Thread by @Lavvelenata

Ve conto na storia.
E ovviamente anca quea de oggi xe na #storiavivaeveneta e de defolt na brutta storia.
Anca se a xe na storia d’amore.
Na storia de na copia. Affiatata.

Una dee tante copie venete che condivide el leto, i sentimenti a partita iva e i progetti.
E che fa dea vita na impresa.
Na roba veneta appunto.

Un mario e na mojer che oggi ciamaremo MARIO e MARIA MATONI & AMORE.

Na storia che xe successa nea tera dei radici. Queo variegato. Che xe manco bon de quel rosso ma sicuramente mejo de quel a baea rosso e bianco.
Na storia de come amor e affari e bojae se fa in coppia.

Nea bona e nea cativa sorte.
Finchè morte o guardia de finansa no separa.
O mejo … no se mete in mezo.

Na storia de amore e de na bruta maeatia che gà avuo e gà ancor oggi tanti veneti: a maeatia del maton.
A smania de costruir su case.
Piera, malta e matoni.
Matori, malta e piera.

In Veneto se gà costruio de tutto. Case, capannoni, centri commerciai, rotonde, magazini.
Tuto trane che strade, che xe quee che serviria.
Cemento ovunque.
Veneto xe a region che consuma pi suolo de tutti.

Anca se pa qualcuno semo na region che vive de agricoltura e rurae tipo i Amish (cit. quel che sa, dea scorsa settimana in tema #tuttiodianoiveneti) e qua ghe xe sol che campi e sterminate praterie.
E chea provincia de Padova vive de agricoltura.

No ghe xe imprenditor veneto che no se sia maeà dea maeatia dea piera.
No se salva nessuna provincia.
Tutti de rifa o de rafa na immobiliare parallela i a gà avua o i la gà.
Dove investito i skei e el nero se non so maton … l’investimento pi sicuro.
Sempre.

A storia de oggi xe a storia de na fameja veneta perché a fine dea fiera tutto el circo i lo gà messo su mare (MARIA AMORE) , pare (MARIO MATONI), fioi de primo e de secondo letto, cugini, de primo, secondo, terso grado. Grado minimo previsto 14°.
E conoscenti.

Perché anca sto giro tutti savea. O pensava de saver, mejo.
Un già come su Twitter in fondo.

Ma prima de pagar, sempre perché qualcun li gà sgamà, gà fatto skei e festa tutti.
Come coi veri parenti.

Oltre a maeatia dea piera anca quei de oggi soffriva de n’altra maeatia che contagia ancor oggi tanti veneti: i vodi de memoria, el desmentegarse e robe, no ricordarse che a un determinato giorno te gà da far determinate cose.
Tipo pagar e tasse.

Chissà se sbassandoe o usandoe mejo no i riessa a debellare sta maeatia .. ma questa xe n’altra storia.
Bruta anca questa.
E non sol veneta.

MARIO E MARIA MATONI & AMORE gà fato e robe in grando, pi de altri, mejo de altri.
MARIO e MARIA MATONI & AMORE.
Xe na storia de fameja, de skei, de case, de faimenti pilotati, de robe losche tra MALTA (pa star in tema edile) e CIPRO.

CIPRO … ultima propagine del Stato da Mar dea Serenissima Repubblica de Venessia … Caterina Corner .. Domina e reina de Jerusalem Cypri et Armeniae.
Che bea che xe CIPRO …

Tuti ghe voeava ben a Venessia quando che a dominava Cipro. Nissun gavea da dir. Anca perché Venessia a Cipro xe sta na Mamma affettuosa concedendo privilegi a tutti e trattando i fioi come se i fosse tutti venesiani.
Ma questa xe n’altra storia. Bea. Che no sta a mi raccontar.

Genesi dee bojae che MARIO e MARIA MATONI & AMORE xe riussii a far:
I do sposi gà na società nea Casteana che ciamemo pa comodità Immobiliare CASA & CASTEI Srl.

Pa tre anni scarsi a MARIA xe amministratrice.
Dopo de ea, e pa gnanca un anno, amministrator deventa uno dei so fioi de primo letto.
Che no gà voja de far un casso.
E allora amministrator deventa MARIO.

Ma Mario xe un operativo mia tempo a star drio a tutte e carte e aver un ruolo de responsabiità … e allora come amministrator subentra el xenero de MARIO, fradel de so prima mojer.
Tutto in fameja.

E tutto nel giro de qualche anno. E tuti cambi de amministratori tra novembre e dicembre.
Gnanca el xenero no va ben e alora no resta che metere uno fora dea fameja.
Uno brao.
Uno che dea CASA & CASTEI deventa liquidator. Dopo a Befana dell’anno dopo CASA&CASTEI faisse.
Pecà.

Pecà che faissa co un buso de 2,3 milioni.
Desso che i gavea trovà l’amministratore vaido e brao.
Robe che succede tutti ste passaggi de aministratori … vero ?

CASA & CASTEI faisse proprio finchè i xe drio costruir na ventina de imobii nea Casteana. A crisi dell’ediissia..
Pecà che e case fosse za stae meze vendue e na bona parte co caparre in man.

E na banca che gà finansià tutto co 4 milioni scarsi de euro, pa costruir e splendide residense nea città de Giorgione.
TEMPESTA.
Riva proprio come a tempesta a crisi dell’edilizia, dio caro.
Te scolti i edii ediissia xe da sempre in crisi ...

