Thread by @nchokkan

எனக்கு அலுவலக வெள்ளைப் பலகைகள் என்றால் மிகவும் பிடிக்கும். அதன்முன் நின்று ஒரு பேனாவைத் திறந்துகொண்டால் போதும், 'கவித அருவிமாதிரி கொட்டுது' ஃபீலிங்தான். |1

இத்தனைக்கும் என்னுடைய கையெழுத்து திராபையானது, சுமாரான கோட்டுப்படங்களைக்கூட வரையத் தெரியாது. ஆனாலும் எதையும் வெண்பலகையில் சிந்திப்பதையே விரும்புவேன். எப்பேர்ப்பட்ட பிரச்னையை எடுத்துக்கொண்டாலும் சரி, அதைப் பலகையில் விரித்து விவாதிக்கத் தொடங்கிவிட்டால் போதும், |2

சிறு கட்டங்கள், வட்டங்கள், கோடுகள், அம்புக்குறிகளின் துணையோடு மளமளவென்று அதை உடைத்துத் தீர்வை நோக்கி நகர்ந்துவிடலாம் என்பதாக ஓர் எண்ணம்.

முன்பு நான் நிறையப் பயிற்சி வகுப்புகள் நடத்திக்கொண்டிருந்தேன். அங்கெல்லாம் பவர்பாயின்ட் பிரசன்டேஷனைவிட வெண்பலகையைத்தான் மிகுதியாக நம்புவேன்.|3

யாரோ எழுதிய ஸ்லைடை அப்படியே நிறுத்திவிட்டுப் பலகையில் எழுதத் தொடங்கினால், சில நிமிடங்களில் மாணவர்களை அப்படியே நம்வசமாக்கிவிடலாம். Starting with a clean slate என்று ஆங்கிலத்தில் சொல்வார்களே, அதைப்போல, ஒரு விஷயத்தைப்பற்றி எதுவும் தெரியாமல் இருக்கிறவர்களை |4

ஒரு சிறு புள்ளிகூட இல்லாத வெண்பலகையின்முன் அமரவைத்து, அதிலிருந்து படிப்படியாக அனைத்தையும் விளக்கிப் புரியவைத்து மகிழ்விப்பது மிகப் பெரிய மன நிறைவைத் தருகிற விஷயம். |5

அடுத்த வகுப்பில், இன்னொரு வெண் பலகை இருக்கும். இதே தலைப்பைப்பற்றி எதுவும் தெரியாத ஒருவரும் இருப்பார். மறுபடி ஆனா, ஆவன்னாவிலிருந்து தொடங்கவேண்டும். ஆனால், அதற்கான சிறு சலிப்பும் என்னிடம் தெரியாது. பலகையை ஆளும் பணி அப்படிப்பட்ட பரவசம் தருவது! |6

சென்ற ஆண்டு, எங்களுடைய மேலதிகாரிகள் சிலர் ஐரோப்பாவிலிருந்து வந்திருந்தார்கள். அவர்களுக்குச் சில தொழில்நுட்ப விஷயங்களைச் சொல்லித்தரவேண்டியிருந்தது. 'ஒரு பவர்பாயிண்ட் செஞ்சுடலாமே' என்று யாரோ சொன்னார்கள். 'ம்ஹூம், வேணாம்' என்றார் என்னுடைய சக ஊழியர், 'வெறும் வொய்ட்போர்டிங் போதும்!'|7

அந்தக் கூட்டம் தொடங்குவதற்குக் கால் மணிநேரம் முன்பாக அவர் என்னுடைய மேசைக்கு வந்தார், 'கிளம்பலாமா?'

'இன்னும் நேரம் இருக்கே' என்று கடிகாரத்தைப் பார்த்தேன் நான். |8

'பரவாயில்லை வாங்க' என்று என்னை இழுத்துக்கொண்டு கூட்ட அறைக்குச் சென்றார். வண்ணப் பேனாக்களை எடுத்தார். மளமளவென்று வெண்பலகையை நிரப்பத் தொடங்கினார். |9

சில நிமிடங்கள்தான், நானும் அவருடன் சேர்ந்துகொண்டேன். இருவரும் சேர்ந்து பேசியபடி எங்களுடைய இரண்டாண்டு உழைப்பை ஒரு பலகையில் நிரப்பிவிட்டோம். மேலதிகாரிகள் வரும்போது அவர்களிடம் நாங்கள் பேசவேண்டிய விஷயங்கள் அனைத்தும் கண்ணெதிரில் தயாராக இருந்தன. |10

என் அலுவலகத்தில் பலரும் பலகைப் பிரியர்கள்தான். ஏதேனும் ஒரு கூட்டத்தில் யாராவது (அநேகமாக அது நானாகதான் இருக்கும்) வெண்பலகையை நோக்கிச் சென்று எழுதத் தொடங்கினால் போதும், மறுகணம், பேசாதவர்களும் பேசுவார்கள், சில நிமிடங்களில் |11

அந்தப் பலகையைச் சுற்றி ஒரு சிறு கூட்டம் சேர்ந்துவிடும், அழிப்பார்கள்,மாற்றுவார்கள், சேர்ப்பார்கள்,வண்ண வண்ணப் பேனாக்களைப் பயன்படுத்திச் சுவை கூட்டுவார்கள். அதன்பிறகு, மேசையைச் சுற்றி உட்கார்ந்திருப்பவர்களும் வேறு வழியில்லாமல் எழுந்து வந்து விவாதத்தில் சேர்ந்துகொண்டுவிடுவார்கள்|12

வன்பொருள், மென்பொருள், ஆள் பலம், நாள் கணக்கைப்பற்றியெல்லாம் கவலைப்படாமல் இஷ்டம்போல் கற்பனை செய்ய அந்தப் பலகை மிக வசதி. |13

இவ்வாறு விவாதித்தபின், அந்தப் பலகையைப் படமெடுத்துச் சேமிக்கும் வழக்கமும் உள்ளது. ஆனால், அந்தப் படங்கள் பெரும்பாலும் டெலகிராமில் கிடைக்கிற திருட்டு பிடிஎஃப் ஈபுத்தகங்களைப்போலதான், ஆவலுடன் டவுன்லோட் செய்யப்படும், ஆனால், பெரும்பாலும் பயன்படுத்தப்படாது. |14

ஏனெனில், வெண்பலகையின் படங்கள் வெறும் படங்கள்தான். அவற்றில் வெண்பலகையின் சிறப்புகள் எவையும் இல்லை. நினைத்த நேரத்தில் ஒரு கோடு போட்டு முற்றிலும் வேறொரு பரிணாமத்துக்குக் கொண்டுசெல்ல இயலாத பொம்மையை வைத்துக்கொண்டு என்ன செய்வது? அருவியின் படத்தை வைத்துக்கொண்டு குளிக்கவா முடியும்?|15/15