Thread by @Raamraaj3

*பன்னிரு ஜோதிர்லிங்கங்கள்*

*மனிதன் தன்னுடைய வாழ்க்கையில் சந்திக்க நேரிடும் இன்ப துன்பங்கள், ஏற்றத்தாழ்வுகள், தோஷங்கள் எல்லாவற்றிற்கும் தன்னுடைய கர்ம வினைகளும், செய்த பாவங்களுமே காரணமென்று நம்புகிறான்.*

🙏🇮🇳1

இதிலிருந்து விடுபடவும், பயங்களைப் போக்கி கொள்ளவும் கடவுளைச் சரணடைகிறான். 

பூஜை புனஸ்காரங்கள், விரதங்கள் என்று விதவிதமான வழிபாடுகளை மேற்கொண்டாலும் அவன் நாடுவது இறையருளை மட்டுமே. 🙏🇮🇳2

எல்லா நாட்களிலும் இறைவனை வழிபட்டாலும் சில நாட்களுக்கும் மாதங்களுக்கும் மட்டும் தனிப்பட்ட சிறப்பு கிடைத்து விடுகிறது.

உதாரணமாக, மார்கழி, புரட்டாசி, கார்த்திகை, தை மாதங்களில் திருமால், அம்பாள், ஐயப்பன் என்று ஒவ்வொரு தெய்வத்துக்கும் தனிச்சிறப்புக் கொடுத்துக் கும்பிடுகிறோம். 🙏🇮🇳3

இதில் மாசி மாசம் வரும் சிவராத்திரியையும் சேர்த்துக் கொள்ளலாம்.

சிவனுக்குரிய ராத்திரிகளான நித்ய சிவராத்திரி, பட்ச சிவராத்திரி, மாத சிவராத்திரி, யோக சிவராத்திரி, மகா சிவராத்திரி ஆகியவற்றைப் பஞ்சராத்திரிகள் என்று சொல்லுவார்கள். 🙏🇮🇳4

இதில் மாசி மாசம் வரும் சிவராத்திரியை மஹா சிவராத்திரி என்று கொண்டாடுகிறோம்.

🙏🇮🇳5

பகல் முழுக்க உபவாசமிருந்து, சிவபுராணம், சிவ அஷ்டோத்திரம் படித்து விட்டு ராத்திரி நாலு காலப்பூஜைகளில் கலந்து கொண்டு பால், தேன், சந்தனம், இளநீர், தயிர், கரும்புச்சாறு என்று விதவிதமாக நடக்கும் அபிஷேக ஆராதனைகளைத் தரிசிக்கறது ரொம்ப விசேஷம். 🙏🇮🇳6

இதில் இரவு 11.30லேர்ந்து 1 மணி வரைக்குமான லிங்கோற்பவ காலப் பூஜையில் கலந்து கொள்வது ரொம்பவே சிறப்பானது.

தமிழ் நாட்டைப் பொறுத்தவரைக்கும் சிவனுக்கு உருவ வழிபாடு கிடையாது. லிங்க வடிவில்தான் வணங்குகிறோம்.

🙏🇮🇳7

இந்த லிங்க வடிவங்களிலும் கூட ஜோதிர்லிங்கங்களுக்குத் தனிச்சிறப்பு உண்டு. ஜோதி என்றாலே ஒளின்னு அர்த்தம். ஒரு திருவாதிரை நாளில் சிவன் தன்னை ஒளிமயமான லிங்க வடிவில் வெளிப்படுத்திக் கொண்டதாகச் சொல்லப்படுகிறது.

🙏🇮🇳8

அதனால் மற்ற நாட்களை விட திருவாதிரை தினத்தன்று ஜோதிர்லிங்க வழிபாடு செய்வது விசேஷம். இந்தியாவில் மொத்தம் 12 ஜோதிர்லிங்கங்கள் இருக்கின்றன.

🙏🇮🇳9

சோம் நாத் ஜோதிர்லிங்கம் – குஜராத்.

குஜராத்தின் சோம்நாத் பட்டான், கத்தியவாட் தாலுகாவில் இருக்கும் இந்தக் கோயிலில்தான் முதலாவது ஜோதிர்லிங்கமான சோமநாதர் இருக்கிறார். 🙏🇮🇳10

‘சோம்’ என்ற வார்த்தைக்கு அமிர்தம் என்று அர்த்தமாம். இறையருளான அமிர்தம் அஞ்ஞானத்தைப் போக்கி, அறியாமை இருளிலிருந்து நம்மை மீட்டுக் கொண்டு வருவதால் இவரை சோம்நாத் என்று அழைப்பது பொருத்தமே.

