Thread by @tskrishnan

தமிழகத்தின் பழம்பெரும் விழாக்களில் ஒன்று நாளை திருவாரூரில் நடைபெறவுள்ள ஆழித்தேர்த்திருவிழா. அப்பர் பெருமான் இத்திருவிழாவை

ஊழித்தீயன்னானை ஓங்கொலி மாப்பூண்டதோர்
ஆழித்தேர் வித்தகனை நான் கண்டதாரூரே

என்று குறிப்பிடுகிறார்.இப்படி பொயு 7ம் நூற்றாண்டிலிருந்தே ஆவணப்படுத்தப்படும்

இத்திருவிழா பங்குனி மாதம் ஹஸ்த நட்சத்திரத்தில் கொடியேற்றி, பூச நட்சத்திரமான இன்று தியாகராஜர் தேருக்கு எழுந்தருளி, ஆயில்ய நட்சத்திரத்தில் தேரோட்டம் கண்டருளும் திருவிழாவாக உள்ளது. இந்தத் திருவிழாவை அப்பர் பெருமானே முன்னின்று நடத்துவதாக மரபு.

மற்ற திருவிழாக்களில் உற்சவம் நடத்துபவர்கள் அழைப்பிதழ் அளிப்பார்கள். ஆனால் இந்தத் திருவிழாவிற்கு இறைவனே அழைப்பதாக ஐதீகம். தியாகப் பெருமானுடைய ஶ்ரீமுகம் இவ்வாறு அமைந்திருக்கும்

யக்ஞகத்ரய நிர்மான த்ரான நிர்வான காரணம்
ததிதம் சாசனம் சம்போக பூர்வாரூர் வாசினஹ

நம்மனுக்கு வன் தொண்டரான ஆலால சுந்தரர்க்கும்
நமக்கும் ஶ்ரீ சார்வரி நாம சம்வத்சரம் பங்குனி மாதம்..
நெடிய திருவீதியில் திரு ஆழித்தேரில் திரு உலாச் செய்து அருளுகிற படியால்
ஸ்தானம் மகேஸ்வர பரிச்சின்னங்களைக் கூட்டிக்கொண்டு வரவும் தாமும் வரவும்

என்று இந்த அழைப்பிதழ் அமைந்திருக்கும்

இது சுற்றியுள்ள ஆலயங்களுக்கு எடுத்துச் சென்று படிக்கப்படும்.இதில் உள்ள யக்ஞகத்ரய என்ற ஸ்லோகம் மூன்றாம் குலோத்துங்கன் கல்வெட்டு ஒன்றிலும் அமைந்திருக்கிறது.

தமிழகத்தில் தனித்தன்மை கொண்ட தேரான இது மேலிருந்து பார்த்தால் எண்கோண வடிவில் காணப்படும். நான்கு அடுக்குகளைக் கொண்டது இத் தேர்

ஒவ்வொரு மூலைக்கும் 9 கால்கள் வீதம் 36 கால்களைக் கொண்ட பெரிய தேர் இது. இரும்புச் சக்கரங்கள் கொண்ட இந்தத் தேரின் எடை சுமார் 350 டன்களாகும். ஒரு காலத்தில் இந்தத் தேரை இழுக்க 12000 ஆட்கள் தேவைப்பட்டனராம். தற்போது இயந்திரங்களின் உதவியாலும் இந்தத் தேர் செலுத்தப்படுகிறது.

தேரைக் கட்டுப்படுத்த ஹைட்ராலிக் ப்ரேக்குகள் பயன்படுத்தப்படுகின்றன. அழகான பல சிற்பங்கள் நிறைந்த இந்தத் தேரில் ஆரூரன் பவனி வருவது கண்கொள்ளாக் காட்சி. பல அரசியல் குழப்பங்களால் பங்குனியில் நடைபெறாதிருந்த இந்த ரத உற்சவம் மீண்டும் பங்குனியில் நடைபெறுவது தனிச்சிறப்பு.