Thread by @anbezhil12

#ஸ்ரீகிருஷ்ணன்கதைகள் #புரட்டாசிஸ்பெஷல் ஏழுமலை எம்பெருமானை தனியாக வழிபடுவதைவிட தாயாருடன் சேர்த்து வழிபடும் போது பெருமாளின் அனுக்கரகம் நம் மேல் அருவி போல் கொட்டுகிறது. இதை நம்மாழ்வார் 'அகலகில்லேன் இறையும் என்று அலர்மேல் மங்கை உறையும் மார்பா' என்று தாயாரை முன்னிட்டு சரணாகதி

செய்கிறார். இப்படி எம்பெருமான் மார்பிலே அமர்ந்தது தன் சுகத்திற்க்காகவா என்றால் இல்லை. நாம் சுகப்பட வேண்டும் என்பதற்காகத்தான். பொதுவாக ஆழ்வார்கள் திவ்விய தேசத்திலும் பெருமாளை சேவிக்கும் போது பக்தி மேம்பட்டு கொஞ்சி மகிழ்வார்கள். ஆனால் திருமலை வந்தால் மட்டும் கதறி அழுது சரணாகதி

செய்து விடுகின்றனர். உதாரணமாக நம்மாழ்வார் மலையப்பனிடம்,
திருவேங்கடத்தானே
புகல் ஒன்றில்லா அடியேன்
உன் அடிக் கீழ் அமர்ந்து புகுந்தேனே
என கதறி சரணாகதி செய்கிறார். இந்த மலையப்பனிடம் ஆழ்வார்கள் என்ன விசேஷத்தை பார்த்தார்கள்? பொதுவாக மற்ற திவ்ய தேசங்களில் பெருமாள் ஒரு சன்னதியிலும்,

தாயார் ஒரு சன்னதியிலும் இருப்பர். சில திவ்ய தேசங்களில் இருவரும் ஒரே சன்னிதியில் அருகருகே இருப்பர். தன் பிள்ளை தவறே செய்தாலும் அதை பொருட்படுத்தாது தாயுள்ளம். தந்தை அப்படியில்லை. பெருமாள் ஒரு தகப்பன் ஸ்தானத்தில், நீதிபதி ஸ்தானத்தில் நம்மை பார்ப்பார். இதற்கு பக்த ராமதாஸ் உதாரணம்.

12 வருடம் சிறையில் தள்ளப்பட்டு தினம் சவுக்கடி அனுபவித்தார். உடலில் ரத்தம் பெருக ராமர் மீது கீர்த்தனைகள் இயற்றினார். ராமரோ ஒரு நீதிபதியாய் தவறுக்கு தண்டனை அனுபவிக்கிறார் என பேசாமல் இருந்தார். கடைசியில் அவருக்கு சீதையின் நினைவு வர 'சீதாம்மா இந்த பக்தனை காப்பாற்ற வருமாறு நீயாவது

உன்னருகில் இருக்கும் ராமனிடம் சொல்லேம்மா' எனக் கதற, உடனே சீதை ராமரிடம், இனி க்ஷணம் தாமதிக்காமல் காப்பாற்றுங்கள்' என்று சொல்ல உடனே ராமரும் ஒரு மனித உருவில் வரியை கட்டி அவரை விடுதலை செய்தார். நமக்காக சிபாரிசு செய்ய தாயார் கூட இல்லாததால். எம்பெருமான் நாம் தனியாக சேவிக்கும் போது

நம் தகுதி, நேர்மையை பார்ப்பாராம். ஸ்ரீராம அவதாரத்தில் வனவாசத்திற்கு கூட வந்த லக்ஷ்மணனை பொழுது விடிந்ததும் வேண்டுமானால் அயோத்தி திரும்பி போய்விடுகிறாயா எனக் கேட்டதும் செய்வதறியாது அவன் அவர் கால்களில் விழுந்தான். பின் ஸ்ரீராமரின் சம்மதத்தை பெற அவரிடம் கேட்டால் நடக்காது என அறிந்து,

தலையைத் தூக்கி அருகிலிருந்த சீதையை பரிதவிப்புடன் பார்த்து சிபாரிசு செய்ய விண்ணப்பித்தார். சீதை உடனே ராமரைப் பார்த்து லஷ்மணன் குளத்து மீன். உங்களை பிரிந்த அவனால் வாழ இயலாது என சொல்ல ராமர் மறு பேச்சின்றி அழைத்துக் கொண்டார். தாயாருக்கு அத்தனை மதிப்பு கொடுப்பார் பெருமாள். மலையப்பனை

காண நாம் மலை ஏறும்போது பெருமாள் பார்க்கும்முன், அவன் மார்பில் இருக்கும் தாயார் நம்மை பார்த்து விடுகிறாள். அவள் பார்த்ததினாலே பெருமாள் நம் தகுதி பாராமல் உடனே அனுக்கிரகம் குறைவில்லாமல் செய்து விடுகிறார். திருமலையப்பனுக்கு உள்ள இந்த தனித்துவம் மற்ற திவ்ய தேச பெருமாளிடம் காணமுடியாது

அதனால்தான் ஸ்ரீ விஷ்ணுவை ராதே கிருஷ்ண, சீதாராமா, லட்சுமிநாராயணா, லட்சுமி வெங்கடேசா, லக்ஷ்மி நரசிம்மர் என தாயாருடன் இணைந்தே அழைக்கிறோம். ஆணும் பெண்ணும் சமம் என என்றோ பரந்தாமன் பற்பல அவதாரங்களில் வாழ்ந்து காட்டியுள்ளார்.
சர்வம் ஸ்ரீ கிருஷ்ணார்ப்பணம்🙏🏾