Thread by @sejoalzir

A/NIHILISTA

Kung may mga anak si Satanas sa Pilipinas, sina Toppy at Lars ang akma sa mga deskripsiyon. Pinagpistahan ng mga putakti ang mga mukha. Mga pugad ng uod ang mga bunganga. Kung walang mga bisig at mga binti, mga maiikling ebak silang matitigas na niluwal ng naempatso.

Noong nagbinata pa si Toppy, sinabi raw sa kaklase ang muhi niya sa mundo, "Ang pinakamasaklap sa buhay ko ay ang aking mukhang talo pa ng puwet ko.

Ipinagtapat din daw ni Lars sa kaibigan ang tampo sa Diyos, "Pati nanay ko nga ay hindi kayang mahalin ang mukha ng inire niya."

Binulalas din ni Toppy ang galit sa mga kaklase noong nasa elementarya pa. "Mga ulalo, kahit minsan hindi niyo ako ginawang prince charming. Palaging sergeant at arms na lang ba? Ano ang akala niyo sa akin, security guard?" Pumutok ang butse dahil may gusto sa naging muse lagi.

Sa haiskul naman, nagwala si Lars. Hindi siya pinayagan ng guro at mga kaklase na lumahok sa Mr. Intramurals. "Kailangan ko ng extracurricular activity. Bakit ang karibal ko sa fifth honorable mention na busangot din naman ay pinasali niyo sa Ms. Intramurals? Hindi kayo patas."

Dinagdagan pa ng mga sabi-sabi. Imbes na puwet ni Toppy ang sasampal-sampalin ng kumadrona, magkabilaang mga pisngi. Dapat daw sumpain ang mukha ng malas.

Nagkagulo naman ang buong barangay noong ipinanganak si Lars. Hinimatay raw ang mga nakasulyap sa kanya. Pati ang ina niya.

May mga kuwento rin ang mga kapitbahay nila. Hindi raw kayang limutin ang mga pagmumukha at ang kanilang mga kademonyohan.

"Noong naumay na si Toppy sa pagsilab ng parada ng mga langgam at pagsira ng koloniya ng mga anay, nansakal naman ng mga tuta at nagbitin pa ng mga kuting."

"Si Lars noong bata pa? Tahimik pero huwag ka. Pilyo ang katahimikan niya. May plano. Merong masamang balak. Nanungkit ng mga panty at pinagbintangan pa ang duwendeng nakita niya raw. Nambato pa ng yerong bubong. Kapre naman daw ang salarin. Noong nanuno, takot nang magbintang."

"May niligawan si Toppy noon. Artistahing babae. Bote ng Coca-Cola ang katawan. Sutla ang buhok. Porselana ang balat. Anak-mayaman pa. Binigyan ng niligawan si Toppy ng pera. Maghanap daw ng kemikal na pampikinis ng mukha at palagyan din ng mga takong ang Adidas na sapatos niya."

"May babaeng binuntutan ni Lars noon. Kolehiyala. Alam mo na ang mga kolehiyala, maaalindog at magaganda. Pinabarangay si Lars. Naguluhan ang kapitan sa pormang sasagutan kaya nagpakatotoo na lang. Kaso: Pananakot. Sandata: Mukha. Desisyon: Lumayo-layo ka muna habang pangit pa."

Nagkapatong-patong na ang mga pagkakait sa dalawa. Inipon nila ang lahat ng mga sama ng loob. Naging imbakan ang mga utak nila ng muhi. Kaya noong nagtapos sila ng abogasiya, walang nagtaka sa mga nakakilala sa kanila. Mas delikado na raw sila. Legal na ang mga kademonyohan nila.

Ayon sa brod ni Toppy sa fraternity, "Dinagdagan niya ang kasabihan sa Latin. Malupit man ang batas pero 'yan ay batas at ako 'yan."

Nagsalita ang kaklase ni Lars sa law school. "May pagkadelusyonal siya. Nagwika kasi minsan. Ang boses ng mga tao ay boses ng Diyos at boses ko."

Naging bihasa ang dalawa sa paghahanap ng mga butas sa mga batas para may pagmamalupitan. Noong lumitaw ang mga mukha sa medya, nagtaka ang marami kung kambal ba sila, magkaklase o magkaibigan. Parang uhog, suka o nana na natuyo sa araw at hinati sa gitna. Parehong-pareho talaga.

