Thread by @MarathiDeadpool

इतिहासात आत्ममग्न होणारा समाज आणि अण्णाभाऊ साठेंच्या 'स्मशानातील सोनं' मधील भीमा यांच्यात फार काही सकस आणि तुलनात्मक फरक नसतो.
आला दिवस ढकलणं एवढीच काय ती त्यांची इतिकर्तव्यता असते.
भीमा मेलेल्या मढ्यावर गुजराण करायचा..आणि आजचा समाज मेलेली मढी उकरून.

#थ्रेड #म

#थ्रेड #म

आज जगद्श्रेष्ठ छत्रपती आबासाहेब जयंती दिन.

'गर्जा महाराष्ट्र माझा' म्हणताना आज महाराष्ट्रवासीयांच्या पोलादी छात्या अभिमानाने थरारत नाहीत.
'दिल्लीचेही तख्त राखतो महाराष्ट्र..' असं म्हणण्याचीही सोय आता राहिली नाही.
कारण पहिल्यात पहिल्यासारखी छाताडं राहिली नाहीत आणि दुसऱ्यात तख्त.

छत्रपती शिवाजी महाराज यांच कार्यकर्तृत्व काय? तेच आज पर्यंत आपण उगाळत बसलो..त्यावर पुस्तके, नाटकं, चित्रपट..गेलाबाजार डीजे डॉल्बीवर गाणी बडवतच आपण लहानाचे मोठे झालो.. त्यामुळं आबासाहेबांची जीवन पद्धती सांगणे हे काही या थ्रेडचं प्रयोजन नाही.
प्रयोजन आहे. आत्ता आणि पुढं काय? हे.

गेल्या साताठ दशकात एक महाराष्ट्रीयन म्हणून किती लोकांनी आपला 'झेंडा अटकेपार' फडकवला? हा प्रश्न आहे. आपला गौरवशाली इतिहास आणि त्याची परंपरागत कार्यशैली आपण पाळली का? हाही यक्षप्रश्न आज सतावतो आहे.
मी नेहमी सांगतो..आजच्या युगात छत्रपतींचे विचारपाईक होण्यासाठी तलवारीची गरज नाहीय.

पण अलीकडे एक समाज म्हणून आपला सगळा भार आपण तलवार आणि दाढी यावरती टाकला..आणि विचार मात्र वाऱ्यावर सोडले.
छत्रपती शिवाजी महाराजांनी लोककल्याणकारी स्वराज्य निर्माण केलं तीच तत्व पुढं लोकशाही तत्वे म्हणून जगभर मान्य झाली..भले प्रत्येक देशाचा संदर्भ वेगळा असेल पण मूळ एकच..लोककल्याण.

छत्रपतींची भूमी म्हणून भारतमातेस एक सार्थ अभिमान असणारच,त्यातल्या त्यात आपल्या महाराष्ट्राच्या मातीत तो हिरा निपजला म्हणून आपणास तर प्लस अभिमान असणार.त्या अभिमानाच्या स्फुल्लिंगाचे आपण सार्थ वारस बनलो का? हा खरा आजच्या विज्ञानयुगात प्रश्न आपणास पडायला हवा..पण आपण जातीपातीत रंगलो.

आज देशातील आजीमाजी शास्त्रज्ञ किंवा RBI गव्हर्नर यांची यादी पाहिल्यास त्यात किती मेंबर महाराष्ट्रीयन असतात? आज UPSC सारख्या बौद्धिक कसोटीच्या प्रांतात किती छत्रपतींचे वारस बाजी मारतात?
एखादी अल्फाबेट,फेसबुक,ऍपल,अमेझॉन..इथं का बहरू शकली नाही? इथली माती त्या रणांगणात का चितपट झाली?

परवा बातमी आलेली कॅप्टन अमोल यादव यांनी एक विमान बनवलं होतं.. इथल्या समाजास त्याचं आणि त्याच्या बुद्धीचं महत्व कळलंच नाही.. नाईलाजाने कॅप्टननी परदेशाचा रस्ता धरला..
त्यांच्या त्या प्रज्ञेस इथं खतपाणी आपण का घालू शकलो नाही? एक समाज म्हणून आपण आपली मानसिकता काय करून घेतलीय?

आपला समाज हा सतत राजकारण आणि जातीपातीच्या धांदलीत असतो..त्यामुळं आपल्याला चांगलं काय आणि वाईट काय? याचीही काळजी राहिली नाही.
असा एकही महिना जात नसेल की देशात कोणत्यातरी मेजर निवडणुका होत आहेत.. सत्ताधारी आणि विरोधक दोघेही त्यासाठी 'गुडघ्याला बाशिंग' याच मूडमध्ये असतात. हे कुठवर?

भारत हा युवकांचा देश आहे..ही जगभर आपली ओळख आहे. 'डेमोग्राफीक डिव्हिडंड' अशी ती संकल्पना.. पण या तरुण जनतेचा काय लाभ आपल्याला एक देश म्हणून होईल? याचा विचार तरी आपण आणि पर्यायाने आपल्या सरकारने केला आहे का?
आज निवडणुका, पक्ष, रॅली, प्रोटेस्ट या नावाखाली व्यसनांचा नंगानाच सुरुय.

आपला 'डेमोग्राफीक डिव्हिडंड' या राजकारणात जळून खाक होत चाललाय..याची आपल्याला जाणीव आहे का?
गेल्या साताठ वर्षात देशभरात जे काही विखारी वातावरण जाणीवपूर्वक बनवलं गेलं..त्याला खुद्द येथील समाज म्हणजे आपण जबाबदार आहोत. कारण, आपणच आपल्या भावना, अस्मिता आणि अहं ही शस्त्र निर्माण केलीत.

छत्रपतींचे विचार काय होते हे आपल्याला सांगायला आता कोणी उरलंय असं वाटत नाही..कारण आता 'गाईही शिंगं मोडून वासरात शिरल्यात.' असं चित्र आहे.
अशावेळी आपले विचारच आपल्याला एकतर तारतील किंवा ठेचून मारतील. हे त्रिकालाबाधित सत्य आहे.
विचारांची पातळी आपण आतातरी सुधारायला हवी..ती गरज आहे.

गौरवशाली इतिहासाचा अभिमान असणं वेगळं आणि त्या अभिमानाचा अतिरेक असणं वेगळं.. आपला अतिरेक होतोय..त्या अतिरेकी वागण्यात विचारांना तिलांजली देण्याचं पातक आजपर्यंत घडत आलं..
आज छत्रपती शिवाजी महाराजांना साक्षी मानून तर्कशुद्ध विचारांचा संकल्प करू..हीच खरी गोष्ट आहे.. बाकी सब झूठ..!❤️

माझ्या तमाम भारतीय बांधवांना छत्रपती शिवाजी महाराज जयंतीच्या खूप खूप शुभेच्छा..❤️

#Threadकर
@Omkara_Mali @SahilVastad @DrVidyaDeshmukh @Nilesh_P_Z