शिवनेरी किल्ल्यावरील शिवजन्म सोहळ्याप्रसंगी माननीय मुख्यमंत्री उद्धव बाळासाहेब ठाकरे यांनी मनोगत व्यक्त केले… 
शिवराय आणि जिजाऊंचा आशीर्वादाने आणि तुमच्या प्रेमाने यंदा हे दुसरं वर्ष आहे, या सोहळ्यासाठी उपस्थित राहण्याचे भाग्य आम्हाला लाभलेलं आहे. शिवरायांसमोर नतमस्तक व्हायला शिवजयंतीच असली पाहिजे असं काही नाही. आपल्या मनात, हृदयात त्यांचं एक अखंड एक स्थान आहे.
कुठेही, कधीही, कोणत्याही कामाला निघताना छत्रपतींचं स्मरण नकळत होतं. कोणतंही चांगलं किंवा पवित्र काम करताना छत्रपती शिवराय आठवतात. ते आपल्या धमन्यांमध्ये, रक्तात आहेत. आपण या मातीची लेकरं आहोत.
महाराष्ट्र म्हटल्यानंतर छत्रपती शिवाजी महाराज वेगळे करता येऊच शकत नाहीत आणि ज्या मातीत हे तेज जन्माला आलं त्याच मातीची आपण लेकरं आहोत. छत्रपतींनी मोघलांशी युद्ध केलं, स्वराज्य स्थापन केलं, स्वराज्यावर चालून आलेल्यांची काय विल्हेवाट लावली हे आपल्याला परत सांगण्याची गरज नाही.
आता तसं युद्ध जरी नसलं, तशा ढाल तलवारी जरी नसल्या, तरी कोरोना बरोबरचं आपलं युद्ध सुरू आहे आणि मास्क ही त्या युद्धातील आपली ढाल आहे. वार करायचा तेव्हा वार करू, पण वार अडवायचा तेव्हा ढाल लागतेच. बाजीप्रभूंनी हातात तलवार घेऊन झुंज दिली. पण आपल्या लढाईत मास्कची ढाल हवीच.
शिवराय हे आपलं दैवत आहे. पूर्वीसुद्धा कित्येकांनी राज्यं जिंकली,स्थापन केली, कित्येक राज्यं विलयाला गेली. पण शिवरायांचं वेगळेपण आहे. लढण्यासाठी तलवार आवश्यक असते. पण तलवार घेऊन लढता येतंच असं नाही. तर ती पकडण्यासाठी जी जिद्द लागते, प्रेरणा लागते, ईर्ष्या लागते ती शिवरायांनी दिली.
आता इतकी वर्ष झाली, शेकडो वर्ष झाली, वर्ष मोजण्यात काही अर्थ नाही, पुढची हजारो वर्ष होतील तरी तेच आमचं दैवत आहे आणि तेच दैवत राहणार.
आपल्या या दैवताला वंदन करण्यासाठी आपण इथे आलोय. दोन्ही पुरस्कार प्राप्त शिवभक्तांचे अभिनंदन. त्यांचं कार्य वेगळं आहे.
आपल्या या दैवताला वंदन करण्यासाठी आपण इथे आलोय. दोन्ही पुरस्कार प्राप्त शिवभक्तांचे अभिनंदन. त्यांचं कार्य वेगळं आहे.
आज शिवयोग हा नवीन शब्द समजला. शिवाय शिवसुमन या फुलाचं वैशिष्ट्य आज कळलं. ते आधी पाहिलं होतं पण ही माहिती आज कळली. किती सुंदर आहे. ते याच परिसरात पहिल्यांदा मिळालं हा खरंच शिवयोग. ज्यांनी ते शोधलं त्यांचं कौतुक वाटतं.
आपल्या सगळ्यांच्या मनातला शिवप्रेमाचा धागा महत्त्वाचा आहे. हे धागे एकत्र करून गोफ विणणं आवश्यक आहे. हा आपल्या राज्याच्या विकासाचा गोफ असणार आहे. आपल्या मनात शिवरायांचा इतिहास जिवंत आहे आणि राहणार. संपूर्ण जगात ते तेज पसरवायचं आहे.
अवघ्या जगामधे शिवरायांचा इतिहास पोहोचवण्यासाठी प्रयत्न करणार. हे जेव्हा करू, ते जेव्हा शक्य होईल, तेव्हाच आपण सार्थ अभिमानाने म्हणू की, हो आम्ही त्याच शिवरायांच्या भूमीतील लेकरं आहोत. सर्वांना शुभेच्छा!
जय हिंद! जय महाराष्ट्र!
जय हिंद! जय महाराष्ट्र!
• • •
Missing some Tweet in this thread? You can try to
force a refresh