🙏🇮🇳11

தல வரலாறு: தக்ஷ ப்ரஜாபதி தனது மகள்களான 27 நட்சத்திரங்களையும் சந்திரனுக்குத் திருமணம் செய்து வைத்தார். பத்துக் குழந்தைகள் இருந்தாலும் பெற்றோருக்கு ஒரு குறிப்பிட்ட குழந்தை செல்லக் குழந்தையாவதைப்போல் சந்திரனுக்கும் தன்னுடைய மனைவிகளில் ‘ரோகிணி’ மேல் தனிப்பிரியம். 🙏🇮🇳12

அதனால் சக்களத்திச் சண்டையும் வந்தது. பஞ்சாயத்து செய்த தக்ஷன் மருமகனின் ஒளியும் அழகும் அழிந்து போகுமாறு சாபமிட, விமோசனத்துக்காக சந்திரன் வந்திறங்கிய இடம்தான் சோம்நாத். இங்கிருந்த ஜோதிர்லிங்கத்தைப் பூஜித்துத்தான் சந்திரனுக்குச் சாப விமோசனம் கிடைத்தது. 🙏🇮🇳13

சோமன் என்ற வார்த்தை சந்திரனையும் குறிக்கும். அதனால் இங்கேயிருக்கும் இறைவனுக்கு சோமநாதர் என்ற பெயர் வந்தது.

🙏🇮🇳14

மல்லிகார்ஜூனர் – ஸ்ரீசைலம்- ஆந்திரப் பிரதேசம்.

ஆந்திராவின் கிருஷ்ணா நதி தீரத்தில் பாதாளக் கங்கைக்கரையிலிருக்கும் ஸ்ரீசைலம் மலையுச்சியில் இருக்கிறது இந்தக் கோயில். இந்த மலையின் சிறு நுனியைப் பார்த்தாலே வினையெல்லாம் நம்மை விட்டு ஓடிவிடும். அத்தனைப் புண்ணியமுண்டாம்.

🙏🇮🇳15

தலவரலாறு: ஒரு சமயம் தனக்கு முன்னாடி தன்னுடைய அண்ணனான பிள்ளையார் திருமணம் செய்து கொண்டதால் தம்பியான முருகனுக்குக் கோபம் வந்து வீட்டை விட்டு வெளியேறிட்டாராம். (எதுக்குக் கோவப்படணும். ஞானப்பழ விஷயமா நடந்த பஞ்சாயத்தே இன்னும் தீரலை.

🙏🇮🇳16

அதுவுமில்லாம சீனியாரிட்டிப்படி அண்ணனுக்குத்தானே முதல்ல கல்யாணம் நடக்கணும்?. இதெல்லாம் முருகக்கடவுளுக்குத் தெரியாதா என்ன?. அவங்க எது செஞ்சாலும் அதுல ஒரு அர்த்தம் இருக்கும். )

🙏🇮🇳17

சமாதானப்படுத்துவதற்காக வந்த அப்பனும் அம்மையும் ஒன்றாகக் கலந்து ஜோதிர்லிங்க உருவெடுத்து இங்கே அருள் பாலிக்கிறார்கள். மல்லிகா என்பது பார்வதியின் ஒரு பெயர். சிவனுக்கு அர்ஜூனர் என்று இன்னொரு பெயரும் உண்டாம். (கோயிலுக்கு பெயர் வந்த காரணக் கணக்கு சரியாப் போச்சு)

🙏🇮🇳18

மஹா காலேஷ்வர்- உஜ்ஜயினி- மத்தியப் பிரதேசம்

மத்தியப் பிரதேசத்தின் உஜ்ஜயினி பகுதியில் ஷிப்ரா நதிக்கரையில் இருக்கும் இந்தக்கோயிலுக்கு சைவர்களிடையே ரொம்பவும் முக்கியத்துவம் உண்டு. மனித உயிருக்கு முக்தி அளிக்கும் ஏழு தலங்களில் இதுவும் ஒன்று. 🙏🇮🇳19

மற்ற மூர்த்திகளைப் போல இல்லாமல் இங்கே தெற்கு நோக்கியிருக்கும் இறைவனின் சிலை தட்சிணாமூர்த்தியின் வடிவமாகும். தந்திர மரபுகளில் சொல்லப்பட்டிருக்கும் இந்தச் சிறப்பம்சத்தை 12 ஜோதிர்லிங்கங்கள்ல இங்கே மட்டும்தான் காண முடிகிறது.

