Thread by @savidhasasi

#November19

ஒரேநாளில் ஆண்கள் தினமும், கழிப்பறை தினமும்.. ஏனெனில் இரண்டையுமே மேம்படுத்த வேண்டும் போன்ற மீம்ஸ் நேற்று முழுவதும் கண்களில் பட்டபோதும், உலகில் 420 கோடி மக்கள் கழிப்பறை வசதி இல்லாமல் இருக்கின்றனர் என்றிருக்கும்போது, Sustainable Sanitation isn't a joke என்பதே உண்மை!
1/n

நமது வாழ்நாளில், சராசரியாக மூன்று வருட காலங்களை, நாம் கழிவறைகளில் கழிக்கிறோம். அதிலும் ஆண்களைக் காட்டிலும், ஒன்றிலிருந்து ஒன்றரை வருட காலம் அதிகம் செலவிடுகின்றனர் பெண்கள் என்கிறது ஓர் ஆய்வு..
2/n

இந்நிலையில், பொதுக்கழிப்பிடங்களில், அதிலும் வெஸ்டர்ன் டாய்லெட்டுகளைப் பயன்படுத்த வேண்டிய சூழ்நிலையில் நோய்த்தொற்று ஏற்படாமல் பெண்கள் பாதுகாப்பாக இருப்பது மிகவும் அவசியமான ஒன்றாகிவிட்டது..
3/n

நமது மலக்குடலிலிருந்து வெளியேறும் மலத்தில், ஏறத்தாழ கோடிக்கணக்கான வைரஸ்கள், லட்சக்கணக்கான பாக்டீரியாக்கள் மற்றும் ஆயிரக்கணக்கான பாராசைட் என்ற ஒட்டுண்ணிகள் காணப்படுகின்றன..
எனவே பாக்டீரியா, வைரஸ் மற்றும் பிற கிருமிகளின் புகலிடமாக கழிவறைகள் இயல்பாக விளங்குகின்றன..
4/n

அதிலும் வெஸ்டர்ன் டாய்லெட்டின் கம்மோட் மீது நேரடியாக அமர்வதால் சிறுநீர்த் தொற்று, பிறப்புறுப்பில் புண், வெள்ளைபடுதல், தோல் அழற்சி போன்ற பல நோய்த் தொற்றுகள் பெண்களுக்கு மிகச் சுலபமாக ஏற்படும் வாய்ப்புகள் அதிகமாக உள்ளன..
5/n

டாய்லெட் கம்மோடுகளில் மட்டுமன்றி, கழிப்பறை கதவுகள் மற்றும் கைப்பிடிகளில் இருக்கும் கிருமிகளின் அளவு 40000த்திற்கும் மேல். இவற்றால் சிறுநீர்த்தொற்று, பிறப்புறுப்பில் தொற்று, வயிற்றுப்போக்கு, டைஃபாய்ட் காய்ச்சல், காமாலை ஆகியன ஏற்படவும் வாய்ப்புகள் அதிகம்..
6/n

பெண்களுக்கான சில பாதுகாப்பு முறைகள்:
-டாய்லெட்டை உபயோகிக்கும் முன்பும், பின்னரும் ஃபளஷ் செய்தல்.
-கைகளை சுத்தமாக சோப் கொண்டு கழுவுதல்.
-இந்தியன் கழிப்பறைகளில் கடைப்பிடிப்பது போல தண்ணீர் கொண்டு கழுவுதல்.
-டிஷ்யூ அல்லது டாய்லெட் பேப்பரை உபயோகித்தல்.

பெண்களுக்கு மட்டும் விழிப்புணர்வை ஏற்படுத்தினால் போதுமா, ஆண்களுக்கு வேண்டாமா என்றால் இல்லங்களிலும், சில பணியிடங்களிலும் Unisex என்ற இருபாலருக்குமான கழிப்பறைகளில், வெஸ்டர்ன் டாய்லெட்டுகளைப் பயன்படுத்தும்
ஆண்களும் Toilet Etiquettes சிலவற்றை பின்பற்றுவது அவசியமாகும்..

