Thread by @anbezhil12

#எம்பார் #அறிவோம்_ஆச்சார்யர்கள்
மதுரமங்கலத்தில் கமலநயன பட்டர் ஸ்ரீதேவி அம்மாள் தம்பதியினருக்கு கிபி 1026ஆம் ஆண்டு தை மாதம் புனர்பூசம் நட்சத்திரத்தில் திருக்குமாரராய் திருவவதாரம் செய்தவர். ஸ்ரீதேவி அம்மாள் எம்பெருமானார் இராமானுசருக்கு சிற்றன்னையாவார். தாய் மாமனான பெரிய திருமலை

நம்பி இவருக்கு இட்ட பெயர் கோவிந்தப் பெருமாள். திருப்புட்குழியில் தன் அண்ணன் இராமானுசருடன் யாதவ பிரகாசரிடம் கல்வி கற்றார். யாதவ பிரகாசரிடம் கல்வி பயின்றபோது குருவின் கருத்துக்களோடு இராமானுசருக்கு பலமுறை கருத்து வேறுபாடு ஏற்பட்டதன் விளைவாக அவரை குருவுக்குப் பிடிக்காமல் போயிற்று.

அதன் தொடர்ச்சியாக யாதவப்ரகாசரின் காசி யாத்திரையில் இராமானுசரின் உயிருக்கு ஏற்பட்ட ஆபத்திலிருந்து அவரைக் காப்பதில் முக்கிய பங்கு வகித்தார் கோவிந்தபட்டர். எம்பெருமானாரைக் காப்பாற்றிய பின்பு இவர் தம் குருவான யாதவப்ரகாசருடன் காசி யாத்திரையைத் தொடர்ந்தார். கங்கை கரையில் நீராடுகையில்

கோவிந்தப்பெருமாளின் கையில் சிவலிங்கம் எதிர்படவே அதனை காளஹஸ்தி தலத்துக்கு எடுத்துச் சென்று அங்கேயே தங்கிவிட்டார். இச்சம்பவத்தால் "உளங்கைக் கொணர்ந்த நாயனார்" என சைவர்களால் அழைக்கப்பட்டார். இவரைத் திருத்திப் பணிகொள்ளத் திருவுள்ளம் கொண்ட எம்பெருமானார், அப்பணியை சரியாக செய்து முடிக்க

பெரிய திருமலை நம்பிகளை வேண்டினார். பெரிய திருமலை நம்பிகளும் உடனே காளஹஸ்திக்குச் சென்று, கோவிந்தப்பெருமாள் நந்தவனத்திற்குப் பூக்களைப் பறிக்க வரும் நேரத்தில் “தேவன் எம்பெருமானுக்கல்லால் பூவும் பூசனையும் தகுமே” (அதாவது ஸ்ரீமன் நாராயணனே பூக்களைக்கொண்டு ஆராதிக்கத்தக்கவன் தவிர வேறாரும்

அல்லன்) என்னும் திருவாய்மொழிப் பாசுரத்தைக் கூறினார். இதை கேட்ட நொடியே அவர் தமது தவறை உணர்ந்து பரமசிவனாரிடத்தே தாம் வைத்த பற்றையும் துறந்து, பெரிய திருமலை நம்பிகளை சரண் புகுந்தார். பெரிய திருமலை நம்பிகள் இவருக்கு பஞ்சசம்ஸ்காரங்களைச் செய்து வைத்து இவருக்கு அர்த்தங்களை

உபதேசித்தார். கோவிந்தபட்டரும் தேவுமற்றறியாதவராய் பெரிய திருமலை நம்பிகள் திருவடிகளே எல்லாமாகக் கொண்டு பெரிய திருமலை நம்பிகளிடத்தே இருந்து வந்தார். ஸ்ரீ இராமானுசர் பெரிய நம்பிகளிடம் ஸ்ரீமத் இராமாயணம் பயில கீழ் திருப்பதியில் தங்கியிருந்தபோது கோவிந்தப்பெருமாள் தனது ஆசார்யனான பெரிய

திருமலை நம்பிகளுக்குப் படுக்கை தயாரித்து அதில் தான் முதலில் படுத்துப் பார்க்கிறார். இதைக் கண்ட எம்பெருமானார் இதைப் பெரிய திருமலை நம்பிகளிடம் தெரிவிக்க அவரும் இது பற்றி கோவிந்தப்பெருமாளிடம் விசாரிக்கிறார். அதற்கு கோவிந்தப்பெருமாள், ஆசார்யன் படுப்பதற்குப் படுக்கை சரியாக உள்ளதா

