Thread by @nchokkan

Bonafide Certificate என்ற சொல்லைப் பல இடங்களில் கேட்டிருக்கிறேன். 'இவர் எங்கள் பள்ளி/கல்லூரி/நிறுவனத்தைச் சேர்ந்தவர்' என்று அந்தப் பள்ளி/கல்லூரி/நிறுவனத்தின் நிர்வாகத்தினர் வழங்கும் சான்றிதழ் இது என்று தெரியும், ஆனால், |1

அதை ஏன் 'Bonafide Certificate' என்று அழைக்கிறார்கள் என்றோ, இதிலிருக்கும் 'Bonafide' என்ற சொல்லின் நேரடிப் பொருள் என்ன என்றோ யோசித்ததில்லை.

இன்றைக்கு ஒரு கட்டுரையில் 'Mala fide' என்ற சொல்லைப் பார்த்தேன். இதை எங்கேயோ கேள்விப்பட்டதுபோல் இருக்கிறதே என்று யோசிக்கும்போது, |2

இதற்கும் Bonafideக்கும் தொடர்பு இருக்குமோ என்று தோன்றியது, கூகுள் செய்து பார்த்தேன், இவை இரண்டும் எதிர்ச்சொற்கள் என்று தெரிந்துகொண்டேன்.

முதலில், Bonafide என்பது ஒரு சொல் இல்லையாம், ‘Bona fide’ என்று இதை இரண்டு சொற்களாகப் பிரித்து எழுதவேண்டும். |3

லத்தீன் மொழியில் இதன் பொருள், ‘in good faith’, அதாவது, நன்னம்பிக்கையுடன், நல்லெண்ணத்துடன் செய்யப்படுகிற செயல்களுக்கு இதைப் பயன்படுத்தலாம். ‘இந்த மாணவர் என் பள்ளியைச் சேர்ந்தவர்’ என்று அந்தப் பள்ளியின் முதல்வர் நன்னம்பிக்கையுடன் கையெழுத்திட்டு வழங்கும் சான்றிதழ் என்பதால் |4

அது ‘Bona fide certificate’ ஆகிறது.

மாறாக, Mala fide என்றால், ‘in bad faith’, அதாவது வேண்டுமென்றே கெட்ட எண்ணத்துடன், தீய நோக்கத்துடன் செய்யப்படுகிற செயல்களுக்கு இதைப் பயன்படுத்தலாம், தன்னையும் அறியாமல் (அதாவது, கெட்ட நோக்கம் இல்லாமல்) செய்த பிழைகளுக்குப் பயன்படுத்தக்கூடாது. |5

கொஞ்சம் எளிமையாகச் சொல்வதென்றால், ஒரு புதுப்படம் வெளியாகிறது, நீங்கள் ஆர்வத்துடன் அதைப் பார்க்கிறீர்கள், படம் படு மோசமாக இருக்கிறது, ‘ம்ஹூம், தேறாது’ என்று ஃபேஸ்புக்கில் எழுதுகிறீர்கள், அது ஒரு bona fide விமர்சனம். ஏனெனில், |6

அந்த நடிகர்/இயக்குநர்/தயாரிப்பாளர் தவறுகளைத் திருத்திக்கொள்ளவேண்டும், மற்ற ரசிகர்கள் இந்தப் படத்தைப் பார்த்து ஏமாந்துவிடக்கூடாது என்ற நல்ல எண்ணத்துடன் நீங்கள் அதை எழுதியுள்ளீர்கள். |7

ஒருவேளை, படம் உண்மையிலேயே நன்றாக இருந்து, அந்த நடிகரை உங்களுக்குப் பிடிக்காது என்பதால் நீங்கள் வேண்டுமென்றே ‘ம்ஹூம், இந்தப் படம் தேறாது’ என்று ஃபேஸ்புக்கில் எழுதினால் அது mala fide விமர்சனம். ஏனெனில், அந்தப் படம் ஓடிவிடக்கூடாது என்ற கெட்ட எண்ணத்துடன் நீங்கள் எழுதியுள்ளீர்கள்.|8/8