🙏🇮🇳20

தலவரலாறு: ஸ்ரீகர் என்ற சிறுவன் தானும் இறைவனைப் பூஜை செய்ய ஆசைப்பட்டு, ஒரு கல்லை எடுத்து வைத்துப் பூஜித்தான். அவன் அன்புக்குக் கட்டுப்பட்டு இறைவன் ஜோதிர்லிங்கமா உருவெடுத்து இங்கே தங்கினார் என்றும், 🙏🇮🇳21

அவந்தி நாட்டு மக்களுக்குத் தொல்லை கொடுத்துக் கொண்டிருந்த துஷ்ணா எனும் துஷ்ட அரக்கனை பூமியிலிருந்து  வெளிப்பட்டு அழித்து, மக்களைக் காத்த பின், அவர்கள் வேண்டுகோளை ஏற்றுக்கொண்டு இங்கே தங்கினாரென்றும் விதவிதமாகக் கதைகள் சொல்லப்படுகின்றன. 🙏🇮🇳22

இந்தக் கோயிலின் மூணாவது அடுக்கில் இருக்கும் நாகசந்திரேஷ்வரரை நாகபஞ்சமி அன்றைக்கு மட்டுமே தரிசிக்க முடியும் என்பது ஒரு சிறப்பு.

🙏🇮🇳23

ஓம்காரேஷ்வர்- சிவபுரி-மத்தியப் பிரதேசம்.

நர்மதை ஆற்றிலிருக்கும் சிவபுரி என்ற தீவில் இந்தக் கோயில் இருக்கிறது. இந்தத்தீவு இந்துக்களின் அடையாளமான ஓம் என்ற வடிவத்தில் இருப்பதால் இறைவன் ஓம்காரேஷ்வர் என்று வழங்கப்படுகிறார். 🙏🇮🇳24

தீவின் இன்னொரு பகுதியில் அமரேஷ்வர் கோயிலும் இருக்கிறது.

தலவரலாறு: திரிலோக சஞ்சாரியான நாரதர் ஒரு சமயம் விந்திய மலையிடம், மேரு மலையைப் புகழ்ந்து பேச, பொறாமைப்பட்ட விந்திய மலை தான் அதை விடப் பெரியவராக வளர ஆசைப்பட்டது. 🙏🇮🇳25

ஓம்காரேஷ்வரை நோக்கித் தவமும் பூஜைகளும் செய்தது. “விந்தியா,.. உன் பக்தியை மெச்சினோம். காம்ப்ளான் குடிக்காமலேயே நீ வளருவாயாக” என்று சிவனும் திருவாய் மலர்ந்தருளினார். 🙏🇮🇳26

அப்றமென்ன?.. “நான் வளர்றேனே மம்மி” என்று வளர ஆரம்பித்த விந்திய மலை ஒருகட்டத்தில் கர்வம் தலைக்கேறி சூரிய சந்திரர்களையே வழி மறிக்க ஆரம்பித்தது. கடைசியில் அகத்தியர் வந்து அதன் கர்வமடக்கியது தனிக்கதை.

🙏🇮🇳27

வைத்தியநாதர்- தேவ்கட்-ஜார்கண்ட்

ஜார்கண்ட் மாநிலத்தில் தேவ்கட் பகுதியில் இருக்கும் இந்தக் கோயிலுக்கு வந்து வழிபட்டால் தீராத வியாதிகளும் தீர்ந்து ஆரோக்கியம் கிடைக்கும் என்ற நம்பிக்கையில் மக்கள் வந்து வணங்குகிறார்கள்.

