Thread by @karna_sakthi

கோடிக்கணக்கான செலவில் உருவாக்கப்படும் பிரம்மாண்டமான சினிமாக்களுக்கு மத்தியில் "C/O கஞ்சர்பாலம், பலசா 1978, கலர்போட்டோ" மாதிரியான சின்னச்சின்ன எளிய படங்கள் நிகழ்த்தும் மாயாஜாலங்கள் அற்புதமானது. #Cinembandi யும் அவ்வகையைச் சார்ந்தது.

எதேச்சையாக கிடைத்த பொருள் ஒரு கைவிடப்பட்ட கிராமத்தின் கனவாக எப்படி மாறுகிறது எனும் எளிய கதை. கன்னடம்-தெலுகு பேசும் எல்லைப்புற கிராமமான கோலப்பள்ளி எனும் ஊரில் வருங்காலம், கிராமம் பற்றி நம்பிக்கை கொண்டிருக்கும் ஒரு ஷேர்- ஆட்டோ ஓட்டுனர் கையில் ஒரு உயர்தரமான கேமிரா சிக்குகிறது.

டிவியில் தெலுங்குத் திரையுலகில் வசூலை குவிக்கும் சிறிய பட்ஜெட் படங்களைப் பற்றிய செய்தி துணுக்கு கேமிரா வைத்திருக்கும் ஓட்டுனருக்கு ஒரு சினிமா படம் எடுக்கும் நம்பிக்கையை உண்டாக்க, தன் கிராமத்தில் கல்யாணங்களுக்கு போட்டோ எடுக்கும் சகாவுடன் தன் சினிமா திட்டங்களைத் துவக்குகிறார்.

கொஞ்சம் கொஞ்சமாக உருப்பெறும் அந்த சினிமா படப்பிடிப்பு சம்பவங்களின் வழியே ஒரு எளிய கிராம பிரஜையின் கனவு எப்படி மொத்த கிராம மக்களின் நம்பிக்கையாகவும் பரவுகிறது என்பதை அடுத்தடுத்த காட்சிகளில் அழகாக சமர்ப்பித்து முழுப்படம் நடந்து முடிகிறது.

எளிய மனிதர்களின் அன்பை நெகிழ்ச்சியுடன் பேசும் இந்த சினிமாவில் பெண் கதாபாத்திரங்களை கையாண்ட விதம் என்பது மிகச்சிறப்பானது. படத்தின் வரும் நான்கு பெண்களின் பாத்திரமும் தனித்துவம் மற்றும் நம்பிக்கை நிறைந்தவை.

ஒருவருக்கு தன் கண்டிப்பான தந்தையைத் தாண்டி தன் கனவுகளும், காதலும் முக்கியமானதாக உள்ளது. அவர் அதில் உறுதியாக இருக்கிறார். மற்றொறு பெண் தன் கணவனின் கனவை புரிந்துகொண்டு, குடும்பத்தை நிர்வகிக்கும் உழைப்பாளியாக நகர்கிறார்.

கிராமத்திற்கு வெளியே நகரம் சார்ந்த பெண் பாத்திரம், தன் லட்சியமான கேமராவை, தன் உழைப்பால் சேமித்து வாங்கியிருக்கிறார். தவறவிடப்பட்ட அந்தக் கேமராவை மீட்க உறுதியாக போராடுகிறாள். அந்த கேமிராவில் நிகழ்த்தப்பட்ட எளிய மனிதர்களின் உழைப்பை அங்கிகரிப்பவளாகவும் இருக்கிறாள்.

உள் படத்தின் ஹீரோயினாக நடிக்கும் 'மங்கா' கதாபாத்திரம் நான்கு பெண்களிலும் ஒருபடி மேலாக சிறப்பானது. உழைக்கும் மகளிரான அவள், படப்பிடிப்பை உழைப்பாகவே அணுகுகிறாள். படப்பிடிப்பின் இடைவேளையில், தன் தொழிலான காய்கறி விற்பனையிலும் இயங்குகிறாள்.

வீராங்கனைகளாக, போராளியாக இருந்தாலும் பாகுபலிகள் வந்துதான் காப்பாற்ற வேண்டும் என்கிற அனுஷ்கா, தமன்னா மாடல்களை அனாயசமாக ஒரே காட்சியில் தவிடு பொடியாக்குகிறாள். இப்படி படம் நெடுக பெண் கதாபாத்திரங்கள் மன உறுதியும், தெளிவும் மிக்க, சுயம் உணர்ந்த பெண்களாக உலவுகிறார்கள்.

ஹீரோக்கள்/ஆண்களின் மையமான சினிமா உலகில் இப்படிப்பட்ட பெண் கதாபாத்திரங்களை தொடர்ச்சியாக படைப்பது என்பது பேரற்புதமானது. பாராட்டத்தகுந்தது.

ஒரு ஷேர் ஆட்டோ, அதன் ஓட்டுனர் கமா இயக்குனர், ஒரு போட்டோகிராபர் + ஒளிப்பதிவாளர், ஹீரோ+ சிகையலங்கார தொழிலாளர் மரிதேஸ் பாபு, எழுதப் படிக்கவே தெரியாத கதாசிரியர் தாத்தா, கிராமத்து மனிதர்கள் மற்றும் ஒரு கேமிராவை வைத்துக்கொண்டு நெகிழ்சிமிக்க ஒரு திரைப்படத்தை உண்டாக்கியிருக்கிறார்கள்.

எளிய மற்றும் அற்புதமான #CinemaBandi யில் அவசியம் ஒரு ரவுண்டு போகலாம். ❤

Cinema pandi
2021
Netflix
--