Thread by @nchokkan

என்னுடைய 'ஈஸியா பேசலாம் இங்கிலீஷ்' (எளிய ஸ்போக்கன் இங்கிலீஷ் கையேடு) நூலைப் படித்த தினேஷ் என்ற வாசகர் ட்விட்டரில் தனிச்செய்தி அனுப்பியிருந்தார். 'இந்த நூலில் ஆங்கிலப் பேச்சின் அடிப்படை அம்சங்களை நன்கு விளக்கியுள்ளீர்கள். இதைப் படித்தபிறகு வேறு என்ன படிக்கலாம்? |1

எங்களுடைய திறனை எப்படி மேம்படுத்திக்கொள்ளலாம்?' என்று கேட்டிருந்தார். அவருக்கு எழுதிய பதில் இன்னும் பலருக்குப் பயன்படும் என்பதால் பொதுவில் வெளியிடுகிறேன். உங்களுக்குத் தேவைப்படாவிட்டாலும், தேவையுள்ள மற்றவர்களுக்கு இதை ஃபார்வர்ட்/ஷேர் செய்யுங்கள். |2

1. ஆங்கிலம்மட்டுமில்லை, எந்த மொழியையும் விதிகளை மனப்பாடம் செய்து கற்றுக்கொள்ள இயலாது. செந்தமிழும் நாப்பழக்கம், செவ்வாங்கிலமும் அதேதான். |3

2. இதனால், ஓரளவு அடிப்படைகளைக் கற்றுக்கொண்டபிறகு, நூல்களைவிட, மற்றவர்கள் (அதிலும் குறிப்பாக, Native Speakers எனப்படும் ஆங்கிலத்தைத் தாய்மொழியாக/உள்ளூர் மொழியாகப் பயின்றவர்கள்) பேசுவதைக் கேட்பதுதான் நல்ல பயிற்சியாக இருக்கும். |4

அப்படிப்பட்டவர்கள் உங்களைச் சுற்றி இருந்தால் மகிழ்ச்சி, இல்லாவிட்டால் இணையத்தைப் பயன்படுத்தலாம், யூட்யூப் வீடியோக்கள், திரைப்படங்கள், வெப் சீரீஸ்களில் பொங்கி வழியாத ஆங்கிலமா! |5

3. இந்த வீடியோக்களில் சில படபடவென்று வேகமாக ஓடும். அது பேசுவோரின் இயல்பு. அதைப் பார்த்துப் பதறவேண்டியதில்லை. நாமும் 'டாக் இங்கிலீஷ், வாக் இங்கிலீஷ், ஈட் இங்கிலீஷ்' என்று கலக்கும் காலம் வரும். அதுவரை, |6

அதே வீடியோக்களை 0.75 அல்லது 0.5 வேகத்தில் வைத்துக் கேளுங்கள். படபடவென்று பேசிய பேர்வழிகள் உங்களுக்காக நிறுத்தி நிதானமாகப் பேசுவார்கள்.

3அ. ஒருவேளை, அந்த வீடியோவில் Subtitles இருந்தால், அதையும் இயக்கிக்கொள்ளுங்கள், அவர்களுடைய பேச்சை எழுத்து வடிவில் பார்த்துக் கற்கலாம். |7

4. கனமான விஷயங்கள் நிரம்பிய வீடியோக்கள் வேண்டாம். எளிமையான உரையாடல்களைக் கேளுங்கள். கவனம் பேசப்படுகிற விஷயத்துக்குள் போய்விடாமல், அவர்கள் எப்படிப் பேசுகிறார்கள் என்பதில் நிற்கட்டும். |8

5. இன்னோர் உத்தி, ஒவ்வொரு சொற்றொடர்/வாக்கியமும் முடிந்தபிறகு, அதை Pause செய்துவிட்டு நாமே சொல்லிப்பார்ப்பது, எழுதிப்பார்ப்பது, அந்த வாக்கியத்தில் சில சொற்களை மாற்றி வேறு பொருளைக் கொண்டுவர முயல்வது. எடுத்துக்காட்டாக, |9

“He is the president of America” என்பதை “He is the governor of Karnataka” என்பதுபோல் மாற்றுவது எளிது. இந்த இரண்டாவது சொற்றொடரில் பெரிய புதுமை ஏதும் இல்லை, ஆனாலும், அது நீங்கள் உருவாக்கிய சொற்றொடர். இப்படிச் செய்வது உங்களுக்குக் கூடுதல் நம்பிக்கையை அளிக்கும், |10