🙏🇮🇳28

தல வரலாறு: சிவனைத் தன்னோடு இலங்கைக்குக் கூட்டிட்டுப் போக விரும்பிய ராவணனுக்குத் தன்னுடைய அம்சமாக ஒரு சிவலிங்கத்தைக் கொடுத்தார் இறைவன். கூடவே இதை இலங்கைக்கு கொண்டு போய்ச் சேர்க்கும் வரைக்கும் தரையில் வைக்கக்கூடாதென்று நிபந்தனையும் விதித்தார். 🙏🇮🇳29

நிபந்தனையை மீற வேண்டிய கட்டாயத்துக்கு உள்ளானதால் சிவலிங்கம் மறுபடி எடுக்கமுடியாமல் தரையுடன் ஒட்டிக்கொண்டது. ஏமாற்றமடைந்த ராவணன் தன்னுடைய ஒன்பது தலைகளையும் ஒவ்வொன்றாகச் சீவிக் காணிக்கையாகக் கொடுக்க, பதறிய சிவன் காட்சி கொடுத்து அந்தத் தலைகளை மறுபடி ஒட்ட வைத்தார்.

🙏🇮🇳30

ராவணனுக்கு வைத்தியம் பார்த்ததால் வைத்தியநாதருமானார். இந்தத் தலம் 52 சக்தி பீடங்களில் ஒன்றாவும் கருதப்படுகிறது. இது சக்தியின் இதயம் விழுந்த இடமாம்.

🙏🇮🇳31

பீமாசங்கர்- சஹயாத்ரி – மஹாராஷ்ட்ரா

பூனாவுக்கருகே சஹயாத்ரி மலைப்பிரதேசத்தில் இருக்கும் பவகிரி என்ற ஊரில், பீமரதி நதிக்கரையில் இருக்கும் இந்தக் கோயில் 18-ம் நூற்றாண்டைச் சேர்ந்தது. 🙏🇮🇳32

நாகரா கட்டடக் கலை முறையில் கட்டப்பட்ட இந்தக்கோயிலுக்கு சிவாஜி மன்னரும்,வருகை தந்து மானியங்களை அள்ளி வழங்கியிருக்கிறார். இந்தக் கோயிலின் கோபுரம் நாநா ஃபட்னவிஸ் என்பவரால் கட்டப்பட்டிருக்கிறது.

🙏🇮🇳33

தலவரலாறு: இலங்கைப் போரில் கொல்லப்பட்ட கும்பகர்ணனின் மகனான பீம், விஷ்ணுவின் ஒரு அவதாரமான ராமரால் தன் தந்தை கொல்லப்பட்டதைத் தாய் மூலம் அறிந்து கொண்டு, விஷ்ணுவைப் பழி வாங்குவதற்காக பிரம்மாவை நோக்கித் தவம் செய்தார். 🙏🇮🇳34

பிரம்மா கொடுத்த வரங்களின் பலத்தால் மூவேழு லோகங்களையும் அடிமைப்படுத்தி, தனக்கென்று பறக்கும் கோட்டைகளையும் ஏற்படுத்திக் கொண்டு அட்டகாசம் செய்ய ஆரம்பித்த பீமனைச் சிவன் சண்டையிட்டு முப்புரம் எரித்து அத்துடன் பீமனையும் சாம்பலாக்கி அழித்தார். 🙏🇮🇳35

அப்போது அவர் உடம்பில் ஏற்பட்ட வியர்வைதான் பீமரதி நதியா உருவெடுத்தது. அப்புறம் அனைவரின் வேண்டுகோளுக்கிணங்கி சிவன் அங்கேயே ஜோதிர்லிங்கமாக உருவெடுத்துக் கோயில் கொண்டார்.

🙏🇮🇳36

இராமநாதர்- இராமேஸ்வரம்- தமிழ்நாடு

தமிழ்நாட்டில் ராமேஸ்வரம் என்ற தீவில் இருக்கும் இந்தக் கோயிலுக்குப் பாம்பன் பாலம் வழியாகச் செல்லலாம். மொத்தம் 36 தீர்த்தங்கள் கொண்ட, திராவிடக் கட்டடக் கலை முறையில் கட்டப்பட்டிருக்கும் இந்தக் கோயிலின் பிரகாரங்கள் உலகப் புகழ் பெற்றவை.

🙏🇮🇳37

தலவரலாறு: இராவணனை அழித்தபின் அயோத்தி திரும்பிக் கொண்டிருந்தபோது பிரம்மஹத்தி பாவத்தைப் போக்கிக் கொள்வதற்காகச் சிவபூஜை செய்ய நினைச்சார் ராமர். சிவலிங்கம் கொண்டு வரச் சென்ற அனுமன் திரும்பி வரத் தாமதமாகவே சீதா பிராட்டி தன் கையாலயே மணலைப் பிசைந்து லிங்கம் உருவாக்கினார்.

