Thread by @Avvaitweets

மனித ஸ்வபாவத்தில் பொறாமை முக்கிய பங்குக்கொண்டது.  பிறரது அழகு,சந்தோஷம்,செல்வம்,அந்தஸ்து,தாராள குணம், சாமர்த்தியம்,எதைக்கண்டாலும் நம்மிடம் அது இல்லையே என்ற எண்ணம் பொறாமைத்தீயாக வளர்கிறது.நெருப்பு எப்போதுமே  அருகிலே உள்ளதைத்தான் முதலில் அழிக்கும்,எரித்து சாம்பலாக்கும்.

இந்த பொறாமைத்தீ அப்படியல்ல.அதைவிடக் கொடியது. 
பொறாமைப்படுபவனை அப்பளம் மாதிரி வாட்டிவதைக்கும், துன்புறுத்தும்,நிம்மதியில்லாமல் கோபப்பெருமூச்சு விடவைக்கும்.

மஹாராஷ்டிராவில் தேஹு கிராமத்தில்,நாளுக்கு நாள் பக்தர்கள் கூட்டம் பெருகிக்கொண்டே வந்தது. அங்கேதான் துக்காராம் என்ற பாண்டுரங்க பக்தன் வசித்துவந்தார்.அவரது பக்தியைக்கண்டு வியந்து,துக்காராமின் அபங்க பஜனையில் தங்களை மறந்து  ஆனந்தக்கண்ணீர் பெருகி,பக்தியில் மூழ்காதவர்களே கிடையாது.

எங்கிருந்து எல்லாமோ,அவரைப்பற்றி கேள்விப்பட்டு,சாதுக்களும்  பாகவதர்களும் கூட,அவரிடமிருந்து அபங்கம் பாட கற்றுக்கொள்ள பெருகிவிட்டனர்.ஆனால் அதே தேஹு கிராமத்தில் வாழ்ந்த ராமேஸ்வர பட்  என்பவருக்கு, இந்த துக்காராம் விஷயங்கள் கொஞ்சமும் பிடிக்கவில்லை. பட் நன்றாக ஸமஸ்க்ரிதம் அறிந்தவர்.

பிரசங்கங்கள் பண்ணுவார்.ஆனால் அவருடைய பிரசங்கங்களுக்கு  உள்ளூர் ஆட்கள் கூட வருவதில்லை.துக்காராமின் பஜனைக்கு மட்டும் நிறையபேர் வருவது 'பட்' டுக்கு பொறுக்கவில்லை.  
துக்காராம் படிக்காதவர், ஸம்ஸ்க்ரிதமே தெரியாதவர், மராத்தியில்  தானாகவே இட்டுகட்டி பாண்டுரங்கனைப் பற்றி பாடுபவர்,

தன்னுடைய அபங்கத்தால் இந்த ஊரையே, உலகத்தையே  கெடுக்கிறாரே! என்று பட் புலம்பினார். இது பரவலாக துக்காராமின்  காதிலும் விழ,அவர் ஓடிச்சென்று ராமேஸ்வர் பட் காலில் விழுந்து  வணங்கினார்."நான் ஏதாவது தப்பு செய்துவிட்டேனா சுவாமி?”  
“என்னய்யா சொல்கிறீர்?தப்பைத்தவிர வேறொன்றுமே செய்யவில்லையே

ஐயா நீர். உனக்கு கொஞ்சமாவது சாஸ்திரம் தெரியுமா? புராணம்  தெரியுமா? சொந்தமாக ஏதாவது மனதில் தோன்றியபடி,  கற்பனையாக மற்றவர்க்கு பிரசங்கம் செய்வது பெரும் பாபம். இதை  கேட்பவர்க்கும் அந்தப்பாபம் போய் சேருகிறதே? இதை கொஞ்சமாவது உணர்ந்தாயா?” கத்தினார் பட்.

“அப்படியா?இது எனக்கு தெரியவில்லையே சுவாமி.நான் அறிவிலி, படிக்காத முட்டாள்.நீங்கள் நன்றாக படித்த மகான்.தயவுசெய்து என் தவறுகளை மன்னித்து,நான் என்ன செய்யவேண்டும் என்று சொல்லுங்கள்” என்று கண்ணீர் மல்க கேட்டார் துக்காராம்" "இனிமேல் நீ ஒரு அபங்கமும் எழுதவோ பாடவோ கூடாது.

இதுவரை எழுதியதை எல்லாம் தூக்கி நீரில் எறிந்துவிடு.பாபத்தை குறைத்துக்கொள்". துக்காராம் சரியென்று தலையாட்டி  வணங்கிவிட்டு,நேராக பண்டரிபுரத்தில் பாண்டுரங்கன் முன்சென்று கைகட்டி நின்றார். கண்ணீர் மல்க: "விட்டலா,பாண்டுரங்கா,நான்  அறியாமல்செய்த பிழையை பொறுத்துக்கொண்டு,

என்னை மன்னிப்பாயாக.இனி நான் நன்றாக கற்ற ராமேஸ்வர் பட்    சொன்னது போலவே நடக்கிறேன்.எனக்கு உன் நாமத்தைத்தவிர  வேறு எதுவும் தெரியாதே.அதைத்தானே எனக்கு தெரிந்த  மராத்தியில், மனம்போன போக்கில் இத்தனை நாட்களாக  பாடிக்கொண்டு எனை மறந்திருந்தேன்.

