Thread by @Lavvelenata

Ve conto na storia.
Na bruta storia dei caoboi dell’alta padovana, dei sensari de Tombolo.
I caoboi veneti.
I sensari a Tombolo xe na istitusion dall’alba dei tempi.

Xe na roba da Serenissima Repubblica de Venessia.
A Serenissima importava bestie daea Dalmazia. Bestie selvadeghe che rivava daea Vistola, da l’Ungheria, dai Balcani.

Fin Zara via terra. A Buccari montava in nave e rivava al Lido. Qua e vegnea messe in quarantena.
A importarle dall’Europa Orientae iera i mercanti de Tombolo.
Coi skei sui de iori.
O i sei fasea prestar dai banchierei ebrei.

Tombolo e e vacche.
Co tanto de registro ufficiae par Ruoli de Mediatori de bestie e Commercianti de bestie.
Nel XX secoeo pi de metà dee fameje de Tomboeo trafficava nel commercio o nea mediasion de vacche.

Xe che a diferensa de tante altre parti del mondo dove sensaro e commerciante xe do figure distinte, co ruoli, responsabiità diverse, qua in sta parte dell’Alta Padovana gà un significato tutto anomalo.

Sensaro-mediatore de soito xe uno che prova far far accordo venditor e comprator.
Ma i tomboeani da sempre xe stà mediatori e commercianti. Do profession in una.
Do strade pa ciapar skei. Tanti skei.

Tombolo: mediatore e commerciante.
Commercianti perché compra e paga a bestia e mediatore perché ciapava skei dai scambi de vacche.

Ma no i comprava mia par iori, i comprava pa chealtri, pai paroni. E i pagava tutto suito.
Anca quando el vero paron dea bestia no pagava.
Imagineve che giro de skei ghe iera e che bojae i xe riussii a far.
Scuola de sensari. Scuola veneta de far skei.

Tombolo. 8000 e rotte aneme. Alta padovana.
CAPITAE DEI MEDIATORI DE BESTIE.
Co na piassa davanti al Municipio che se ciama PIASSA DEI MEDIATORI E DEL COMMERCIO, co tanto de statua.

Sensari da generasion.
De pare in fiol.
Altro che i ve chiamare beati.
I ve ciamarà sempre SENSARI.

Ben o mae coe vacche de l’Est anca qua tutti impirai pal spago.
Tanti skei che girava a Tombolo.

Skei che se prestava, anca grandi somme soea paroea e sensa nissuna garansia scritta.
BATI QUA CHE L’E’ TOA: espression tipica coniada a Tombolo che sintetiza tutto el rapporto fiduciario del tempo.

BATI QUA CHE L’E’ TOA, na stretta forte de man e cossita se regolarizava el commercio de vacche e porsei.
Pai afari grossi na pacca soe spae.
A LEX MERCATORIA de Tombolo.

Tombolo. Ombelico del Veneto co te parli de vache.
Vache e skei.
E se qualcun cantava che dal letame nascono i fiori dal leame dee vacche de Tombolo xe nata na miniera de euro.

Na miniera sconta. Sconta al Fisco soprattutto. Milioni de euro no dichiarai al fisco.
E traffico de vache, auto e skei. E anca armi. AK47 e AK74 dai Balcani.
E tante società fittizie. E fondi europei anca sto giro.

Pa trafficar bestie daea Polonia, daea Slovacchia, dall’Ungheria e daea Romania te serve i titoi de importasion.
Uno pa azienda.

E allora te costituissi società ad hoc sol pa aver el titoeo eludendo i regolamenti comunitari che in teoria dovaria tutelar a libera concorrenza e parmetterghe a tutti de lavorare.

E anca se come oggetto sociae te gà commercio de fiori, impresa edie o frutta e verdura te pol sempre allevar bestie. O importarle.
E se teo fa in Ungheria deventa tutto pi fassie.

Tombolo e Ungheria.
Alta padovana e puszta.
Gemellate.
Soree. Vache.

