Thread by @Lavvelenata

Ve conto na storia.
N’altra storia viva e veneta.
N’altra brutta storia de azienda. N’altra storia de tochi de Veneto.
N’altra storia de sti tempi.

De n’altra tra e tante aziende venete maestre nea sottile arte de mettar insieme tradision e inovasion, parte radicata e integrata coe piere del teritorio ma che varda verso l’estero.

N’altro toco che costitise a colonna vertebrae del sistema produttivo de tutto el pease.
Anca se tanti seo desmentega massa facilmente.

N’altra azienda nata dal gegno de un artigiano-imprenditore tramandada da do,tre, quattro generasion e tenua pai cavej dai vincoi familiari basai sol lavoro e soi skei. No soea resiliensa. Tegnivea voatri a resiliensa.

Qua ghemo a cultura de far impresa “MADE IN VENETO”.
Altro che resiliensa.

E parte del tutto xe che ghemo sempre pi imprenditori vecioti de età e de spirito, stufi de combattar e che però siccome l’azienda xe mia de mi bisogna assarghea a qualcun che fa parte dea cerchia famigliare.

Questo xe el problema de l’imprenditoria veneta de oggi.

Ne go vista una da poco.
Picoea azienda metal meccanica, mal contai 30 dipendenti nea zona dea Gloriosa.
Me ciama MARIO el titoeare disendome che gavea qualche problema nea gestion dei so fioi che dovaria subentrare come proprietari.

Do fioi maschi de 30-35 anni che dopo el diploma xe sta butai in produsion.
PA FORSA, COEA FORSA, DE FORSA.

Entro in azienda. Bel clima. Ordine e pulisia. Xente simpatica.
De soito no xe scontà na accoglienza del genere verso un consulente esterno. Se po’ xe rimpocojoni de natura come mi, ancor manco.

Anca perché rivavo da precedente azienda dove a sorea del paron gavea sentensià : Questa (mi) cossa voea che co noaltri no a centra gnente.

Fasso do ciacoe co tutti. Tutti innamorai del paron Mario. Grande stima, affetto vero che se instaura tra dipendente e paron.
Tutti tranne so fioi.

Mario xe el classico imprenditore veneto che se xe fatto coe so man crando nei anni ’70 a so aziendina quando tutto ndava bene. La gà fatta cressar mantegnendoea sempre piccoea.

Mario se xe sposà presto e ghe gà assà a so mojer a gestion dea fameja e l’educasion dei fioi.
Mojer casalinga.
Una da na piega coi bigodini aea settimana dea parlucchierà. Casa, ciesa, parocchia.

Mario a fedeltà no la gà mai conossua. Disemo che a so vita affettiva xe sempre stà .. “movimentada” e se gà sempre coltivà el so interesse pae altre spose.

So mojer xe sempre stà consapevoe dea vita disinvolta de Mario e seppur no ghe piaseva pi de tanto no gà mai tirà su e so strasse e mai smesso de credar ae promesse de Mario che “xe stà ultimo sbajo, te prometto che questa xe l’ultima”.

Gnanca Mario dir el vero gà mai pensà de tirar su e so strasse e n’darsene pai cassi sui sensa e scene isteriche de geosia de so mojer.
A fameja no se tocca.

I fioi xe stà cressui da na donna sofferente e in continua rabbia contro so pare.
Par iori so pare xe na persona ignobie, indegna e meschina.

Mi che no capisso un casso come se sa, spartisso a colpa tra tutti e do che no gà avuo corajo de ndar fora dae bae e rifarse na vita, ma gà trassinà vanti l’imagine dea fameja del mulino bianco quando anca respirar a stessa aria xe diffisie.

I dipendenti me gà tutti parlà de Mario come de uno appassionà del so lavoro, brao proprio a far, co tante idee gegnai ma soprattutto de na persona affidabie, disposto a dar na man, che se cava el pan de bocca se serve.

Dae paroe de so fioi tutto l’opposto: rabbia e disprezzo. Anca tanta cattiveria.

Gò provà a domandarghe el perché ma no i me xe mia sta boni incontentar co e so risposte.
De fatto però desso i do gà inissià na specie de autosabotaggio in azienda.

Desso che so par voria assarghea iori xe drio farghea pagar in tanti modi rinfacciandoghe che no xe sta bon farse fameja pa far azienda.
A COLPA DE METTAR PRIMA AZIENDA DE FAMEJA.

Mario xe drio servar de assarli da soi, de assarli sbajar ma questi xe drio mandar a ramengo tutto.
E ghe pianse el cuor.
E ANCA EL MIO COL SUO.

Mario: Come vedea a situasion? Cossa fasso ?
Mi: Bea chiara e nitida. Sensa cajgo.
Mario: Almanco qualcuno che vede ben, cossa goi da far?

Mi: Na roba sol. No staga farli entrare in società. Massa rabiosi. Cani rabiosi che gà a so Vendetta verso de ti da consumare che de l’azienda no ghe ne ciava un casso.
Mario: ma i xe me fioi …

Mi: ma a xe a to azienda, i xe i to dipendenti, i xe i to clienti, xe a to storia, xe tutte e besteme che te gà tirà xo, tutti i F24 che te gà pagà, tutte e noti in bianco, tutti i to sacrifici.
Mario: e lo so …
Mi: Vendea.
Mario: Forse xe unica roba da far.

E Mario gà rason. Se imprese venete vol sopravvivere al passaggio generasional par mi, resta sol a strada de venderle.

E ti cossa ghe ne pensito ?