Thread by @MarathiDeadpool

"हे हात माझे नाहीत.ते भारत भूच्या मातीचे आहेत.सीमेवर लढताना मी शहीद झालो तर तुला अभागी बनून रहावं लागेल.त्यापेक्षा माझा हातच तू हातात नको घेऊ."
यावर ती उत्तरली 'तस झालं तर तुमच्यामागे मी आपला संसार सांभाळीन आणि तुमचे कपडे घालून सीमेवर जाईन.'
वीर शहीद केशव गोसावी यांची ही गोष्ट.

'भारतीय सैन्य दलात सैनिक म्हणून जागा मिळत आहे..संधीचे सोनं करा.' हे पत्र आलं. त्यादिवशी धाय मोकलून रडला केशव..
वडिलांनी विचारलं काय झालं बाळा? डबडबल्या डोळ्यांनी नोकरी मिळाली बाबा..पण सीमेवर आणि माझं काही बरं वाईट झालं तिकडं तर?
एवढं बोलला तो.. बाबांनी समजावून सांगितलं.

केशव ला सल होती आपल्या हाताने अपंग असलेल्या बाबांची.. केशव पाचवीला असतानाच त्याची आई देवाघरी गेली. वडील हाताने अपंग.. समाजरीत म्हणून ते दुसरं लग्न सहज करू शकले असते..पण नाही.. त्यांनी स्वतः आपल्या अपंग हाताने भाकरी बनवून केशव ला लहानाचा मोठा केला.

केशवला वाटलं आपलं सीमेवर जर बरेवाईट झालं तर बाबांना आयुष्यभर परत त्याच हाताने भाकरी कराव्या लागतील.. तो म्हणाला त्यापेक्षा मी दुसरी नोकरी करतो.. बाबांनी छत्रपतींची उदाहरणं दिली..ते जर घाबरले असते तर आपण राहिलो नसतो. तू जा सीमेवर..जा..!
हे वडिलांचे बोल केशवला बळ देते झाले.

2011 साली केशव सीमेवर रुजू झाला.तो 2015 पर्यंत सीमेवरती लढत राहिला..त्यानंतर त्याची नियुक्ती जम्मू काश्मीरमधील मराठा बटालियन मध्ये मेजर म्हणून झाली.पंचविशीत आलेला गडी तोपर्यंत.दोनाचे चार हात करायची हीच योग्य वेळ आहे.यशोदा चे हात हातात घेताना वरच्या पहिल्या ट्विट मधील बोलणं झालं.

डिसेंबर 2015 ला लग्न झालं.. केशव ,यशोदा आणि त्याचे वडील अतीव आनंदी होते. पुढच्या 2-3 महिन्यात सुट्टी संपवून केशव देशसेवा करायला रुजू झाला. 2018 पर्यंत उन्हाळे पावसाळे येत जात तस केशव सुट्टीला यायचा परत सेवेस तत्पर बनून रुजू व्हायचा.

2018 ची भाऊबीज होती.. यशोदा गर्भवती होती.. 9 महिन्यांची.. सगळीकडे प्रफुल्लित वातावरण.. त्यादिवशी तिची ओटी भरण कार्यक्रम होता. यशोदाचे वडील तिला माहेरी न्यायला आले होते.
लेकरू जन्माला येणार आहे.. केशव तिकडे सीमेवर याच आनंदात होता..

येणारी रात्र काळरात्र असणार आहे.. याची पुसटशी ही कल्पना केशव आणि यशोदेला न्हवती. त्या रात्री पाकिस्तानी गोळीने केशवच्या छातीचा ठाव घेतला. केशव धारातीर्थी पडला..हॉस्पिटलमध्ये काहीही चाललं नाही. वीर केशव गेला.. आपल्यासाठी गेला.. शहीद झाला.

केशव अमर रहे..! घोषणेने शिंदेवाडी, तालुका सिन्नर, जिल्हा नाशिक परिसर दुमदुमून गेला.
वडील आणि बायको ह्रदय पिळवटून टाकणारा टाहो फोडत राहिले..धाय मोकलून रडू लागले.

यशोदा बेशुद्ध झाली.. 9 महिन्यांची गर्भवती यशोदा.. हॉस्पिटलमध्ये सहाव्या दिवशी कन्यारत्न तिच्या कुशीत आले.

त्या दिवसानंतर 2019 च्या भाऊबीजेपर्यंत यशोदा माहेरीच गेली न्हवती.. नेटाने कुटुंब सांभाळलं तिने.. लहान मूल.. अपंग सासरा..
यशोदेचं वय काही 24-25 वर्षे असेल. विराची पत्नी असते ती अशी. एक लाखांचं स्मारक तिने आपल्या नवऱ्याचं बनवलं.. ❤

टीप- सदर घटना आज माझ्या ऐकण्यात आली..सगळ्यांसोबत शेअर करावी वाटली म्हणून हा प्रयत्न.. ऐकीव माहितीवर लिहलं असल्याने काही चूक असल्यास मोठ्या मनाने क्षमा असावी.
@Omkara_Mali @SahilVastad @Nilesh_P_Z @DrVidyaDeshmukh