🙏🇮🇳38

ராமர் அந்த லிங்கத்துக்குப் பூஜை செஞ்சதால் இங்கேயுள்ள சிவன் ராமலிங்கர் என்று நாமகரணம் சூட்டப்பட்டார். பிற்பாடு அனுமர் கொண்டு வந்த லிங்கமும் இங்கேயே பிரதிஷ்டை செய்யப்பட்டு காசிலிங்கம், அனுமன்லிங்கம் என்ற பெயர்களில் வழங்கப்பட்டு வருகிறது. 🙏🇮🇳39

இங்கே கடலாடிப் பாவங்களைப் போக்கிக் கொள்ள உலகம் முழுவதிலுமிருந்து மக்கள் வருகிறார்கள். இந்தியாவைப் பொறுத்த மட்டில் காசி-ராமேஸ்வரம் இரண்டுமே முக்கியமானவை.

🙏🇮🇳40

காசியிலிருந்து ஆரம்பிக்கும் தலயாத்திரை ராமேஸ்வரம் வந்து ராமலிங்கத்தைத் தரிசித்துக் கங்கை நீரால் அபிஷேகம் செய்தால்தான் முழுமை பெறும். இங்கேயிருந்து ஆரம்பிக்கும் யாத்திரைக்கும் அப்படியே.

🙏🇮🇳41

கேதார்நாத்-கேதார்-உத்தராகாண்ட்

ருத்ர இமயமலைப் பகுதியில், மந்தாகினி நதி தீரத்திலிருக்கும் கேதார் மலையுச்சியில் இந்தக் கோயில் இருக்கிறது. இங்கிருக்கும் பருவ நிலை காரணமாக ஏப்ரலிலிருந்து நவம்பர் வரை மட்டுமே இந்தக் கோயில் திறந்திருக்கும்.

🙏🇮🇳42

மற்ற மாதங்களில் இந்தக் கோயிலின் பூசாரிகள் உகிமந்த் என்ற இடத்துக்குப் போய் அங்கிருந்து பூஜையைத் தொடருவார்கள். இந்தக் கோயிலுக்கு கௌரிகுண்ட் என்ற இடத்திலிருந்து மலையேறித்தான் போக வேண்டும்.

🙏🇮🇳43

கேதார் நாத் யாத்திரை போகும் புனித யாத்திரீகர்கள் கங்கோத்ரியிலிரிந்து கங்கை நீரையும் யமுனோத்ரியிலிருந்து யமுனை தீர்த்தத்தையும் கொணர்ந்து கேதார நாதருக்கு அபிஷேகம் செய்வார்கள்.

🙏🇮🇳44

தலவரலாறு: நர-நாராயணர்களின் தவத்தை மெச்சி அவர்கள் முன் தோன்றிய சிவபெருமான் அவர்கள் வேண்டுகோளுக்கிணங்கி ஜோதிர்லிங்கமா இங்கே கோயில் கொண்டார். இந்தக் கோயில் பாண்டவர்களால் கட்டப்பட்டதா சொல்லப்படுகிறது, அர்ஜூனன் தவம் செய்து பாசுபதாஸ்திரம் பெற்றது,

🙏🇮🇳45

திரௌபதி கேட்ட கல்யாண சௌகந்திகம் என்ற பூவைக் கொண்டு வரக் கிளம்பிப்போன பீமன் முதன் முதலா அனுமனைச் சந்தித்தது, ஈசனின் இடப்பக்கம் கேட்டு பார்வதி தவம் செய்து அர்த்தநாரீஸ்வரர் ஆனது என்று இங்கே நடந்ததாகச் சொல்லப்படும் புராண விஷயங்கள் ஏராளம்

🙏🇮🇳46

காசிநாதர்- காசி- உத்தரப்பிரதேசம்

இந்துக்களோட வழிபாட்டுத் தலங்களில் காசி ரொம்ப ரொம்ப முக்கியமான இடம். இங்கே இறப்பவர்களில் காதுகளில் அந்த சிவனே தாரக மந்திரத்தை உச்சரித்து நேரடியாகச் சொர்க்கத்துக்கு அனுப்பி வைக்கிறதாக ஐதீகம்.

