#ஶ்ரீகிருஷ்ணன்கதைகள் விபீஷணன் இலங்கையில் இருந்து கடல் தாண்டி ஶ்ரீ ராமனிடம் தஞ்சம் புக வந்திருந்தான். அவன் ஆகாயத்தில் தன் சகாக்கள் இருவருடன் நின்று தரையிறங்க உத்தரவு கேட்டான். இதை ஶ்ரீ ராமரிடம் சென்று சொன்ன சுக்ரீவன் அவன் இராவணனின் உளவாளியாக இருக்கலாம், அவன் எதிரியின் தம்பி, அவனை 
நம்முடன் சேர்க்கலாகாது என்று கூறினான். பலரும் அதை ஆமோதித்தனர். அப்பொழுது ஶ்ரீஆஞ்சநேயர் எழுந்து கூடி இருந்தோர் முன்பு பணிவுடன் வணங்கியபின் ஶ்ரீராமனைப் பார்த்து பேச ஆரம்பித்தார். ஐயனே! தாங்கள் சகல நீதிகளையும் அறிந்தவர். எதையும் ஆய்ந்து அறியும் திறமை படைத்தவர். எனவே தாங்கள்
எடுக்கும் முடிவே சிறப்பானதாக இருக்கும். இருப்பினும் என்னுடைய தாழ்மையான கருத்தையும் இங்கு கூறுவது என் கடமை. தாங்கள் என்னிடம் அன்பு கொண்டு இருக்கிறீர்கள், அதனாலேயே இதைச் சொல்லுகிறேன். நான் வேறு எந்த விதத்திலும் இதனைச் சொல்ல தகுதியானவன் இல்லை. விபிஷணனை ஆராயவேண்டும் என மற்றவர்கள்
தங்கள் கருத்தாகச் சொன்னார்கள். அது அவ்வளவு சாத்தியமில்லை, அதே சமயம் அவனை ஆராய்ந்து பார்க்காமலும் நம்முடன் சேர்த்து கொள்ள முடியாது. அது பெருந்துன்பத்தில் முடிந்து விடும். ஒற்றர்களளை அனுப்பி ஆராயலாம். வெகு தூரத்தில் இருப்போரையே அப்படி ஆராய வேண்டும் ஆனால் விபிஷணன் அருகில்
இருக்கிறான். எனவே அந்த யோசனையும் பயன்படாது. அவன் எந்த ஒளிவுமறைவின்றி ஆகாயவெளியில் நிற்கின்றான் இவன் வந்த இடமும் காலமும் பொருத்தமாக இல்லை என சிலர் சொன்னார்கள்; அது ஒரு புறம் சரியாக இருக்கலாம்; ஆனால் அதையும் ஆலோசிக்க வேண்டும்.இராவணன் கொடியவன். தாங்கள் தர்மவான். இதனை ஆராய்ந்து
அறிந்தவன் இந்த விபிஷணன். அதன் மூலம் இராவணன் கூறிய அநீதிகளை நேருக்கு நேர் அவனிடம் பயமின்றி எடுத்துக் கூறியவன். விரைவில் தன் அதர்மச் செயல்களால் இராவணன் அழிந்து போவான் எனபதைச் சுட்டி காட்டியவன். தங்களுடைய வீரத்தையும் பராக்கிரமத்தையும் அண்ணனிடம் பலமுறை எடுத்துக் கூறிவிட்டான். ஆனால்
அவன் கேட்கவில்ல. தாங்கள் கரதூஷணர்களை, வாலியை வதம் செய்ததை கூறினான். தங்கள் வில்லாற்றலைப் பற்றி எடுத்துரைத்தான். அவைகளுக்கு இராவணன் சற்றும் செவி சாய்க்கவில்லை. எனவே இராவணனின் கொடுமை தாங்காமல் ஸ்ரீ ராமச்சந்திர பிரபு தங்களை நாடி வந்திருக்கின்றான். அவனை சந்தேகிப்பது சரியல்ல. நம்மை
நம்பி வந்திருக்கின்றான் இந்த விபிஷணன். அவனைப் போய் பரிசோதனை செய்வது வீணாக மனக்கிலேசத்தை உண்டாக்கும். நம்மிடம் நம்பிக்கை இல்லாமல் பேசுகிறார்கள் என விபிஷணன் எண்ணக்கூடும். அவன் கபடனாக இருப்பின் உள்ளத்தில் ஒன்றை வைத்துக்கொண்டு வெளியில் ஒன்றை பேசவும் முடியுமே! ஆக, இவர்கள் கூறும்
எதுவும் சரிப்பட்டு வராது. எனவே விபிஷணனை உங்களிடம் அழைத்து வரச் சொல்லுங்கள். அவனிடம் இனிமையாக உரையாடுங்கள். பேசும்போதே அவன் முகபாவங்களைக் கவனியுங்கள். தன் உள்ளத்தில் தோன்றும் எண்ணங்களை ஒருவனால் எளிதில் மறைக்க முடியாது. முகபாவம் வெளிப்படுத்தி விடும். எனவே அவனை அழைத்து ஆராய்ந்து
பாருங்கள். எனக்கு என்னவோ அவன் தர்மத்தை நாடி தானே முன்பு வந்துள்ளான் என்றே தோன்றுகிறது. அதர்மர்த்தின் வழிச்செல்லும் இராவணனை அழிக்க தங்கள் உதவியை நாடுபவன் போன்றே எனக்குத் தோற்றம் அளிக்கின்றான். இது என் தாழ்மையான எண்ணம் என் சிற்றறிவுக்கு எட்டியபடி நான் கூறினேன் அறிஞராகிய தாங்கள்
இதை ஆராய்ந்து பார்த்து முடிவு செய்து கொள்ளுங்கள் எனப் பணிவுடன் கூறி அமர்ந்தான். அனுமன் கூறியவற்றை அமைச்சர்கள் வானரவீரர்கள் அனைவரும் அமைதியாக கேட்டனர். தங்களுக்கு மாறுபட்ட கருத்துகளை அவன் கூறியதால் அவர்களுக்கு கோபம் வரவில்லை மாறாக அனுமனின் சொற்களின் பொருளை மனமுவந்து ஏற்றனர்.
சர்வம் ஸ்ரீ கிருஷ்ணார்ப்பணம்🙏🏻
• • •
Missing some Tweet in this thread? You can try to
force a refresh
