றியமையாத இன்பம் குறித்து பேசும் காமத்துப்பால் வெகுஜன மக்களால் பெரிதாய் பேசப்படுதில்லை, காரணம் காமம் பேசாப்பொருள் என சமூகம் கற்பித்து வைத்துள்ளது தான்.

காமம் இப்படி பேசாப்பொருளாக இருப்பது தான் வாழ்வில் அடிப்படையான பல பிரச்சனைகளுக்கு காரணம்.

(2)

மிக முக்கியமாக எதிர்ப்பாலினம் குறித்து தவறான பார்வையையும் குறுகிய மனநிலையையும் ஏற்படுத்துகிறது. இந்த மாயை விலகி ஆரோக்கியமான மனநிலையுடன் வாழ்வை அணுக முதலில் காமம் குறித்த புரிதலை உள்வாங்க வேண்டும்.

(3)

வெறும் உடலுறவு மட்டுமல்ல பல மனித நுண்ணுணர்வுகள் சேர்ந்தது தான் காமம், இதை குறித்து திருக்குறளின் காமத்துப்பாலில் மிக ஆழமாகவும் அழகாகவும் சொல்லப்பட்டுள்ளது. பாலின ஈர்ப்பு, அதில் ஏற்படும் ஊடல் கூடல் என அனைத்தும் பேசப்பட்டுள்ளது.

(4)

காமத்துப்பாலில் உள்ள குறள்கள் குறித்து இனி வரும் நாட்களில் பார்க்கலாம்.

காமத்துப்பாலில் உள்ள களவியலில் உள்ள தகையணங்குறுத்தல் அதிகாரத்தில் சொல்லப்பட்டுள்ள முதல் பாடலை இன்று பார்ப்போம்.

களவியல் என்பது ஆணும் பெண்ணும் ஒருவர் மீது ஒருவர் மயங்கி காதல் கொள்ளுதலை குறிக்கும்.

(5)

காதல் மயக்கம் குறித்து பல பாடல்கள் உள்ளது, களவியலின் முதல் அதிகாரமான தகையணங்குறுத்தலின் அர்த்தம் என்ன என பார்த்தால்,

தகை என்றால் அழகு, அணங்கு என்றால் வருத்தம், மற்றும் உறுத்தம் என்றால் மிக உண்டாக்குதல். அதாவது, அழகு மிகவும் வருத்துதல், சுருக்கமாக அழகு மயக்குதல் என பொருள்.

(6)

இந்த அதிகாரம் முழுக்க பெண்ணின் அழகில் மயங்கிய ஆணின் எண்ணங்களை வெளிப்படுத்தும் விதமாக அமைந்துள்ளது.

தகையணங்குறுத்தலில் உள்ள முதல் குறள்,

அணங்குகொல் ஆய்மயில் கொல்லோ கனங்குழை
மாதர்கொல் மாலும்என் நெஞ்சு (குறள் -1081)

இதன் பொருள் இவ்வாறாக வருகிறது.

(7)

அணங்கு என்பதற்கு தேவதை என்ற பொருளும் உண்டு, ஆய்மயில் என்றால் அழகான வண்ண மயில் எனவும், கனங்குழை/கணங்குழை என்றால் கனமான காதணி எனவும் பொருள்ப்படும். மாதர் என்றால் பெண், மாலும்என் நெஞ்சு என்றால் என் சிந்தையை மயக்குகிறவள் என பொருள்.

(8)

அதாவது எதிரே உள்ள பெண் தேவதையா? அழகிய வண்ண மயிலா? அல்லது கனமான காதணி அணிந்த மனிதப் பெண்தானா? அவள் அழகில் எனது சிந்தை மயங்கி நிற்கின்றதே.

என தன் எதிரே உள்ள பெண்ணை கண்டு அவள் அழகில் மயங்கிய ஆண் அவளை வர்ணிப்பதாக அமைந்துள்ளது இந்த குறள்.

(9)

ஆணுக்கு பெண்ணின் மீதான மயக்கத்தை மிக அழகாக வர்ணிக்கும் இந்த குறள், பார்த்த மாத்திரத்தில் அவளின் காதணி முதல் அவளின் வனப்பு வரை வர்ணித்து சொல்வதிலிருந்து அவன் ரசனையின் ஆழத்தையும் காட்டுகிறது.

அடுத்த குறளை குறித்து அடுத்த இழையில் பார்க்கலாம்.

(தொடரும்)