அதற்கு முன்பாக
வெஸ்டர்ன் டாய்லெட்டின் பகுதிகளையும், அவற்றின் உபயோகங்களையும் சிறிது புரிந்து கொள்வோம்..

கர்ப்பிணிப் பெண்கள், மூட்டு வலி, மூட்டு வீக்கம் உள்ளவர்களுக்கு வரப்பிரசாதமாக உள்ள இந்த வெஸ்டர்ன் டாய்லெட் எனப்படும் கம்மோடில்
மூன்று பகுதிகள் உள்ளன..

அவை,
- டாய்லெட் பேசின்,
- டாய்லெட் சீட் என்ற பிளாஸ்டிக் வளையம்,
- டாய்லெட்டின் மேல் மூடி அல்லது தட்டு.

சிறுநீர் மட்டும் கழிப்பவர்கள், வளையம் மற்றும் தட்டு இரண்டையும் தூக்கிவிட்ட பிறகு தான் பயன்படுத்த வேண்டும்..
இல்லையெனில் ஆண்களும் அமர்ந்தே சிறுநீர் கழிக்கலாம்..

ஏனெனில் மூடியை மட்டும் வெறுமனே தூக்கி சிறுநீர் கழித்தால், முந்தைய நபர் அதன் மீது சிதறிய சிறுநீர், பின்பு வருபவரின் உடலில் பட வாய்ப்புள்ளது என்பதால், சுகாதாரத்தை வலியுறுத்தவே, இந்த வளையம் அமைக்கப்பட்டுள்ளது..

மலம் கழிப்பவர்கள், தட்டை மட்டும் தூக்கி, வளையத்தின் மேல் அமர வேண்டும் என்பது அனைவரும் அறிந்ததே. அதிலும் முதலில், ஃப்ளஷ் செய்துவிட்டு மலம் கழிக்க வேண்டும். இறுதியில் மீண்டும் மறவாமல் ஃப்ளஷ் செய்ய வேண்டும். முக்கியமாக டாய்லெட் பேசின், எப்போதும் மூடிய நிலையிலேயே இருக்க வேண்டும்..

நமது நாட்டில் டிஷ்யூ பேப்பரை குறைவாக உபயோகப்படுத்துகிறோம் என்றாலும், இது கைகளில் கிருமிகளைப் பரப்புவதை பெரிதும் குறைக்கிறது என்பதை நினைவில் கொள்வோம்..

மேலும் பக்கெட், மக் ஆகியவற்றால் பரவும் நோய்த்தொற்றை குறைக்க, டாய்லெட் ஹேண்ட் ஷவரை பயன்படுத்தலாம்..

வெஸ்டர்ன் மற்றும் இந்தியன் டாய்லெட்கள் இரண்டும் இருக்கும் பொதுகழிப்பறைகளில், இந்தியன் டாய்லெட்களை பயன்படுத்துதல் ஏற்றதாகும். ஏனெனில் நமது இயல்பான குத்தவைத்து அமரும்நிலை (Squatting Method) முழுமையாக மலம் கழிக்க உதவுவதோடு
இடுப்பு மற்றும் தொடையின் தசைகளுக்கு வலிமையையும் அதிகரிக்கும்

நான்காயிரம் ஆண்டுகளுக்கு முன்பே, மொகஞ்சதாரோ நாகரிகத்தில் முதன்முதலாக கழிப்பறைகளை ஏற்படுத்திய நமக்கு, அதன் பயன்பாடு பற்றிய விழிப்புணர்வு சற்று அதிகம் தேவைப்படுகிறது என்பது தான் இன்றைய உண்மை நிலை..

இயற்கை அழைக்கும்போது, (When Nature Calls) இவற்றையெல்லாம் முழுமையாக அறிந்திருப்பதுடன்,
ஆரோக்கியமான சமுதாயத்தை உருவாக்க, நம் வீட்டை மட்டுமல்லாமல், நமது சுற்றுப்புறத்தையும் தூய்மையாகயும், சுகாதாரமாகவும் வைத்திட இந்த உலக கழிப்பறை தினத்தில் உறுதி ஏற்போம்!
n/n
#WorldToiletDay