என்பதை அறியவே தாம் இவ்வாறு செய்வதால் அதனால் தமக்கு நரகமே வாய்க்கும் என்றாலும் கவலை இல்லை ஆசார்யன் திருமேனியை பற்றியே தாம் கவலை கொள்வதாகக் கூறினார். ஒரு முறை பாம்பின் வாயில் சிக்கியிருந்த முள்ளை அகற்றுவதை எம்பெருமானார் பார்த்து அவரின் ஜீவ காருண்ய சிந்தையைக் கண்டு வியந்தார்.

திருவேங்கடத்திலிருந்து எம்பெருமானார் கிளம்பும் தருவாயில், பெரிய நம்பிகள் எம்பெருமானார்க்கு தாம் ஏதேனும் தர விருப்பப் படுவதாகக் கூறினார். எம்பெருமானார் கோவிந்தப்பெருமாளைக் கேட்டார். நம்பிகளும் மகிழ்ந்து கோவிந்தப் பெருமாளிடம் எம்பெருமானாரைத் தாமாக கொள்ளும் படிக்கு அறிவுறுத்தி

அனுப்பிவைக்கிறார். அவர்கள் குடும்பத்தார் கேட்டுக் கொண்டதற்கு இணங்க எம்பெருமானார் கோவிந்தப்பெருமாளின் திருமணத்தைச் செய்துவைக்கிறார். ஆனால் அவர் இல்லற வாழ்கையில் ஈடுபடாதிருந்தார். எம்பெருமானாரிடத்தில் வந்து தான் எல்லா இடங்களிலும் பெருமாளைப் காண்பதால் தன்னால் இல்லறத்தில் ஈடுபட

முடியவில்லை என்று கூறினார். எம்பெருமானார் இவரின் நிலையை அறிந்து இவர்க்குத் துறவறம் அளித்து #எம்பார் என்னும் திருநாமத்தைச் சாற்றித் தம்மோடே இருக்கும் படிக்கு ஆணையிட்டார். கூரத்தாழ்வாரின் மனைவி ஆண்டாள் பெரிய பெருமாள் அனுப்பிவைத்த பிரசாதத்தின் அருளால் இரண்டு திருக்குமாரர்களை

ஈன்றெடுத்தார். அவர்களின் பெயர் சூட்டு விழாவிற்கு எம்பாருடன் இராமானுசர் கூரேசரின் திருமாளிகைக்கு வருகை தந்தபொழுது குழந்தைகளை எடுத்துகொண்டு வரும்படிக்கு எம்பாரிடம் சொன்னார். எம்பார் குழந்தைகளை எடுத்து வரும்போது அவர்களின் ரக்ஷைக்கு வேண்டி த்வயானுஸந்தானம் செய்தார். குழந்தைகள்

எம்பாரிடமிருந்து த்வய மஹாமந்திரத்தை உபதேசிக்க பெற்றார்கள் என்றுணர்ந்த எம்பெருமானார் எம்பாரையே அவர்களுக்கு ஆசார்யனாய் இருக்கும்படி நியமித்தார். இதனைத் தொடர்ந்து பராசர பாட்டரும் வேத வ்யாச பட்டரும் எம்பாரின் சிஷ்யர்கள் ஆனார்கள். மண்ணுலக விஷயங்களில் எப்போதும் வெறுப்பு கொண்டும் ஆனால்

பகவத் விஷயங்களில் பெரும் ஈடுபாட்டுடனும் இருந்தார். பெரியாழ்வார் திருமொழியின் இறுதிப் பாசுரத்தில் “சாயை போலப் பாட வல்லார் தாமும் அணுக்கர்களே” என்பதற்குப் பொருள் கூறும்படி சில வைணவர்கள் கேட்க அதற்கு எம்பார் இந்தப் பாசுரத்திற்கு தான் எம்பெருமானாரிடம் அர்த்தம் கேட்டதில்லை என்று

