Thread by @ThanjaiMadhavan

அன்புடையீர், வணக்கம்.

"முறிகள்..."

தமிழகத்தில் சுமார் 110 ஆண்டுகளுக்கு முன்பு வரை #முறி என்ற சொல் அன்றாடப் பொருளாதார வாழ்வில் நிறைய வழங்கிய சொல்லாகும். இன்று அது வழக்கொழிந்து ஆய்வுக்குரியதாகிவிட்டது.

#பத்திரம் என்ற சொல் இன்று முறியின் இடத்தில் வழங்கி வருகின்றது!

சென்ற நூற்றாண்டு வரை ஒருவருக்கு ஒருவர் கொடுத்தல், வாங்குதல், விற்றல் போன்ற ஆவணப் பதிவுகளைச் செய்து அவற்றை #முறி என்றே அழைத்தனர்.

#முறி என்பதற்குக் கொழுந்தாக உள்ள இலை என்று பொருள் உண்டு.

#தொல்காப்பியம் இதனை ''இலையே, முறியே, தளிரே, தோடே'' என (தொல். பொருள் 642) உணர்த்துகின்றது!

#பனை ஓலையில் குருத்தாக உள்ளதையே ஏடுகளாகப் பயன்படுத்தி ஆவணங்கள் எழுதப்பட்டதால் கொழுந்து இலையில் எழுதிய அவற்றை #முறி என்றே அழைக்கும் மரபு உண்டாகியிருக்க வேண்டும்.

ஆவணங்களை #முறி என்று அழைக்கும் மரபு சென்ற நூற்றாண்டு வரை இருந்த போதிலும் இது பன்னெடுங்காலமாகத் தமிழகத்தில் வழங்கித் தொடர்ந்து வந்த மரபுதான்.

கல்வெட்டுகளிலும், இலக்கியங்களிலும் ஆவணத்தை #முறி என்று அழைக்கும் மரபு இருந்ததைக் காண்கிறோம்.

#மதுரை மாவட்டம் வெள்ளாளப்பட்டியிலிருந்து பல ஓலைச்சுவடிகள் பெறப்பட்டு, தமிழ்நாடு அரசு தொல்பொருள் ஆய்வுத்துறை சேலத்தில் நடத்திய கருத்தரங்கில் திரு பொ. இராசேந்திரன் அவர்களால் ஒரு கட்டுரை வாசிக்கப்பட்டது.

அவ்வேடுகள் அவை கொண்டுள்ள வாசகங்களால்,

🔹நஞ்சைவிலை முறி
🔹குடிவிலை சாதனமுறி
🔹ஒத்தி முறி
🔹நில ஒத்திமுறி
🔹கடன்முறி
🔹காவல் ஒத்திமுறி
🔹பரைவிலைசாதன முறி

- என்று பலவாறு அழைக்கப்பட்டுள்ளன.

பொதுவாகக் கல்வெட்டுகளில் பிரமாணம், ஆவணம், தீட்டு என்று பயன்படுத்தப்பட்ட இடங்களுக்கு ஈடான இடங்களில் எல்லாம் #முறி என்ற சொல் இச்சுவடிகளில் பயன்படுத்தப்பட்டுள்ளது.

#பற்றுமுறி:

காளையார் கோயில் கல்வெட்டு ஒன்று (SII. VIII 174) பற்றுமுறி ஒன்றினைக் குறிக்கின்றது. அச்சொல் பின்வருமாறு;

இந்நிலங்கள் வரியில்லாது கோயிலுக்குக் கொடுக்கப்பட்டவை ஆதலால் ஆளுடையானுக்குப் #பற்றுமுறி எழுதப்படாது கோயிலுக்கு எழுதப்பட்டது.

அன்றைய தமிழகக் கோயில் மரபுகளுக்கு ஏற்ப இறைவன் பெயரிலில்லாது ஆதிசண்டேசுவரர் பெயருக்குப் #பற்றுமுறி எழுதப்பட்டது!

இங்கு "பற்று முறி" என்பது பணத்தைப் பற்றிக் கொண்டு எழுதிக் கொடுத்ததால் "பற்று முறி" என அழைக்கப்படுகிறது எனக் கருதலாம்.

#முறி என்பது #ஆவணம் என்ற பொருளிலேயே இங்கு பயன்படுத்தப்பட்டுள்ளது.

ஓலையில் எழுதப்பட்ட #முறி பின் கல்லிலும், செம்பிலும் வெட்டப்பட்டது!

#சிறுமுறி:

சிறுமுறி என்பது #கைச்சீட்டு என்ற பொருளில் பயன்படுத்தப்பட்டதாகத் தமிழ்ப் பேரகராதி பொருள் தருகிறது.

''பரமபதம் தங்கள் சிறுமுறிப்படி செல்லும்'' என்ற நம்பிள்ளையின் ஈர் முப்பத்தாறாயிரப்படி வரிகளால் அதற்கு விளக்கமும் தரப்பட்டுள்ளது.

