Thread by @Godfath52464383

निर्मोही
जुगारी 🌹🙏.
नाना माझ्या पेक्षा वयाने 10 एक वर्ष मोठा .सायकल च्या दुकानावर संपूर्ण सायकल असेंम्बल करणारा कारागीर .त्या काळी नवीनच कॅफे उघडले जात होते 30 रुपये तास .मी ऑफिसच्या कांमा करता नियमित एका कॉम्प्लेक्स मध्ये जायचो त्या कॅफे समोर नाना बसायचा,मळकट पायजमा

पांढरा शर्ट ,तोंडात बारा महिने बिडी .नाना सकाळीच दुकान उघडण्याचा वेळी हजर आणि चार वाजले की गायब .मला नंतर कळाले की नाना रोज दुपारनंतर पत्ते कुटायला क्लब वर जातो.कमावतो किती मग उडवतो किती हजार प्रश्न .एक दिवस एक बाई त्याला भेटायला दुकानावर आली .नाना चे आणि तिचे भांडण झाले.

मागून कळाले नाना ची बायको कधीच गेली पण या बाईबरोबर नाना रिलेशन मध्ये होता.मी रिकाम्या वेळी नाना बरोबर बोलत बसायचो पण त्याचे रेकॉर्ड ऐकून थोडा लांब राहायला लागलो आणि ते त्याच्या ही लक्षात आले होते. एक दिवस तोच बोलला सर तुम्ही बोलणे कमी केलंय आमच्या बरोबर ? .मी म्हटले नाही हो नाना

कम्पनी चे टेन्शन आहे थोडे बाकी काही नाही.एक आठवडा किंवा जास्त नाना गायब मी इंटरनेट कॅफे च्या मालकाला विचारलं का रे जुगारी दिसत नाही बरेच दिवस झालेत. अहो काका त्याचा बाप आलाय ना म्हणून गप्प बसलाय म्हातारा 🤔कोण रे ? त्याचा मुलगा आलाय न्युझिलँड वरून 🙄.C A आहे त्याचा मुलगा काका .

जुगाऱ्याचा मुलगा Bcom करतांना च C A झाला ,मग मुंबई ला दोन तीन वर्षे एक ऑफिस ला कामे केलीत मग परदेशात गेला.किती मुले रे ?हा एकच दिवटा आहे त्याला. मुलगा नेत नाही का रे त्याला परदेशात ? अहो काका तुम्ही मुलगा बघाल ना तर नाना ला शिव्या द्याल.जुगारी चे रंगढंग बरोबर नाही ना हो काका .

एक दिवस परत नाना कामावर हजर नमस्कार चमत्कार झालेत .मी दोन तीन दिवसांनी नाना ला आवाज दिला या हो नाना चहा घ्या. हात धुवून नाना आला.नाना एक विचारू का ? तुम्ही का नाही जात परदेशात की मुलगा नेत नाही ? अहो सर तो भांडण करतो विनवणी करतो चला म्हणतो बरोबर .पैसे पण खूप पाठवतो. एव्हढे तर

पाहिले बी नाही मी कधी .सर मी त्याला फक्त वह्या पुस्तका करता पैसे दिले .अभ्यास कधी घेतला नाही कधी विचारला नाही .तो त्याचा पास व्हयचा आणि शिकून मोठा झाला.नाना तुमचे हे बाकी कार्यक्रम माहीत का त्याला ? हो सर माहिती आहे त्याच्या मायवर गेला आहे काहीच तक्रार नसते त्याची.एकदा जाऊन या,

नको लाख भर पैसे वाया जातील भाड्यातोड्या त आणि जाऊन करू काय ? कोणी विचारले काय करता वडील तर पोराला संकटात टाकायचे का बाप सायकल दुकानावर आहे म्हणून ? अरे मग सोड काम आराम कर.नाही सर पोराच्या पैसे ला हात नाही लावत आपण.तुम्ही कधी बोलले नाही नाना मुलगा परदेशी आहे .नाही सर आपले छंद

शोकपाणी वेगळे ,कशाला गावभर सांगत फिरायचं माझा मुलगा परदेशात आहे म्हणून ? पोरग बदनाम नको व्हयला बापा मुळे .🤔मला आठवले पांढरपेशे'मुलाचा पासपोर्ट करायला जातील तर गावभर बातमी पसरवणारे नाहीतर कोणालाच सांगू नका आपला मुलगा परदेशी जातो आहे लोकांची नजर लागते म्हणून न सांगणारे सुशिक्षित.

बाळंतपण करायला परदेशात जाणाऱ्या मुलांच्या आई आणि वडिलांचा तोरा आणि कोतुक करणारे खोटारडे शेजारी पाजारी मध्यमवर्गीय .नाना ने बिडी काढली नवीन लायटर काढले ते काही चालू होईना 😂 शेवटी आगपेटी ने पेटवली आणि चहा वाल्याच्या अंगावर आगपेटी फेकली. पोरगा इतका शिकला पण याला लायटर लावयची

अक्कल नाही आली म्हणत सगळे नाना ची मजा करायला लागले .मी निघालो टू व्हीलर चालू केली सहज नाना कडे पाहिले .आपल्या सारख्या व्यसनी बापाची मुला च्या आयुष्यावर सावली पडू नये म्हणून कोणाला तो परदेशात आहे हे न सांगणारा ,सायकल रिपेअर करणारा बाप सांगताना पोराच्या मनाची घालमेल नको म्हणून

त्याचबरोबर कुठे ही ना जाणारा ,आपल्या सारख्याच हातावर पोट भरणाऱ्या दोस्ता न सोबत बिडी पिऊन मनमुराद हसणारा मनस्वी माणूस
एक
बाप
निर्मोही
जुगारी 🌹🙏.