Domandeghe a uno de Tombolo quanti km se gà fatto su e xo per la puszta, semenando morose, amanti, mojeri (seconde) e fameje parallele.

Ghe xè sta un personaggio, che par comodità ciamemo MARIO che co l’Ungheria ghe n’hà combinà pezo de Bertoldo.
MARIO xe sta uno dei senseri pi caoboi de Tombolo.
El Vescovo de Tombolo.
EL MEJO CAOBOI DE TOMBOLO.

A storia de MARIO CAOBOI DE TOMBOLO no parte gnanca mal dir el vero.
No nasse farabuto. Lo deventa col tempo.
So pare importa vedei e porsei dall’Alto Adige.
Xe un pare rispettabie e nell’Alta i o conosse tutti par la so onestà.

Co ciapa in man MARIO CAOBOI no gà mia tanti skei ma el nome rispettabie si.
Fa accordi coi picoi allevatori dell’Alta: che fornisse latte pai vedei e dopo quando questi xe ingrassai e ghei compra.
E el stabiisse suito el prezzo del vedel.

Credo che podemo ciamar sta roba col termine moderno de FUTURES ZOOTECNICI.
A prescindere da come che va el marcà e prezzo del vedel vien stabiio in anticipo.

A MARIO CAOBOI a ghe va de lusso. Xe i anni del boom economico e le fameje tacca magnar carne. Boom.
MARIO CAOBOI taca far skei.
Tanti skei.

E taca far ragionamenti de filiera: comprar vacche, svezzarle, allevarle, massearle, venderle.
E a Tombolo riva skei da ogni parte del mondo.
Ma riva anca i bidoni.

E quei de Tombolo taca ciavarse tra de iori.
A sera battar el fante insieme in ostaria e de giorno a ciavarse e vache.

Xe i anni che a Tombolo un imprenditor mette na taglia soea testa de i ladri che ghe gà ciavà e vache in staea.
Xe i anni che a Tombolo riva carri bestiame da tutto l’est Europa.
Un traffico impressionante.
Camion frigo de bestie.

E MARIO CAOBOI nei anni deventa el vero sensero de Tombolo.
Compra bestie in Ungheria, in Polonia e Romania. Pecà che se assa ndar ai affari e ghei vende ai so compaesani a pressi vantaggiosi scontai tra el 20 e el 15% dai pressi ufficiai de marcà.

Se un bovin costa 1400 euro MARIO CAOBOI riussiva a piassarlo tra i 800 e i 900 euro.
A quei che iera i so amissi de l'osteria.

Fasendo fatture da società fantasma che dopo distruggeva.
MARIO CAOBOI movimentava bestie ed evadeva sia IVA sia imposte sui redditi.
In gergo tecnico anca CONCORRENZA SLEALE.
Ma anca ASSOCIASION A DELINQUERE.

In sto caso verso i so compaesani.
Veneti che odia i veneti.
Co gran semplicità MARIO CAOBOI ciavava i so compaesani.

Ma l’affare ghe xe scampà dae man.
Perché a un certo punto MARIO CAOBOI decide de far pascoeare el bestiame in prati inesistenti … e va ben tanto ma non tutto.

E el nostro MARIO CAOBOI se trova daea mattina aea sera indagà par associazione a delinquere finalizzata alla truffa al falso e al conseguimento illecito di contributi dell'Unione Europea.

E a Tomboeo nissun saveva gnente. Cioè tutti savea tutto. Ma nissun se agà sentio de puntar el deo contro el vecio amigo MARIO CAOBOI.
Paese sconvolto.

Ma tutti daea parte de MARIO CAOBOI.
Sindaco in primis.
Perchè sto giro i gà becà MARIO CAOBOI ma in un paese de sensari pal 50% de MARIO CAOBOI poteva esserghene uno, dieci, centomila.

E alora finché i beca MARIO CAOBOI noialtri potemmo continuar far affari.
E trovarse o in piassa davanti al comune o a batter el fante nel stessa ostaria.
E ciavarse e vache tra de noialtri.
End.