Ang mga wika ay nagbabago at napapaunlad. Binabago at pinapaunlad ito ng mga gumagamit ng wika para makasabay sa panahon at pangangailangan. Maski Ingles — anumang tipo ng Ingles — ay binago at pinaunlad. Humihiram ito ng mga salita. Hindi ito puro.
Yung pananaw na ang mga wikang Filipino ay inferior sa Ingles at iba pang dayuhang wika ay di naman talaga tungkol sa kahinaan ng mga wika natin. Mas tungkol ito sa kolonyal na mentalidad ng mga nagsasabi nun. Mulat nilang binabasura ang mga wikang Filipino.
Maraming bansa sa mundo ang nagtanghal at nagpaunlad ng sarili nilang wika. Yun ang naging wika nila sa pag-unlad. Sa Pilipinas, halos dantaon na ang chismis tungkol sa Ingles bilang wika ng pag-unlad. Pero mas panghati at pagbukod ito ng mga tao, at ginagawang sukatang sosyal.