Na sera in leto:
MARIA: Ciò Mario semo drio perdar tutto, dio caro.
MARIO: No Maria, mai darse par vinti, passarà anca questa, dai tesoro no sta far sti pensieri, te vedarè che risolvemo tutto.
MARIA: Teo disi ti. Tuti i skei e i sacrifici de na vita xe drio ndar in fumo.

MARIO: A te go dito de no preoccuparte. Dormi, girate da chealtra parte che doman risolvemo tutto. Assame far a mi.
MARIA: Varda che mi tuti i mercore vo cotonarme i cavej e no vojo rinunciarghe.
MARIO: Sta mia far a insemenia. Ghe penso mi.

MARIO e MARIA MATONI & AMORE gà da svodar CASA & CASTEI prima de farla faire e salvar el giro de skei che i gà messo su.
MARIO E MARIA MATONI & AMORE no xe mia stupidi. Pa far serte robe ghe vol testa. E fegato.
E tanto Amore.
Pai skei.

I fa amicissia co dei inglesi. Chi xe che no gà amissi inglesi ? Mai friend.
Sti amissi inglesi xe dei intermediari finansiari inglesi e gà na LTD.
Che gà un conto corrente a Cipro.
E i amissi se vede nel momento del bisogno. Giusto ?

E allora i gheo presta a MARIO E MARIA MATONI & AMORE pa trasferir 210 mila euro el 24 settembre e 120 mila el 29 aprie dell’anno dopo.
Pecà che a società dei brits friend risulta cessata al 10 settembre de do anni prima …

Ma cossa votu che sia .. no i fasea mia gnente … serviva sol pa far transitar al sicuro i skei.
Fato sta che no ghe xe giustificasion pai bonifici che MARIO E MARIA MATONI & AMORE fa ai inglesi … ma va ben istesso.

MARIO: Sito contenta Maria ? I skei i ghemo messi al sicuro. A Cipro. Che iera Serenissima. Te gaveo dito mi de star serena che tutto se risolve, basta aver pasiensa …
MARIA: Ben varda questa xe za na bea roba ma ghe xe tutti i immobii dio caro …

MARIO: Ghea moito de rompare i cojoni .. a te go dito che ghe penso mi .. te vedarè che salvemo anca quei .. fidate dio caro.

Immobii … matoni … MALTA. E allora spostemoi a Malta.
See … come fatu spostar dei immobii daea Casteana a Malta … mia fassie …Pa quei che no sa …
MARIO E MARIA MATONI & AMORE sa. Queo che ghe interessa i lo sa benissimo. E sposta i immobii so na società de Malta.

A società de Malta dir a verità xe un GEIE… come tutti savì (perché qua tutti sa tutto) e GEIE no gà scopo de lucro e serve sol ai so membri de sostenerse a vicenda … come un matrimonio dir el vero … pa realizzare progetti imprenditoriai.
Se usae ben e GEIE serve a questo.

Pecà che MARIO e MARIA MATONI & AMORE, sposai in ciesa col vestito bianco gà capio mal sol so funsionamento e le gà usa pa schermare i patrimoni dae procedure concorsuali e de recupero erariae.
Amor a prova de erario.
Amor vero.
El tutto pa svodar a CASA & CASTEI Srl.

E allora i trasferisse al GEIE MALTA i 22 immobii dea CASA & CASTEI
GEIE MALTA vien saver de l’avvio de na verifica ispettiva da parte dell’ADE (secondo mi mejo de cossita no podea mia vegner l’acronimo) … e cossa faea ? Trasferisse tutti a GEIE MALTA 2.

Come costruir na casa. Matoni e matoni.
Fatti de società.
Sempre de MARIO e MARIA MATONI & AMORE.

Pecà che oltre a scoltar e teefonae serte persone passa el tempo a controeare i conti correnti .. e da la i vede che i 22 immobii xe sol stati formalmente ceduti ae do GEIE DE MALTA ....

e che de base MARIO e MARIA MATONI & AMORE continuava a gestirli direttamente e a godere dei proventi del so sfruttamento.

MARIO e MARIA MATONI & AMORE pensava de farla franca e invesse gnente.
A MARIA pensava che nissun la tegnesse sotto controeo i mercore co ndava cotonarse i cavej …

E na matina el caffè i gheo porta in leto quei dea Nec recisa recedit che i xe impiccioni e curiosi come quei dea Primi insidias icere, ma co vestiti de coeori diversi.

E insieme al caffè i ghe porta un foglio co scritto: 200 mila euro iva evasa e 2.3 milioni de euro de bancarotta.

MARIA: Mi no so gnente.
MARIO: Mi no so gnente
Davanti al giudice in coro: MI NO SO GNENTE.

E quei che gavea xa comprà e case del Giorgione ? E gnente gnanca lori…. Quei continua a pagare e rate mensili del mutuo de na casa che no sarà mai sua.

MARIO e MARIA MATONI & AMORE no xe mia do personaggi studiai.
Se sa che el QU veneto xe mia alto.
Dopotutto xe do veneti rurai, coea tersa media …

che i sia stai aiutai da qualcun a far tutto sto giro o che sia sol l’Amore che move il sole e l'altre stelle a far deventare gegni dea truffa ?
O xe l’Amore che xe na gran truffa ?
Canzone da ascoltare: La costruzione di un amore – Ivano Fossati.
End.