🙏🇮🇳47

தலவரலாறு: தன்னுடைய முன்னோர்களுக்கு முக்தியளிக்கும் பொருட்டுத், தவம் செய்த பகீரதனுக்காக ஆகாயகங்கையைத் தன் முடிமேல் தாங்கிப் பூலோகத்துக்குக் கொண்டுவந்த இறைவன் இங்கே கோயில் கொண்டிருக்கிறார். 🙏🇮🇳48

அசலான கோயில் 1490-ல் முதன்முறையாகக் கட்டப்பட்டது என்று சொல்லப்பட்டாலும், தொடர்ந்த படையெடுப்புகள் மற்றும் கொள்ளையடிப்புகள் காரணமாகப் பலமுறை அழிக்கப்பட்டது. 🙏🇮🇳49

இந்தோரைச் சேர்ந்த ராணி அகல்யா பாய் ஹோல்க்கரின் கனவில் வந்து சிவன், தன்னுடைய கோயிலைச் செப்பனிடுமாறு கட்டளையிடவே 1777-ல் உண்மையான விசுவநாதர் ஆலயத்திலிருந்து சற்றுத் தொலைவில் தற்போதிருக்கும் கோயில் கட்டப்பட்டிருக்கிறது.

🙏🇮🇳50

த்ரம்பகேஷ்வர்-த்ரிம்பாக்-
மஹாராஷ்ட்ரா

மஹாராஷ்டிர மாநிலத்தின் நாசிக் நகரிலிருந்து 28 கி.மீ தொலைவில் த்ரிம்பாக் என்ற நகரில் இக்கோயில் அமைந்திருக்கிறது. கோதாவரி ஆறு இங்கிருந்துதான் பாயத்தொடங்குகிறது என்பது குறிப்பிடத்தக்கது. 🙏🇮🇳51

இறைவன் மும்மூர்த்திகளின் முகங்களுடன் அமைந்திருப்பது சிறப்பு. பிரம்மகிரி மலையின் அடிவாரத்தில் அமைந்திருக்கும் இக்கோயில் முழுக்க முழுக்க கருங்கற்களால் கட்டப்பட்டிருப்பது சிற்பக்கலையின் சிறப்புக்கு ஓர் எடுத்துக்காட்டு.

🙏🇮🇳52

தலவரலாறு: ஒரு சமயம் கௌதம முனிவர் தன் மனைவி அகல்யாவுடன் இங்கே வசித்து வந்தார். வருணபகவானின் அருளால் அவருக்குக் கிடைத்த அட்சய பாத்திரத்தைக் கண்டு பொறாமையுற்ற மற்றவர்கள் தவ வலிமையால் ஒரு பசுவை உருவாக்கி அது கௌதம முனிவரின் தோட்டத்தில் மேயும்படிச் செய்தனர். 🙏🇮🇳53

கௌதம முனி ஒரு தர்ப்பைப்புல்லால் அதை விரட்டவே, அது அங்கேயே இறந்தது. பசுஹத்தி செய்த பாவத்தைப் போக்க கௌதம முனிவர் சிவபெருமானிடம் ஆகாய கங்கையை வேண்டவே கங்கை ஆசிரமத்துக்கு வந்து தன்னுடைய நீரால் பாவத்தைப் போக்கினாள். 🙏🇮🇳54

கங்கை மற்றும் முனிவரின் வேண்டுகோளுக்கிணங்க சிவபெருமானும் மற்ற கடவுளரும் அங்கேயே தங்குவதாக அருள் பாலித்தனர். 🙏🇮🇳55

பன்னிரண்டு வருடங்கள்க்கு ஒரு முறை இங்கே நடைபெறும் கும்பமேளா மிகவும் சிறப்பு வாய்ந்தது. பிரம்மாவும் விஷ்ணுவும் இறைவனின் அடிமுடி தேடியபோது அடிமுடியில்லா பிழம்பாய் ஐயன் நின்றதும் இங்கேதான் என்றும் கூறுகிறார்கள்.