#புதுக்கோட்டை அருகே ஆதனூரில் பராக்கிரம பாண்டியனின் 8ம் ஆட்சியாண்டுக் கல்வெட்டில் #சிறுமுறி என்ற சொல்லாட்சி காணப்படுகிறது.

இக்கல்வெட்டைப் பதிப்பித்தவர்கள், #சறுமுறி என்று பதிப்பித்து "சறுவமான்யமுறி"யாக இருக்க வேண்டுமென அடிக்குறிப்புத் தந்துள்ளனர்.

அக்கல்வெட்டு பின்வருமாறு:

"திருமேனி அழகியார் விசையாலய தேவற்குத் திருவாய் மொழிந்தருளினபடிக்கு #சறுமுறி...''

இதே கல்வெட்டில் மற்றொரு பகுதி,

"நாநா கோத்திரத்துச் சதுர்வேதிப் பேற்குத் தாங் #கையோலை குடுத்த பேர் பன்னிரண்டுக்கும் காணி யாட்சியாக ஒரு ஊர் தரவேணுமென்று சொல்லுகையில்...''

இவ்விரு பகுதிகளில் வரும் #சிறுமுறி #கையோலை ஆகியவற்றை நோக்கும்போது தமிழ்ப்பேரகராதி குறிப்பிடும் பொருள் இவற்றின் மூலம் ஓரளவு தெளிவடைகிறது.

இராஜராஜன்-III #மன்னார்குடி கல்வெட்டில் (SII.Vol.VI 50) #சிறுமுறி என்ற சொல்லாட்சி பின்வரும் இரண்டிடங்களில் பயன்படுத்தப்பட்டுள்ளது

இங்கு #சிறுமுறி என்பது தமிழ்ப்பேரகராதி குறிப்பிடும் பொருளில் பயன்படுத்தப்பட்டுள்ளதா என்பது தெளிவில்லை. பின் ஆய்வில் தெளிவுறக்கூடும்!

#முறியன் - #முறிச்சி:

இச்சொற்களுக்கு ஆண் அடிமை, பெண் அடிமை என்று தமிழ்ப்பேரகராதி வழக்குச் சொற்களிலிருந்து பொருள் தந்துள்ளது.

திருவாசகத்தில் மாணிக்கவாசகர் "ஆண்டபிரான குணம் பரவி முறிசெய்து நம்மை" வரியால் அடிமையாதலுக்கு முறிசெய்தல் என்ற சொல்லாட்சியைக் கையாண்டுள்ளார்! (திரு.13-8)

தாயுமானவர் பாடலிலும் "மோகவாசை முறியிட்ட பெட்டியை" என்ற வரி மூலம் ஆசையை அடிமைப்படுத்துவது #முறியிடுதல் என்ற சொல்லால் வெளிப்படுத்தப்பட்டுள்ளதை (தாயு.சிற்ப 1) அறியமுடிகிறது.

#மதுரை மாவட்டம் வெள்ளாளப்பட்டியில் கிடைத்த ஒரு ஏடு "பரைவிலை சாதன முறி" என்ற ஒரு ஆவணத்தைக் குறிக்கிறது.

இதில் பறையர் விலைக்கு விற்கப்பட்டது தொடர்பான செய்திகள் உள்ளன.

இங்கு #முறி என்ற சொல் அடிமை என்ற கருத்தில் கையாளப்படவில்லை, ஆவணம் என்ற கருத்திலேயே கையாளப்பட்டுள்ளது.

முடிவுகள்:

கல்வெட்டுகளில் இதுவரை அறிந்தவரை, #முறி என்ற சொல் அடிமைக்குப் பயன்பட்டதாகத் தெரியவில்லை.

கல்வெட்டுகளில் ஆள் ஓலை, ஆள் விலைப்பிரமாணம் என்ற சொற்களே அடிமை தொடர்பான ஆவணங்களுக்குப் பயன்பட்டுள்ளன.

#சேக்கிழார் பெரிய புராணத்தில், சுந்தரமூர்த்தி நாயனாரை அடிமையெனக்காட்ட வந்த இறைவன் வைத்திருந்த ஓலையை #ஆள்ஓலை என்றே குறிக்கின்றார்.

முறிகளாகிய ஆவணங்கள் வைக்கும் பெட்டிகள் #முறிப்பெட்டி என்று அழைக்கப்பட்டன.

ஆவணம், பத்திரம், பிரமாணம் என்பனவற்றிற்கு ஈடாகப் பயன்படுத்தப்பட்ட #முறி என்ற சொல் அவற்றோடும் சேர்ந்து,

🔹முறிப்பத்திரம்
🔹முறி சாதனம்
🔹முறிச்சீட்டு
🔹முறிப்பட்டையம்

என்றும் சென்ற நூற்றாண்டு வரை வழங்கப்பட்டிருக்கின்றது.

-நன்று-