Nang nagkaopisina si Toppy, ang kuwadrong isinabit agad sa dingding sa gawing likod ng mesa at silya ay ang larawan ni Hitler. Sinaluduhan niya pagpasok at paglabas ng opisina. Nakabukas ang palad. Nakataas. Pahilis. Tila nagpasukat ng anggulo sa kilikiling nagkipkip ng anghit.

Kahit wala pang opisina si Lars, nagkakliyente na agad, babaeng kaladkarin na nagtiwala at nakipagharutan sa kanya at malakas ang loob na mapahamak dahil bukod sa magilagid siya, mga suwail din ang mga ngipin. Ipinakasuhan ang dentistang nakaligtaan ang bagang sa ngalangala niya.

Naging libangan ni Toppy ang pagpapahirap sa mga babae. Opisyal man ng gobyerno o kanyang katrabaho. Kung hindi kinasuhan, hiniya sa madla.

Mga bakla naman ang inatake ni Lars. Kahit sino na lang ay bakla sa kanya. Patay man o buhay basta lalake. Animo'y siya lang ang deretso.

Hindi kinulang sa pangaral ang ina ni Toppy. Sa katunayan, kinausap niya minsan ang anak tungkol sa kanyang kakaibang naramdaman. "Bakit ba galit ka sa mga babae?"

"Hindi lang galit. Kinapootan ko sila." Pumula ang mga pisngi ng anak at lumaki ang mga mata. Parang may lalapain.

"Hindi kita ipinaglihi sa ama mong palabugbog. Kakantot lang, sasampalin pa ako. Ang sarap na nilaga, sasabunutan pa ako. Kahit gabundok ang mga labahin, tinadyakan ako. Kapag lasing o natalo sa sugal o iniwan ng babae niya, ako ang sinuntok. Sa kanya ka ba nagmana?"

"Baka nga."

"Alam mo bang panty ang paboritong suutin ng tatay mo noong buhay pa siya? So-en. Dapat may mga printang maliliit na mga bulaklak. Kulay-rosas."

"Anong kinalaman niya sa poot ko?"

"Nagbabakasakali lang naman."

"Dapat ko ba siyang alalahin at balikan na naman ang mga nakaraan?"

"Baka kagaya ka niya. Nagselos sa mga babae dahil gustong maging kagaya nila. Kaya lang dapat magpanggap. Ginawa akong maskara. Ginamit din ang ibang mga babae para hindi siya pagdudahan ng ibang mga katrabahong pulis sa estasyon."

Tikom ang bibig ni Toppy. Kinagat din ang dila.

"Sabihin mo lang sa akin, anak. Tutulungan kitang palayain kung nakakulong ang 'yong pagkatao. Hindi kita huhusgahan. Kung manghuhusga man, siguro kapag hindi ko gusto ang kulay ng palda mo o ang estilo ng blusa o lagpas sa mga labi ang lipstick mo o mukhang pasa ang eyeshadow."

Kinumpronta rin minsan ng tibong kapatid si Lars, "Bakit ba ganyan na lang ang muhi mo sa mga bakla kuya?"

"Hindi ka ba nandidiri sa kanila?" Tawang walang tunog ang nabuo sa mukha ng lalakeng kapatid.

"Nandidiri ka rin pala sa akin?"

"Iba ka. Babae ang gusto mo. Pareho tayo."

"Huwag na nga tayong magbolahan."

"Bakit, tsumutsupa ka?"

"Kabilang ako sa LGBT."

"Nagpapatira ka ba sa puwet?"

"Same-sex din ang attraction ko."

"Nagbabayad ka ba ng mga lalake?"

"Stereotype 'yan."

"May stereotype ba na hindi totoo?"

"Meron, kuya."

"Magbanggit ka nga."

"Hindi lahat ng mga bakla ay lantad o nakalabas sa kloseta kaya huwag kamuhian ang mga baklang nakikita kung hindi ka siguradong pati pala ang best friend mo ay bakla rin."

"Si Efren ba 'yan? Naligaw lang sa gay club, bakla na agad?"

"Walang malayang naglalakbay na naliligaw."

"Ipinaliwanag na niya."

"Hindi dapat ipinaliliwanag ang kabaklaan."