🙏🇮🇳56

நாகேஸ்வர்-த்வாரகா-குஜராத்

குஜராத் மாநிலத்தின் சௌராஷ்ட்ரா பகுதியில் அமைந்திருக்கும் இக்கோயிலின் இறைவனான நாகேஸ்வரரை வழிபட்டால் விஷப்பூச்சிகளின் விஷங்கள் அண்டாது என்று நம்பப்படுகிறது. கோமதி த்வாரகாவிலிருந்து வைத் த்வாரகா செல்லும் பாதையில் இக்கோயில் உள்ளது.

🙏🇮🇳58

தலவரலாறு: தாருகாசுரன் என்பவன் சிவ பக்தையான சுப்ரியாவைச் சிறையெடுத்துப் பாம்புகளின் நகரமான தாருகாவனத்தில் அடைத்து வைத்து துன்புறுத்தினான். பாசுபதாஸ்திரத்தால் அவனை அழித்துத் தன் பக்தையைக் காத்த இறைவன் தாருகாசுரனின் வேண்டுகோளுக்கிணங்கி இங்கேயே கோயில் கொண்டார். 🙏🇮🇳59

தன்னுடைய பெயரால் இத்தலம் வழங்கப்பட வேண்டும் என்ற தாருகாசுரனின் விருப்பத்துக்கிணங்க இத்தலம் நாக்நாத் என்று வழங்கப்படுகிறது.

🙏🇮🇳60

க்ரிஷ்னேஷ்வர்-ஔரங்காபாத்-
மஹாராஷ்ட்ரா

மஹாராஷ்ட்ராவின் அஜந்தா-எல்லோராக் குகைகளுக்கு அருகே இருக்கும் ஔரங்காபாதின் சமீபத்திலிருக்கும் தௌலதாபாதிலிருந்து சுமார் 20 கி.மீ தொலைவில் வேருல் என்ற சிற்றூரிலுள்ளது இக்கோயில்.

🙏🇮🇳61

இந்தக்கோயிலுக்கு சத்ரபதி சிவாஜி மகாராஜாவின் பாட்டனான மல்ரோஜி ராஜே போஸ்லேயும், இந்தோர் ராணியான அகல்யா பாய் ஹோல்க்கரும் திருப்பணிகள் செய்துள்ளனர்.

🙏🇮🇳62

தலவரலாறு: தனக்குக் குழந்தையில்லாதால் தன் தங்கை குஷ்மாவைத் தன் கணவன் சுதார்முக்கு திருமணம் செய்து வைத்தாள் சுதேஹா. மூத்த சகோதரியின் அறிவுரைப்படி தினமும்101 சிவலிங்கங்களைப் பூஜை செய்து அருகிலிருந்த நதியில் விட்டு வந்தாள் குஷ்மா. 🙏🇮🇳63

சிவனின் திருவுள்ளத்தால் அவளுக்கு ஒரு மகனும் பிறந்தான். முதலில் அன்புடனிருந்த சுதேஹா நாளடைவில் பொறாமையுற்று தன் தங்கையின் மகனைக் கொன்று நதியில் வீசிவிட்டாள். 🙏🇮🇳64

இரத்தத்துளிகளைக் கண்டு சந்தேகமுற்ற குஷ்மாவின் மருமகள் அது தன் கணவனுடையதுதான் என்றறிந்து தன் மாமியாரான குஷ்மாவிடம் முறையிடவே, அவள் முதலில் வருத்தமுற்றாலும் பின் இறைவன் கொடுத்ததை அவனே எடுத்துக்கொண்டான் என்று தெளிந்தாள்.

🙏🇮🇳65

எப்போதும் போல் பூஜை செய்த 101 சிவலிங்கங்களை நதியில் கரைப்பதற்காக எடுத்துச் சென்றபோது தன்னுடைய மகன் உயிர்பெற்று நதியிலிருந்து எழுந்து வருவதைக் கண்டாள். 🙏🇮🇳66

அவளுக்கு ஜோதிர்லிங்கமாகக் காட்சியளித்த இறைவன் அவளுடைய வேண்டுகோளுக்கிணங்கி சுதேஹாவை மன்னித்து அங்கேயே கோயில் கொண்டார். குஷ்மாவிற்கு அருளியதால் குஷ்மேஷ்வர் என்றும் நாமம் கொண்டார்.

ஓம் நமசிவாய 🇮🇳🙏🇮🇳

#வாழ்க_பாரதம் 🙏🇮🇳
#வளர்க_பாரதம் 🙏🇮🇳🙏