அந்தப்பெரியவர் எப்போது நான் செய்வது பாபம் என்று உணர்த்தி விட்டாரோ,இனியும் அதை பண்ணமாட்டேன்.நான் செய்த தவறை மன்னித்துவிடு”. அழுது கொண்டே தன்னுடைய ஒரே செல்வமான, கண்ணின் மணியான, விட்டலன் அபங்கங்களை எல்லாம் எடுத்து மூட்டைக்கட்டி,இந்த்ராயணி ஆற்றில் எறிந்துவிட்டார்.

ஆற்றங்கரையில் சோகமாக அமர்ந்தார்."வெகு நேரமாக உங்களை  காணோமே,இங்கே அழுதுகொண்டு உட்கார்ந்திருக்கிறீர்கள். வாருங்கள் வீட்டுக்கு” என்று மனைவி ஜீஜா,அவரைத்  தேடிக்கொண்டு அங்கே வந்து அவரை வீட்டுக்கு அழைத்துப்  போனாள்.சிறகொடிந்த பறவையாக வாய் மட்டும்,

“பாண்டுரங்கா,விட்டலா” என்று ஸ்மரணை செய்துகொண்டே  தூங்கிப்போனார் துக்காராம்.இரவு கழிந்தது.பொழுது விடிந்தது.  சில மணிநேரங்களில் யாரோ வந்து கதவை தட்டினார்கள்.
“துக்காராம்,துக்காராம்,இங்கே வாருங்கள்” என்று  உணர்ச்சி வசத்தோடு பாண்டுரங்கன் ஆலய பிரதம அர்ச்சகர் வாசலில் நின்றார்.

அவரது கையில் துக்காராம் இந்த்ராயணி ஆற்றில் எறிந்த அபங்க சுவடிகளின் மூட்டை."இது என்ன சுவாமி? ஏன் நான் செய்த  பாபங்களை ஆற்றிலிருந்து மீட்டு எடுத்து கொண்டுவந்தீர்கள்?"என்றுஅதிர்ச்சியோடு கேட்டார் துக்காராம்.

“துக்காராம்ஜி, நாங்கள் யாருமே எந்த ஆற்றிலிருந்தும் எதையும்  எடுத்து வரவில்லை.பாண்டுரங்கன் தானே போய்,ஆற்றில் இறங்கி  இந்த மூட்டையை எடுத்துவந்து,தன் தலையில் சுமந்து ஈரம் சொட்ட சொட்ட நின்று கொண்டிருந்தார். இன்று காலை வழக்கம்போல்  கதவை திறந்து சுப்ரபாதம் சேவை செய்ய நுழைந்தபோது,

இதைப்பார்த்து திகைத்தேன். கர்ப்ப கிரஹத்தில் ஒரே ஜலம். எங்கிருந்து நீர் வழிகிறது?விக்ரஹத்தின் மேல் என்று தெரிந்தது.  என்னது இந்த மூட்டை? எப்படி பாண்டுரங்கன் தலைமேல் வந்தது?  கதவை பூட்டியதும் திறந்ததும் நான்தானே என்று அதை எடுத்து அவிழ்த்துப் பார்த்தபோது தான் தெரிந்தது.

அவைகள் நீங்கள் எழுதிய அபங்கங்கள்  என்று. எங்கோ  ஏதோ தவறு நடந்திருக்கிறது என்று எடுத்துக்கொண்டு ஓடோடி வந்தேன்.  நீங்கள் ஈடற்ற பாண்டுரங்க பக்தர் என்று எனக்கு தெரியுமே" என்றார் கோவில் அர்ச்சகர்.விட்டலா,எனை மன்னித்து விட்டாயா.உன் கருணையே கருணை.துக்காராம் ஆனந்தக்கண்ணீர் வடித்தார்.

ஊர் முழுதும் இந்த அதிசயம் காட்டுத்தீ போல் பரவி,ராமேஸ்வர் பட் காதிலும் விழ,அடித்து பிடித்துக்கொண்டு அவர் துக்காராமிடம்  வந்து கண்ணீர் பெருக காலில் விழுந்தார். “நீங்கள் எவ்வளவு  பெரிய மகாத்மா,பாண்டுரங்கனின் அபிமானம் நிறைந்த பக்தர்.

பகவானே உங்கள் அபங்கங்களை ஆற்றிலிருந்து மீட்டு தன் தலையில் சுமந்துநின்றார் என்றபோது என் அறியாமையை உணர்ந்தேன்.நானே மகாபாபி.பொறாமைப்பிடித்தவன்.என்னை மன்னிக்கவேண்டும்”என்று கதறினார்."அபச்சாரம் சுவாமி.நீங்கள்  சாஸ்த்ரங்கள் உணர்ந்த பண்டிதர்.நான் அறிவிலி.என் காலில்  விழுவது அபசாரம்.

பாண்டுரங்கா, விட்டலா”  என்று கண்களில் நீர்பெருக அவனை  நன்றியோடு வணங்கினார் துக்காராம். இப்படி பாண்டுரங்க விட்டலன் நிறைய பக்தர்களுடன் விளையாடுகிறான். விட்டலா! விட்டலா!