இன்னும் ஆர்வமாகக் கற்பீர்கள். இன்றைக்கு ஸ்ம்யூலில் பிறரைக் கேட்டுக் கவனமாகப் பிரதியெடுத்துப் பாடும் பாடகர் நாளைக்குச் சொந்தமாகச் சங்கதிகளைப் போட்டுப் பாடத் தொடங்குவார், அதே கதைதான் இங்கும். |11

6. இந்த வீடியோக்களில் பேசப்படும் சொற்கள் சிலவற்றுக்குப் பொருள் புரியாவிட்டால் பிரச்சனையில்லை; ஒன்றுமே புரியாவிட்டால், Pause செய்துவிட்டு, கடினமான சொற்களுக்கு அகரமுதலியைப் பாருங்கள் (அச்சு அல்லது Digital Dictionary). பொருள் புரிந்துகொண்டு முன்னே செல்லுங்கள். |12

இது ஒரு நல்ல பயிற்சிதான் என்றாலும், இதை மன அழுத்தமாக்கிக்கொள்ளாதீர்கள், ஆங்கிலச் சொற்கள் அனைத்தும் தெரிந்தவர்கள் யாருமில்லை. ஓரிரு சொற்கள் புரியாவிட்டால் கேட்டு, தேடித் தெரிந்துகொள்ளலாம், அதில் எந்தத் தவறும் கிடையாது. |13

7. ஒவ்வொரு சொல்லாக,ஒவ்வொரு சொற்றொடராக ஆங்கிலத்தைப் புரிந்துகொள்ளலாம்,எல்லாரும் அப்படிக் கற்றுக்கொண்டவர்கள்தான். அதற்கு அன்றாடம் நேரம் வழங்குங்கள். வெறும் 15நிமி என்றாலும் போதும், ஆனால் அதை நாள்தோறும் வழங்கவேண்டும். ஒழுக்கம்தான் வெல்வோருக்கும் நடுவில் விடுவோருக்கும் வேறுபாடு|14

8. உங்களோடு நாள்தோறும் ஆங்கிலம் பேசக்கூடிய யாராவது இருந்தால் பிடித்துக்கொள்ளுங்கள். நேரில்/தொலைபேசியில்/ஜூம் கூட்டத்தில் என்று எப்படி இருந்தாலும் பரவாயில்லை. நீங்கள் பேசுவதை அவர் கேட்கவேண்டும், பதில் சொல்லவேண்டும், அது போதும். |15

உங்கள் பிழைகளை அவர் சுட்டிக்காட்டித் திருத்தி உதவினால் இன்னும் நல்லது, ஆனால், அதை எல்லாரிடமும் எதிர்பார்க்காதீர்கள்.

9. தவறாகப் பேசுவதைப்பற்றிக் கூச்சப்படாதீர்கள். அந்தத் தடையை உடைத்தால்தான் உங்களால் எந்தப் புதிய விஷயத்தையும் கற்கமுடியும். இன்றைய பிழை நாளைய திருத்தம். |16

10. ஆங்கிலம் என்பது ஒரு புகழ் பெற்ற மொழிதான், அதுவே தனி அறிவு இல்லை. “Working English” என்று சொல்லப்படுகிற “போதுமான அளவு ஆங்கிலத்தை”க் கற்றுக்கொண்டாலே நல்ல பயன் இருக்கும். ஷேக்ஸ்பியர் கவிதைகளைக் கற்கவேண்டும் என்றெல்லாம் இலக்கு வைத்துக்கொள்ளாதீர்கள். |17

நாம் சொல்ல நினைப்பதைத் தமிழில் எப்படிச் சொல்கிறோமோ அதேபோல் தெளிவாக ஆங்கிலத்தில் சொல்லப் பழகினாலே போதும்,படிப்பு,வேலைக்கான நேர்முகத்தேர்வுகள்,பணிச் சூழல்,சமூக உறவுகள்,சொந்தத் தொழில் என அனைத்திலும் அது பயன்படும். வாழ்த்துகள்!

ஈஸியா பேசலாம் இங்கிலீஷ்: amzn.to/38p9LSV |18/18