"Dapat sa Sunrise Strip Club siya pupunta dahil doon ako naghintay pero Sunrays na puno ng mga bakla ang nasa GPS."

"May mga mapa kami. Nasa utak. Kaya hindi mawawala. Nararating ang paroroonan dahil gusto."

"Hindi bakla si Efren."

"Sigurado ka?"

"Kasama ko siyang mamokpok. Hetero siya."

"Hindi siya."

"Hindi ba si Efren ang tinukoy mo?"

"Hindi."

"Siya ang pinag-usapan natin, hindi ba?"

"Ikaw, kuya." Yumuko ang tibong kapatid.

Nabuo ang mga kunot sa noo ni Lars. "Bakit ako?"

"Naalala mo ang kartong puno ng mga libro mo sa law school? Iniwan mo sa bahay. Nilinis sana ni Nanay dahil inamag at maalikabok. Bumulagta ang mga magasin sa ilalim. Puro mga lalakeng hubad. Bawat pahina ay may nakabalandrang titi. Huwag mong sabihin hindi sa 'yo ang mga 'yon."

"Anong sabi ni Nanay?" Hiya ang bumalot mula ulo hanggang paa ni Lars. Nanginig at namawis.

"Wala. Dinepensahan kita. Pinaalis ko siya. Pinagalitan. Nagkunwaring ayaw ko siyang magkahika. Pag-alis niya, dinampot ko ang mga magasin. Nilipat sa ilalim ng matres sa aking higaan."

"Nandoon pa hanggang ngayon? Dadaanan ko mamaya."

"Ako na ang magdadala sa condo mo. Baka mabisto ka na naman." Tumahimik nang saglit. Tila pinaraan muna ang multo. "Alam ko kung bakit galit ka sa mga bakla. Kahit sila ay umayaw kaya nagtiis ka sa mga magasin. 'Yan ang muhi mo."

Imbes na magbago dahil lantad na, tumindi ang mga kademonyohan. Lumalala ang poot ni Toppy sa mga babae at sa lipunan. Nasa social media na siya.

Lumubha rin ang muhi sa mga bakla at sa mundo ni Lars. laman na siya ng mga balita. Kung hindi nagmura, nagpausli ng gitnang daliri.

Kaya noong may palaputang-ina at palapisot na kandidatong tumakbo sa pagkapangulo, ang panganay ni Satanas sa Pilipinas, parang nag-reunion ang tatlo. May kakampi na sila. Abogado rin. Masangsang ang bunganga. Puro patayan na lang ang nginawa. Todo ang suporta ng dalawa sa kanya.

Noong nanalo, nagbunyi ang dalawa. Pinuta ni Toppy ang mga babaeng ayaw sa idolo niya. Binakla ni Lars pati ang bawat lalakeng kritiko. Lubos silang nasiyahan noong nagsimula na ang paslangan. Dinepensahan pa ang mga nangurakot. Prinotektahan din ang mga bobong tamad sa gobyerno.

Patapos na ang termino ng pangulong demonyo, maiitim pa rin ang mga budhi ng dalawa. Walang pakialam kung lugmok ang ekonomiya, magulo ang bayan o gutom ang mga mamamayan.

"Fuck love of country!" komento ni Toppy sa Twitter.

"To hell with patriotism!" sabi ni Lars sa reporter.

Kahit kalat na ang pandemiyang gawa ng China na nangtuta sa idolo nilang gahaman, wala pa ring takot na baka mahawaan kaya dapat magbago baka totoo ang langit at impyerno. Tila mga bayaran din ng mga singkit ang dalawang walang pakialam kung agawan ang mga Pilipino ng teritoryo.

Noong nag-ingay ang mga tao na palayasin ang mga Tsinong labas-pasok sa bansa dahil nagdala ng iba't ibang mga salot--krimen, droga at sakit, wala pa ring pagkamulat o pagsisisi. Bagkos, naligayahan pa ang dalawa.

"Buti nga 'yan dahil tipid sa bala," sulat ni Toppy sa Facebook.

Sa inereng panayam, sinabi ni Lars, "Magpasalamat sa China at sa pangulo dahil bawas na ang bilang ng mga Pilipino."

Noong napanood ko, napabulong sa sarili, "Pangit din naman ako, bakla, iniwan ng ina at binugbog ng ama. Bakit hindi ako galit sa lipunan at nasusuklam sa mundo?"

Tapos.