#ஸ்ரீகிருஷ்ணன்கதைகள் தியாகராஜர் தன் வீட்டு திண்ணையில் அமர்ந்து ராம ஜபம் செய்து கொண்டிருந்தார். அப்போது ஒரு வயதான தம்பதிகள் மற்றும் அவர்களின் ஒரு உதவியாளர் உட்பட மூவர் அங்கு வந்து, நாங்கள் வடக்கே ரொம்ப தூரத்திலிருந்து நடைப்பயணமாய் கோவில்களை தரிசனம் செய்து கொண்டு வருகிறோம். அடுத்து 
நாங்கள் ராமேஸ்வரம் செல்ல வேண்டும். இன்று இருட்டி விட்டது. ஆகவே இன்றிரவு மட்டும் உங்கள் வீட்டு திண்ணையில் தங்கிவிட்டு காலை பொழுது விடிந்ததும் சென்று விடுகிறோம். தயவு செய்து அனுமதி கொடுங்கள் என்று கேட்டுக் கொண்டனர். தியாகராஜர் தன் இரு கரங்களையும் கூப்பி அவர்களை வணங்கி வரவேற்றார்.
இன்று இரவு நீங்கள் இங்கேயே தங்கிக் கொள்ளலாம். இரவு உணவிற்கு ஏற்பாடு செய்கிறேன் இங்கேயே நீங்கள் திருப்தியாக சாப்பிடலாம் என்று சொல்லி அவர்களை அமர வைத்தார். தனது மனைவியை அழைத்து இவர்கள் குடிப்பதற்கு தண்ணீர் கொண்டு வந்து கொடுத்து விட்டு இவர்கள் சாப்பிடுவதற்கு இரவு உணவை ஏற்பாடு செய்து
விடு என்றார். வீட்டில் இரண்டு பேர்களுக்கு போதுமான அரிசியே இல்லை. இப்போது ஐந்து பேர்களுக்கு உணவு தயாரிக்க வேண்டும் என்றால், அரிசிக்கு என்ன செய்வது என்று சிந்தித்தாள். பக்கத்து வீட்டுக்கு சென்று சிறிது அரிசி வாங்கி வரலாம் என்று நினைத்தவள், வந்தவர்களுக்கு தெரியாதவாறு அரிசி வாங்கி
வர பாத்திரத்தை எடுத்து யார் கண்ணிலும் படாமல் புடவையால் மறைத்தவாறு அங்கிருந்து வெளியே வந்தாள். இதனை கவனித்த முதியவர் அவளை தடுத்து நிறுத்தினார். அம்மா! எங்களுக்காக நீங்கள் சிரமப்பட வேண்டாம். எங்களிடம் வேண்டிய அளவு தேனும் தினைமாவும் உள்ளது. இரண்டையும் பிசைந்து, ரொட்டி தட்டி நாம்
அனைவரும் சேர்ந்தே சாப்பிடலாம் என்றார். அவளின் மனதை படம் பிடித்து காட்டியது போன்று பேசியவரை மிகுந்த வியப்புடனும், கூச்சத்துடனும், தர்மசங்கடத்துடனும் பார்த்தாள். தேனும் தினைமாவும் அடங்கிய ஒரு சிறிய பையை அவளிடம் கொடுத்தார் முதியவர். தயக்கத்துடன் அதனை பெற்று கொண்டவள், ரொட்டியை செய்து
முடித்தாள். அனைவரும் சாப்பிட்டு முடித்தார்கள். தியாகராஜர் அவர்களுடன் விடிய விடிய பேசிக் கொண்டு இருந்து விட்டு, ஒரு கட்டத்தில் உறங்கி போனார். பொழுது விடிந்தது. காலைக் கடன்களை முடித்து விட்டு கூடத்தில் அமர்ந்து வழக்கம் போல ராம நாமத்தை உரக்க ஜபித்துக் கொண்டிருந்தார் தியாகராஜர்.
அப்போது அவருக்கு எதிரே வந்த விருந்தினர்கள் மூவரும், ஐயா! நாங்கள் விடை பெறுகிறோம். இங்கே தங்க இடம் கொடுத்த உங்களுக்கு மிக்க நன்றி உங்களை சந்தித்ததில் மிக்க மகிழ்ச்சி என்று கூறி மூவரும் கிளம்பினார்கள். தியாகராஜர் அவர்களை வழியனுப்ப அவர்களுடன் வாசலுக்கு வந்தார். அவர்கள் மூவரும்
வாசலைக் கடந்து தெருவில் இறங்கி நடக்க ஆரம்பித்தார்கள். அவர்கள் செல்வதை கண் இமைக்காமல் பார்த்தவாறு நின்றிருந்த தியாகராஜரின் கண்களில் சட்டென்று ஒரு தெய்வீக காட்சி தெரிந்தது. இப்போது அந்த வயோதிகர் ஸ்ரீ ராமனாகவும் அந்த மூதாட்டி சீதையாகவும் உதவியாளராக வந்தவர் அனுமனாகவும் தோற்றமளிக்க
அவருக்குள் இனம் புரியாத ஒரு பதை பதைப்பு ஏற்பட்டது. கண்களில் நீர் சுரக்க, தன்னை மறந்து பக்தி பரவசத்தில் ஆனந்த கூத்தாடினார் தியாகராஜர். ஶ்ரீ ராமா! என் தெய்வமே! தசரதகுமாரா! ஜானகி மணாளா! நீயா என் இல்லத்துக்கு வந்தாய்? என்னே! நாங்கள் செய்த பாக்கியம். அடடா! வெகு தூரத்திலிருந்து நடந்து
வந்ததாய் என்று சொன்னாயே, உன் காலை பிடித்து அமுக்கி உன் கால் வலியை போக்குவதை விட்டு, உன்னை தூங்க விடாமல் விடிய விடிய பேசிக்கொண்டே இருந்தேனே. மகாபாவி நான். என் வீட்டில் உண்ண உணவு கூட இல்லை என்று அறிந்து கொண்டு ஆகாரத்தை கொண்டு வந்து, ஒரு தாய் தந்தையாய் இருந்து எங்கள் பசியையும்
போக்கினாயே! உனக்கு அநேக கோடி நமஸ்காரம்! என்று நடு வீதி என்பதையும் மறந்து கண்ணீர் மல்க கதறி அழுதார் தியாகராஜர். அப்போது அவர் 'சீதம்ம மாயம்ம' என்ற மிக அருமையான கீர்த்தனையை அவரையும் அறியாமல் பாட ஆரம்பித்தார். எல்லாம் ராம மயம்! இந்த ஜகமெல்லாம் ராமமயம் ராம ராம
சர்வம் ஸ்ரீ கிருஷ்ணார்ப்பணம்🙏🏾
எம்.எஸ்.குரலில் சீதம்ம மாயம்மா
எம்.எஸ்.குரலில் சீதம்ம மாயம்மா
• • •
Missing some Tweet in this thread? You can try to
force a refresh
