Thread by @magago

Estes días estamos vendo a enxurrada de novos parques eólicos e as mobilizacións de numerosos colectivos locais ante o seu enorme impacto.

Eu quérovos falar dun especialmente grave: o que afecta a Castro Valente, en Padrón. E explico por que.👇

Coñecín Castro Valente por un lector do blog en 2009. Fiquei pasmado: unha estraña fortificación de 10 hectáreas lonxe de todo. Só tres ou catro xacementos arqueolóxicos en Galicia teñen esa dimensión. Ao visitalo descubrín un mundo. manuelgago.org/blog/2009/02/0…

Non era un 'castro' tal e como o entendemos, senón un enorme espazo aparentemente baleiro cunha muralla descomunal. Comezamos a ver que había outros, que xa espertaran inquedanzas similares. E atopamos máis inéditos. Non había case ningunha publicación científica.

Logo souben que existen en diferentes lugares de Europa, e case ninguén sabían nada deles. Eu comecei a difundilos. Ao pouco sumáronse os especialistas. Aqueles raros castros, esquencidos na historia, podían contarnos moito sobre nós mesmos. Pertencían á mal chamada Idade escura

É dicir, ese fascinante mundo da Antigüidade tardía, na que o Estado romano desfalece e Europa occidental vive a chegada de pobos xermánicos, no que nacen novas identidades desde o mundo clásico, os bárbaros, as culturas anteriores...

De todo ese caldo, dos conflitos, dos novos poderes, da reinvención dunha sociedade, dos encontros e desencontros étnicos, nace o reino de Gallaecia, o xermolo do que hoxe Galicia é. Dunha paisaxe fortificada única e case inexplorada. Unha aventura do coñecemento.

Por todo o territorio, os antigos castros reocúpanse para responder á inestabilidade, para albergar os novos poderes. Pero, sobre todo na franxa atlántica, aparecen estas novas superfortalezas lonxe dos cultivos, baleiras, a gran altura. Castelos no aire!

Aínda sabemos moi pouco delas, pero as que xa foron escavadas confirman que pertencen a ese periodo dos reinos xermánicos. É dicir, ao nacemento de Galicia como nación. Son a testemuña dese proceso político e social. E pode que fosen refuxios ante un mundo hostil.

Agora mesmo, isto é investigación 'cutting edge'. Investigadores do grupo Síncrisis están avanzando, e xa interviron en Castro Valente. Esta primeira campaña revelou a envergadura das murallas e un factor: foron feitas para ser vistas.

Cóntoo aquí: manuelgago.org/blog/2021/01/0…

E as intervencións revelaron que estes case 2 km de muralla non só tiñan un obxectivo defensivo, senón simbólico e disuasorio. Estaba feita para impactar desde o Ulla, a Depresión Meridiana, a densa vía de comunicación da Antigüidade. A montaña comunicaba.

Mirade, isto é ao que me refiro. No cadrado vermello vedes a fortaleza. Os globos son os eólicos enormes que se van instalar. O sentido simbólico desta antiga fortificación vinculada a ese momento crítico do nacemento da Galicia que hoxe entedemos vai ficar destrozado.

E non só iso. O que vedes no cadrado é unha posible primeira liña defensiva da fortificación. Unha técnica que nos estamos atopando noutros xacementos. Debe ser verificada por arqueólogos. Pero vedes que un eólico impacta directamente sobre ela.

Desde que no século XIX boa parte do galeguismo subira a Castro Valente o castro sufriu moitas agresións. Hoxe estamos nunha nova fase: a ciencia permítenos comezar a comprendelo. Non deixemos que os eólicos destraguen un lugar chave para comprender o que hoxe é este país.

No web da Asociación Baixo Ulla tedes toda a documentación e como presentar alegacións para frear este despropósito. eolicosbaixoulla.com/castro-valente/