Thread by @DrNagajothi11

#BookReview

#Thread

வானில் மிதக்கும் மேகங்களில் நமக்கு பிடித்த உருவங்களை பொருத்திப் பார்த்து விளையாடாதவர்கள் யாரும் இருக்க முடியாது. நம்மைப் போல மேகங்களில் மிதந்து வரும் உருவங்களுடன் விளையாடி சிரித்து மகிழும் மென் வண்ணத்துப்பூச்சி இவள்.

(1)

முதுகில் சதை திரண்டு பாரத்தைக் கொடுத்தாலும், நீண்ட நெடிய வாழ்க்கை பயணக் கனவுகளை சுமந்த அவள், அதனுடன் சேர்த்தே ஒவ்வொரு அடியிலும் அந்த பயணத்தில் வர இருந்த வலிகளை தாங்கும் வலிமையையும் சுமந்தாள்.

தன் கனவுகளை மட்டுமல்ல தன்னை சுற்றி இருந்தவர்களையும் சேர்த்தே சுமந்தாள்.

(2)

கணேசன், அலங்காரவேலன், அப்புனு, ஜோதி, தவமணி, தனக்கே தனக்கான ரேவதி என அனைவரையும் சுற்றி இருந்த அவள் கனவுகள் கொஞ்சம் கொஞ்சமாக உடைந்து நொருங்கிய பின்னும், உற்ற தோழியாக உடன் இருந்த உடன்பிறவா சகோதரி மல்லிகா அக்கா, அவர் மகன் சிவக்குமார் என வாழ்வில் ஏதோ ஒரு பிணைப்புடன் ஓடினாள்.

(3)

மல்லிகா அக்கா காண்பித்த வழியில் சந்தித்த குப்புவின் கணவர் சாம்பவமூர்த்தி அய்யாவின் துணைக் கொண்டு வாழ்வின் அடுத்த கட்டத்தை எட்டியவள், தன் வாழ்க்கை தொலைந்த இடத்திலேயே அதை தேடி அடைய மீண்டும் சிந்தாதிரிப்பேட்டை நூலகதிற்குள் நுழைகிறாள்.

(4)

அவளின் சிறுவயது நினைவுகளை தாங்கி நின்ற அந்த நூலகத்தை மீண்டும் உயிர் பெற வைப்பவள், அதை சுற்றி இருந்த மக்களின் வாழ்வையும் தெரிந்தோ தெரியாமலோ உயிர்ப்பிக்கிறாள். அங்கு அவளுக்கு கிடைத்த பூர்ணிமா, மீனாளு என அனைவரின் அன்பிலும் மூழ்கும் அவள்,

(5)

பம்பிங் ஸ்டேசன் மக்களின் வாழ்வில் பிரிக்க முடியாத அங்கமாய் மாறுகிறாள். அங்குள்ள குழந்தைகளின் எதிர்காலத்தை சிறப்பாக கட்டமைக்க உறுதியான அடித்தளத்தை இடுகிறாள். இப்படி சமூக பொருளாதாரம் என அனைத்திலும் அம்மக்கள் உயர குரல் கொடுக்கிறாள்.

(6)

சாம்பவமூர்த்தி அய்யா அறிமுகப்படுத்திய அண்ணல் அவர்களின் வாக்கை அடிக்கடி நினைத்தவள், தனக்கு கிடைத்ததில் சிறிதளவாவது சமூகத்திற்கு திருப்பி செய்ய வேண்டும் என முனைப்பு காட்டுகிறாள். இயல்பாக இயங்கும் இவள், எழியவர்களுக்கான சமூக பார்வையையும் இயல்பாகவே உள்ளிழுத்துக் கொள்கிறாள்.

(7)

யாரும் எதிர்பாராத ஒரு நாளில் மேகங்களுடன் விளையாட மேகங்களுக்கு நடுவில் சென்று ஒளிந்து கொள்கிறாள், ஆனாலும் அவள் நினைவுகள் அவளை சுற்றி இருந்த மக்களின் வாழ்வில் தலைமுறைகள் கடந்தும் கடத்தப்படுகிறது என்பது தான் அவள் வாழ்ந்த வாழ்வின் அர்த்தமாகி நிற்கிறது.

(8)

இத்தனையையும் வாழ்வில் சுமந்து பால்கனியில் நின்று மேகம் பார்க்கும் "கோசலை". உயரத்தில் குறைவானலும், அவள் வாழ்ந்த வாழ்வில் நிகரில்லா உயரம் சென்று, மேகத்துடன் கலந்துவிட்டவள்.

தோழர் தமிழ்ப்பிரபா @Lovekeegam அவர்கள் எழுதிய "#கோசலை" நாவல் கோசலையின் கதை மட்டுமல்ல,

(9)

பல கேள்விகளையும் அசாத்திய நம்பிக்கையும் நம்முள் எழுப்பும் ஒரு சிறந்த படைப்பு. வாய்ப்புள்ள தோழர்கள் நிச்சயம் படித்துப் பாருங்கள்.

தோழர் தமிழ்ப்பிரபா அவர்களின் "கோசலை" நாவல்.

End ❤️