சொல்கிறார். ஆயினும் எம்பெருமானாரின் பாதுகைகளைத் தமது திருமுடி மேல் வைத்து ஒரு கணம் தியானித்த பின் அக்கணமே எம்பெருமானார் இதற்கான விளக்கத்தை தமக்கு உணர்த்தியதாகவும், இதன் பொருள் எவர் ஒருவர் இப்பாசுரங்களைப் பாடுகிறார்களோ அவர் எம்பெருமானின் நிழல் போன்று அவரை விட்டுப் பிரியாமல்

இருப்பார் என்று புரிந்து கொள்ளப்பட வேண்டியது என்று அருளினார். கண்ணன் எவ்வாறு அனைவரையும் அச்சுறுத்துகிறான் என்று விளக்கும் பெரியாழ்வார் திருமொழியின் 2.1 பதிகத்திற்கு உய்ந்தபிள்ளை என்னும் அரையர் கண்ணன் தன் திருக்கண்களை அச்சுறுத்தும் விதத்தில் வைத்து ஆயர் பிள்ளைகளை அச்சுறுத்துகிறார்

என்று அபிநயித்துக் காட்டியதைப் பின்னே இருந்து கவனித்து வந்த எம்பார் சங்கையும் சக்கரத்தையும் தோளில் வைத்துக் காட்டி கண்ணன் ஆயர் சிறுவர்களை அச்சுறுத்துகிறார் என்று காட்ட, அதைப் புரிந்துகொண்ட அரையர் எம்பார் காட்டிய படி அடுத்த முறை அபிநயம் காட்டினார். இதைக் கண்ட எம்பெருமானார்

எம்பாராலேயே இவ்வாறாக அர்த்தங்கள் தர இயலும் என்பதால் கோவிந்தப்பெருமாளே இருந்தீரோ என்று கேட்டு மகிழ்ந்தார். இவரின் குண நலத்தால் "எம்பெருமானார்" என்ற இராமானுசரின் பெயரையே அடியார்கள் இவருக்கு இட்ட போதும், ஆச்சாரியன் மீது கொண்ட அளவுக்கடந்த பக்தியினால் ஏற்பட்ட அடக்கத்தின்பால் எம்பார்

என தன் பெயரை சுருக்கிக்கொண்டார். இவர் இயற்றிய நூல்கள் விஞ்ஞான ஸ்துதி, எம்பெருமானார் வடிவழகு பாசுரம், சரமகுரு விசயம் ஆகியவை ஆகும். தனது அந்திம காலத்தில் எம்பார் தன் சிஷ்யர் பட்டரை அழைத்து, சச்சம்பிரதாயத்தைத் திருவரங்கத்தில் இருந்து நிர்வகித்து வரும்படியும், எம்பெருமானார்

திருவடிகளையே தஞ்சமாக நினைத்து வரும்படியும் உபதேசித்தார். எம்பெருமானார் தியானத்தில் ஆழ்ந்து தமது சரம திருமேனியைத் துறந்து எம்பார் நித்ய விபூதியில் எம்பெருமானாரோடே இருக்கத் திருநாட்டுக்கு எழுந்தருளினார்.
எம்பாரின் தனியன்:
ராமானுஜ பதச்சாயா கோவிந்தாஹ்வநபாயிநீ
ததாயத்த ஸ்வரூபா ஸா

ஜீயாந் மத் விஶ்ரமஸ்தலீ ||

எம்பாரின் வாழி திருநாமம்:
பூவளரும் திருமகளார் பொலிவுற்றோன் வாழியே
பொய்கை முதல் பதின்மர் கலைப் பொருளுரைப்போன் வாழியே
மாவளரும் பூதூரான் மலர் பதத்தோன் வாழியே
மகரத்தில் புனர்பூசம் வந்துதித்தோன் வாழியே
தேவுமெப்பொருளும் படைக்கத் திருந்தினான் வாழியே

திருமலைநம்பிக் கடிமை செய்யுமவன் வாழியே
பாவையர்கள் கலவியிருள் பகலென்றான் வாழியே
பட்டர்தொழும் எம்பார் பொற்பதமிரண்டும் வாழியே

நன்றி எச்சூர் ஸ்ரீநிவாசன்
ஆதாரம்:
விக்கிபீடியா மற்றும்
guruparamparai.wordpress.com/2012/09/07/emb…
வலைத்தளம் – guruparamparaitamil.wordpress.com

Since you are not following me cc @kgdhouhithri